1 Nagra Saimoni Pitana, Jisas Kraisi kazokzo eriza aposol ne'mo'na, ana miko tagrama hunakna huta Anumzama Jisas Kraisi tamagu'mavazi ne'mo'ma Anumzamofontema tazeri fatgoma nehia Nete'ma tamentintima nehazamotarega, ama avona kreneramue.

2 Anumzamo'a asunku zama'areti'ene, rimpafru zanteti, Ranti Jisasi Kraisima kenka antahinkama hunana antahintahi zampina, asomu hunegante'na mago'ane hagenka mrerigahane.

3 Tagrama Jisasima kenima nehunkeno'a, Agri'a hankavemo mika zanku'ma Agri'ma avenesia avu'ava zampima upama hunazana neramie. Agri'a hanave masazama'ane, knare avu'avazama'a erisunegu, tagrira tagi hu'ne. 4 E'i ama anazampi mareri agatereno, knarezantfa hu'nea huvempa kea huhamprirante'ne, hu'negu tagranena, Agri'a avu'avazama'a nehuta, ama mopafi kefo tavesizamofo havizampintira agateregahune. 5 E'ina hu'negu ama ana agafare tamentintimo'ma hage ra hanigura mago'ane hanavetita, knare tmavutmava nehutma, knare tamavutamavatetira, knare antahintahi eneritma, 6 ana knare antahintahireti tamavufamofo avesizana kegva nehutma, tamavufamofo avesizama kegva huzanteti, knazama erita nevutma, knazama erino vuzantetira, Anumzamofo avu'avaza nehutma, 7 Anumzamofo avu'avazantetira, neramafuna knare tamavutmava hunezmanteta ovesinte avesinte hiho. 8 Tamagripima ama ana avu'avazama me'nesigeta hageta mrerisageno'a, e'i ana tamavutamavazamo'a eri amama haniana, Ranti Jisas Kraisima ketma antahitmama hunazazamo'a amnezanknara osugahianki, nena rga'a rentegahie. 9 Hianagi iza'o e'inahu avu'avazama nosanimo'a, avua asu huge, avua afetera nonkeankino, koma Anumzamo'ma kumi'ama azeri agru huno atrente'neazankura agenekanie. 10 E'ina hu'negu nenafugata, hakarezama hanafina, Anumzamo huhamprintanteno tagi hune hutma hanavetitma ketma antahitma nehutma, mani fatgo hiho. Na'ankure tamagrama e'inahu tamavutamavama hanutma trakara osugahaze. 11 E'inahu kantema vnageno'a, Ranti Jisas Kraisi'ma taguvazi nemo'a, manivava kuma'amofo kafana anagi hagro hanigeta ufregahaze.

12 E'ina hu'negu tamagra ana tamage nanekema antahita oti hanaveti'nazanagi, nagra huramagesa huvava hugahue. 13 Nagrama kena antahina huana, ama mopafima kasefa hu'na mni'nenuna, nagra huramagesa huvava hanuana knare hu'ne. 14 Na'ankure Ranti Jisas Kraisi'a nasamino ko naveri hu'neankina, ama mopafina zazakna omanigahue. 15 E'i ana agafare hanavetina erizana eneruankita, nagrama fri'na vanugetma, anama huramagesa nehua kegura, tamagera okanigahaze.

16 Na'ankure antahizane vahe'mo'zama nehazaza huta, tagra Ranti Jisas Kraisima esiazankura havigea nosune. Hianagi Mrerisa msa'ane mni'negeta tagra tavufinti ke'nona zanku neramasamune.

17 Na'ankure Anumza Nafatimo Agra'a ra agi nemino, masa'a eriama nehuno, hanavenentake masa'afinti anage huno Jisasinkura hu'ne, ama'i Nagri Mofavre, navesinentena muse hunentoa Mofavre'ni'e hu'ne. 18 Higeta tagra'a agonafima mni'nonkeno ana kea monafinti higeta antahi'none. (Mat 17:1-8, Mak 9:2-8, Luk 9:28-36) 19 Ana higeta tagra kasanampa vahe'mozama hu'naza kea antahi amama nehuta tamentinti hu'none, e'ina hu'negu tamagra ana kemofona keni nehinkeno, zamagri kemo'a hanimpima tavimo remsa huno viankna nehina, nantera ofumo, Kraisi'a tamaguafinti remsa hugahie. (Nam-Ham 24:17, Rev-Huf 22:16) 20 Hianagi tamagrama antahiama'ma hanazana, magore huno avon tafepima me'nea kasnampa kea, kasnampa vahe'mo'za zmagra'a zmagesafintira kreonte'naze. 21 Na'ankure vahe'mo'za zmagra'a zmavesite, ana kasnampa kea kreonte'naze. Hianagi Anumzamo'ma hu'neankea Ruotge Avamumo zmazeri otige'za krente'naze.