1  Madi 5.48A꞉la꞉fo꞉ko꞉lo꞉ niliyo꞉ man digalo꞉ Godeya꞉lo꞉ dimida꞉sen a꞉no꞉ko꞉ kudu ha꞉na꞉niki. Mo꞉wo꞉ Gode eyo꞉ nio꞉ mada alan asulaki, nio꞉ ene so꞉wale ta꞉fo꞉lab. 2  Kis 29.18, Hibu 10.10Keliso eyo꞉ nimo꞉wo꞉ ha꞉fo꞉wo꞉ disa꞉la꞉sa꞉ga꞉, ni asuwa꞉takiyo꞉ mela꞉no꞉ enedo꞉ko꞉ wala꞉. Ene mela꞉no꞉ a꞉no꞉ mundo꞉ nafale ko꞉lo꞉ bo꞉ba so꞉mean aumbo꞉ Godemo꞉ dimi. O꞉leaumbo꞉ niliyo꞉lo꞉ nol o꞉lia꞉yo꞉ ha꞉fo꞉wo꞉ disa꞉ma꞉niki. 3 Ko꞉sega uwo꞉ diano꞉, mo꞉dimidan aundo꞉ dimidan man ko꞉li ko꞉lilo꞉ a꞉no꞉lo꞉, a꞉la꞉ta꞉ga꞉ meselan man a꞉no꞉lo꞉ gi amio꞉ fa꞉la꞉dowabena꞉ki, ko꞉na꞉ dowa꞉bi. Tilidabu kaluka꞉isale gio꞉ man a꞉no꞉lia꞉ anidoma꞉no꞉wo꞉ mo꞉ililo꞉. 4 Giliyo꞉ wa꞉sa꞉le sa꞉lan to o꞉lia꞉, madali to o꞉lia꞉, uwo꞉ dia꞉nikilo꞉ mesele sa꞉lan to o꞉lia꞉yo꞉ mada sa꞉la꞉so꞉bo. To mogago꞉ ko꞉li ko꞉lilo꞉ a꞉no꞉ giliyo꞉ sa꞉ma꞉no꞉wo꞉ mo꞉ililo꞉ ko꞉lo꞉lab. A꞉la꞉bo꞉ mo꞉dimidaki, giliyo꞉ Godemo꞉ mada o꞉m a꞉la꞉dulugu sa꞉la꞉lubi. 5  1Kol 6.9-10, Kolo 3.5Giliyo꞉ to we hendelelo꞉b a꞉la꞉ asula꞉bi. Uwo꞉lo꞉ dia꞉labo꞉, mo꞉dimidan aundo꞉ dimian man ko꞉li ko꞉lilo꞉ dimida꞉labo꞉, a꞉la꞉ta꞉ga꞉ mesela꞉labo꞉, kaluka꞉isale man wengo꞉lo꞉ kudu ha꞉na꞉lab i a꞉no꞉, Gode o꞉lia꞉ Keliso o꞉lia꞉ma꞉lo꞉ bo꞉fo꞉mela꞉no꞉ man us a꞉namio꞉ mada mo꞉tina꞉ib. Meselan man a꞉no꞉ kaluka꞉isale madali godemo꞉lo꞉ gulugululan man o꞉ngo꞉ ko꞉lo꞉ a꞉lab.

6  Lom 1.18, Kolo 2.4,8Kalu noma꞉yo꞉ gio꞉ madali to sa꞉lakiyo꞉ dikidabena꞉ki dinafa dowa꞉bi. Mo꞉wo꞉ kaluka꞉isale Godelo꞉ mo꞉kudu ha꞉na꞉lab i a꞉ma꞉yo꞉, man mogago꞉ nilo꞉ sa꞉la꞉i mio꞉ a꞉no꞉ dimida꞉lab ko꞉lo꞉, Godeya꞉ gadio꞉ a꞉no꞉ kaluka꞉isale i o꞉mo꞉wo꞉ doma꞉ib. 7 A꞉la꞉fo꞉ko꞉lo꞉ kaluka꞉isale i a꞉no꞉lia꞉yo꞉ gasa dowa꞉so꞉bo. 8  Yo꞉n 12.36, A꞉fe 2.13, Kolo 1.13, 1Bid 2.9Tamin amio꞉ gio꞉ sololi usa elen ko꞉sega, o꞉go꞉ gio꞉ Kalu Alan o꞉lia꞉ dowabiki, ho꞉lena a꞉lab. A꞉la꞉fo꞉ko꞉lo꞉ giliyo꞉ ho꞉lena꞉ so꞉waya꞉lo꞉ ha꞉nan au ha꞉na꞉lubi. 9 A꞉la꞉do꞉ so꞉lo꞉lo꞉ mo꞉wo꞉ we. Ho꞉lena꞉ fo hedano꞉ we, man nafayo꞉, man digalo꞉wo꞉ a꞉la꞉ta꞉ga꞉ to hende sa꞉lano꞉, fo a꞉no꞉ ko꞉lo꞉ hedan. 10 A꞉la꞉fo꞉ko꞉lo꞉ giliyo꞉ mano꞉ dinafa alobana ba꞉da꞉sa꞉ga꞉yo꞉, Alando꞉ sagalema꞉no꞉ man a꞉no꞉leko꞉ dimida꞉lubi. 11 Sololiya꞉ man a꞉ma꞉yo꞉ fo nafayo꞉ mo꞉hedan ko꞉lo꞉, gio꞉ man a꞉no꞉lia꞉yo꞉ uwayo꞉ gasa dowa꞉so꞉bo. A꞉la꞉ba. Kalu nolba꞉yo꞉ man a꞉no꞉ hendele mogago꞉lo꞉b a꞉la꞉asuluma꞉ki, giliyo꞉ ho꞉lena dia꞉ta꞉bi. 12 Ililo꞉ wo꞉no꞉lelo꞉ dimidan man a꞉no꞉ mada mogago꞉ ko꞉lo꞉, nilo꞉ a꞉sa꞉ma꞉no꞉wo꞉ sendelowab. 13  Yo꞉n 3.20-21Ko꞉sega ho꞉lena꞉yo꞉ man wo꞉no꞉lelo꞉ delendo꞉wa do꞉italikiyo꞉, kaluka꞉isaleya꞉yo꞉ a꞉na fanda ba꞉ba꞉ib. 14  Ais 26.19, Lom 13.11Mo꞉wo꞉ kelego꞉ ililo꞉ fanda ba꞉dab a꞉no꞉ tambo ho꞉len o꞉ngo꞉ fa꞉la꞉doma꞉ib. A꞉la꞉fo꞉ko꞉lo꞉ to wema꞉yo꞉ a꞉la꞉sa꞉lab,

15  Kolo 4.5Gililo꞉ man kudu ha꞉nab a꞉no꞉ dinafa tilidowaki ha꞉na꞉lubi. Asugdo꞉ma kalu o꞉ngo꞉wo꞉ mo꞉dowaki, asugdo꞉ di kalu o꞉ngo꞉ dowa꞉bi. 16 O꞉go꞉ ho꞉leno꞉ mogago꞉ dowab ko꞉lo꞉, fogo꞉ dowalikiyo꞉ giliyo꞉ ho꞉len a꞉no꞉ mo꞉walaki nanogo꞉ nafa dimida꞉lubi. 17 A꞉la꞉fo꞉ko꞉lo꞉ no꞉nolo꞉ asugdo꞉ma kalu o꞉ngo꞉wo꞉ mo꞉dowaki, Alana꞉lo꞉ asulab a꞉no꞉ ko꞉lo꞉ dinafa asula꞉bi. 18  Luk 21.34Gio꞉ wain ho꞉n nakiyo꞉ dafola꞉so꞉bo. Man a꞉ma꞉yo꞉ gio꞉ mogagila꞉ma꞉ib. Ko꞉sega Godeya꞉ Mamayo꞉ gi amio꞉ ilili alifoma꞉ki ta꞉ta꞉bi. 19  Kolo 3.16Giliyo꞉ tilidabu kaluka꞉isale nol o꞉lia꞉ tolakiyo꞉, Godeya꞉ gisalo꞉ bugo꞉ amilo꞉ to sio꞉ a꞉no꞉lo꞉, gulugululakilo꞉ gisalo꞉ mo꞉lan to a꞉no꞉lo꞉, Mamaya꞉ gisalo꞉ gimo꞉lo꞉ dimiab to a꞉no꞉lo꞉ sa꞉la꞉lubi. A꞉la꞉ta꞉ga꞉ giliyo꞉ Alana꞉ wiyo꞉ wabudaki, asulo꞉ usamilo꞉ fa꞉la꞉dowab a꞉na a꞉la꞉ta꞉ga꞉yo꞉, gisalo꞉wo꞉ halaido꞉ mo꞉la꞉bi. 20  Kolo 3.17Ho꞉leno꞉ tambo amio꞉ Alan Ya꞉su Kelisowa꞉ wiya ilikiyo꞉, kelego꞉ tambo amio꞉ Do Godemo꞉wo꞉ sagalaki, mada o꞉m a꞉la꞉sa꞉la꞉lubi.

21  1Bid 5.5Giliyo꞉ Ya꞉su Kelisowo꞉ mada alan asulo꞉ka꞉ a꞉la꞉widakiyo꞉, tilidabu kaluka꞉isale nolba꞉ ha꞉ga dowa꞉bi. 22  Kolo 3.18, 1Bid 3.1Ka꞉isale giliyo꞉ Kalu Alana꞉ ha꞉g amilo꞉ dowab o꞉leau, kalu gililo꞉ma꞉ ha꞉g amio꞉lo꞉ a꞉la꞉ka dowa꞉bi. 23  1Kol 11.3, A꞉fe 1.22Mo꞉wo꞉ ha꞉ Keliso e sa꞉sa꞉ ene misa꞉ a꞉lab o꞉leaumbo꞉, kaluwo꞉ ene inga a꞉ma꞉ misa꞉ ko꞉lo꞉lab. Sa꞉s kaluka꞉isale iyo꞉ Ya꞉suwa꞉ ene do꞉mo꞉ a꞉la꞉ta꞉ga꞉, ilo꞉ a꞉ma꞉la꞉ gasili kaluwo꞉ Ya꞉su e. 24 Sa꞉s kaluka꞉isale ko꞉lo꞉ Kelisowa꞉ ene ha꞉g amilo꞉ dowab o꞉leaumbo꞉, ka꞉isale gililo꞉ man dimidan us a꞉namio꞉, kalu ginindo꞉ma꞉ ha꞉ga dowa꞉bi.

25  Kolo 3.19, 1Bid 3.7Kelisowa꞉lo꞉ sa꞉so꞉ alan asula꞉sa꞉ga꞉lo꞉ ene mela꞉no꞉ wala꞉ o꞉leaumbo꞉, kalu giliyo꞉ ga꞉ gayo꞉ mada alan asulaki ha꞉fo꞉wo꞉ disa꞉la꞉bi. 26  Tait 3.5Kelisowa꞉lo꞉ a꞉la꞉do꞉ dimido꞉ a꞉namio꞉, sa꞉s kaluka꞉isaleyo꞉ malilo꞉ dowaki eno꞉le fa꞉la꞉doma꞉ki ta꞉fo꞉. Ene to a꞉na ilikiyo꞉, iyo꞉ ho꞉na꞉ to꞉go꞉de alitakiyo꞉, go꞉go꞉do꞉ fa꞉la꞉do alifa꞉. 27  2Kol 11.2, Kolo 1.22Kelisowa꞉lo꞉ dimido꞉ a꞉ma꞉yo꞉, ene sa꞉s kaluka꞉isaleyo꞉ ene siwa꞉l amio꞉ gesego꞉le dowaki, eno꞉le doma꞉ki go꞉. A꞉la꞉ta꞉ga꞉ do꞉mo꞉ ililo꞉ amilo꞉ heyo꞉lo꞉ bo꞉lo꞉wo꞉lo꞉, agogo꞉wo꞉lo꞉, a꞉la꞉ta꞉ga꞉ dalagdo꞉wo꞉lo꞉ aundo꞉ma ta꞉taki, iyo꞉ malilo꞉ dowaki, hala dimido꞉ nowo꞉ aundo꞉ma doma꞉ki go꞉. 28 A꞉la꞉dimido꞉ ko꞉lo꞉ kalu giliyo꞉ go꞉no꞉ do꞉mo꞉ asulan o꞉leaumbo꞉, ga꞉ gayo꞉ a꞉la꞉ka alan asula꞉bi. Kalu abeyo꞉ ene ingayo꞉ mada alan asulab a꞉no꞉ ene do꞉mo꞉wo꞉lo꞉ mada alan asulo꞉ka꞉ a꞉la꞉li widakigab. 29 Mo꞉wo꞉ kalu tambowa꞉yo꞉ inin do꞉mo꞉wo꞉ mo꞉mo꞉bean. O꞉leaumbo꞉ mo꞉auma꞉ib. Kalu tambowa꞉yo꞉ do꞉mo꞉ inido꞉ o꞉lia꞉yo꞉ ha꞉fo꞉wo꞉ disa꞉lakiyo꞉, ma꞉no꞉wo꞉ meaki, dinafa tilidowan. O꞉leaumbo꞉ Keliso eyo꞉lo꞉ sa꞉s kaluka꞉isalemo꞉wo꞉ ha꞉fo꞉ disa꞉laki, mada dinafa tilidowan. 30 Mo꞉wo꞉ nio꞉ tambo Kelisowa꞉ ene do꞉mo꞉ heb imilise ko꞉lo꞉lab. 31  Mo꞉mo꞉ 2.24, Madi 19.5Godeya꞉ ene bugo꞉ amio꞉ a꞉la꞉sa꞉sa꞉lo꞉, “kaluwa꞉yo꞉ iya o꞉lia꞉ ano o꞉lia꞉yo꞉ ta꞉ta꞉ga꞉, ene inga o꞉lia꞉ asulo꞉ imilise dowaki, a꞉la꞉yo꞉ do꞉mo꞉ imilise doma꞉ib.” 32  Kala 19.7To sa꞉lab a꞉ma꞉ ha꞉go꞉ bowo꞉ alan tiane ko꞉lo꞉, to nilo꞉ so꞉lo꞉l a꞉no꞉ Kelisowa꞉ ene sa꞉s o꞉lia꞉lo꞉ ualo꞉ gasa doma꞉no꞉ a꞉no꞉ ko꞉lo꞉ so꞉lo꞉l. 33 Ko꞉sega to a꞉ma꞉yo꞉ gimo꞉wo꞉lo꞉ a꞉la꞉ka sa꞉lakigab. Kalu giliyo꞉ go꞉no꞉n asulan o꞉leaumbo꞉, ga꞉ gayo꞉lo꞉ a꞉la꞉ alan asulaki, ha꞉fo꞉wo꞉ disa꞉la꞉lubi. A꞉la꞉ta꞉ga꞉ ka꞉isale giliyo꞉lo꞉ ge kaluwo꞉ alan a꞉la꞉asulaki, ho꞉leno꞉ tambowo꞉ mano꞉ mada sagalema꞉no꞉ dimida꞉lubi.