49
Ya꞉kob eyo꞉ insiso꞉iyo꞉ nafale mesea꞉ki, dulugu sio꞉
1 Ya꞉kob eyo꞉ insiso꞉iyo꞉ ho꞉ida꞉sa꞉ga꞉ imo꞉wo꞉ a꞉la꞉sio꞉, “Niyo꞉ gemo꞉wo꞉ tif amilo꞉ gilo꞉ ta꞉i ha꞉na꞉no꞉wo꞉ ko꞉lo꞉ walama꞉nigo꞉l ko꞉lo꞉, gio꞉ nelo꞉ wena kegenema.
2 “Gio꞉ tambo Ya꞉koba꞉ insiso꞉i ko꞉lo꞉, gio꞉ ua kegea꞉sa꞉ga꞉ dabuma.
Ni wi nowo꞉ Isolael ko꞉lo꞉, go꞉la꞉lo꞉ to sa꞉ma꞉nigo꞉l we dabuma.
3 Luben, ni so꞉wa wa꞉la꞉bo꞉ ge.
Halaido꞉ nilo꞉wo꞉ geya da꞉lab
Ne kalu halaido꞉ ilikilo꞉ so꞉wa tamin amilo꞉ sa꞉la꞉liyo꞉ ge.
Gao i nol usamio꞉ ge wilo꞉ tamin dowo꞉wo꞉ ge, a꞉la꞉ta꞉ga꞉ halaido꞉ gilo꞉ma꞉yo꞉ iyo꞉ gi tinio꞉ ko꞉lo꞉lab.
4 Ko꞉sega halaido꞉ gilo꞉wo꞉ ho꞉nbu o꞉ngo꞉ dowaki, go꞉no꞉n a꞉ma꞉la꞉yo꞉ mo꞉tilidoma꞉ib ko꞉lo꞉,
gi wi tamin dowo꞉ a꞉no꞉ wa꞉kabiyo꞉ mo꞉doma꞉ib.
Mo꞉wo꞉ go꞉la꞉ uwo꞉bo꞉ gi bidila꞉sa꞉ga꞉, man mogago꞉ dimidaki, go꞉lo꞉ sendelo alifa꞉.
Hendele, giyo꞉ ni uwo꞉bo꞉ bidila꞉.
5 Simeon o꞉lia꞉ Libai o꞉lia꞉ma꞉ mano꞉ imilise dowaki, nol o꞉lia꞉yo꞉ helebeya꞉ buba꞉sen.
6 A꞉la꞉yo꞉ gadiakiyo꞉ kalu nolo꞉ sana sowo꞉. A꞉la꞉ma꞉yo꞉ o꞉li go꞉ a꞉la꞉do꞉ sagalo꞉ ba꞉ba꞉no꞉wo꞉, kaomo꞉wo꞉ nagalo꞉wo꞉ madali dimi.
A꞉la꞉fo꞉ko꞉lo꞉ ne a꞉la꞉ o꞉lia꞉yo꞉ asulo꞉wo꞉ imiliseyo꞉ mo꞉dowaki,
a꞉la꞉ma꞉lo꞉ asulo꞉ aundo꞉ dimidama꞉no꞉ tolo꞉ wo꞉no꞉ledo꞉ nenelab a꞉no꞉, ne a꞉namio꞉ mo꞉doma꞉no꞉.
7 A꞉la꞉ma꞉ gadio꞉ alan a꞉ma꞉yo꞉ ida꞉nina꞉ ko mogaila꞉ma꞉ib.
A꞉la꞉ma꞉ kulufa꞉yo꞉ halaido꞉ a꞉ma꞉yo꞉, inin a꞉ma꞉la꞉yo꞉ hida꞉yo꞉wo꞉ modo꞉ ko꞉lo꞉ fa꞉la꞉do alifa꞉ib.
Niyo꞉ Ya꞉koba꞉ ene so꞉lo꞉ us a꞉namio꞉ a꞉la꞉yo꞉ aloba꞉da꞉sa꞉ga꞉,
Isolael hen a꞉namio꞉ ina꞉li ina꞉lile a꞉la꞉ mesea꞉ki iliga꞉felema꞉no꞉.
8 Yuda ge, gao iya꞉yo꞉ gi wiyo꞉ wabuluma꞉ib.
A꞉la꞉ta꞉ga꞉ gis kaluwo꞉ giyo꞉ ta꞉lia꞉ib ko꞉lo꞉, gao i wema꞉yo꞉ gemo꞉ misa꞉ gulumeakiyo꞉, ge wabulu sa꞉ma꞉ib.
9 Nam 24.9, Kala 5.5Yuda e no꞉ laion inso꞉ o꞉ngo꞉ dowo꞉.
Ni so꞉wa, e laion inso꞉wa꞉lo꞉ no꞉wo꞉ sa꞉nda꞉sa꞉ga꞉ na꞉la꞉ga꞉ alifo꞉lowan o꞉ngo꞉ dowab.
A꞉la꞉fo꞉ko꞉lo꞉ nolba꞉yo꞉ e tagilaki, mo꞉digida꞉ma꞉ib.
10 Yudaya꞉ eso꞉lo꞉wa a꞉la꞉ta꞉ga꞉yo꞉ misa꞉ kalu alano꞉ a꞉na fa꞉la꞉doma꞉ib ko꞉lo꞉, ho꞉leno꞉ tambo ene so꞉lo꞉ amio꞉ kalu nowo꞉ misa꞉ dowa꞉i ha꞉na꞉la꞉ga꞉ dowalikiyo꞉, amisa꞉n nolba꞉yo꞉ kelego꞉ nafa nolo꞉ emo꞉ dia꞉ ya꞉mela꞉ib.
A꞉la꞉ta꞉ga꞉ kaluka꞉isaleyo꞉ tambo e ko꞉lo꞉ kudu yaliki, i a꞉no꞉ e bo꞉fo꞉mela꞉ib.
11 Ene wain iyo꞉ modo꞉ doma꞉ib ko꞉lo꞉,
eyo꞉ ene donkiyo꞉ wain i nafaleya galo alifa꞉ib.
A꞉la꞉ta꞉ga꞉ ene donki inso꞉wo꞉ wain egelo꞉ nafale us a꞉na ta꞉fa꞉ib.
Ene helebeso꞉go꞉ to꞉go꞉dakiyo꞉, wain ho꞉n us ka to꞉lofo꞉liki, to꞉go꞉dema꞉ib.
12 Si elo꞉wo꞉ wain ho꞉n genelo꞉ o꞉ngo꞉ doma꞉ib.
A꞉la꞉ta꞉ga꞉ bes elo꞉wo꞉ kao bo ib ho꞉lo꞉ o꞉ngo꞉ doma꞉ib.
13 Sebulun e so꞉lu ho꞉n aniba mesa꞉ib ko꞉lo꞉,
ene hen amio꞉ ho꞉n ko꞉sulo꞉ kagama꞉no꞉wo꞉ hege ane hen nafale doma꞉ib.
Hen elo꞉wo꞉ ha꞉na꞉ga꞉, Saido꞉n amisa꞉na elema꞉ib.
14 Isaka e donki halaido꞉wo꞉ o꞉ngo꞉ dowo꞉.
E kelego꞉lo꞉ dia꞉ha꞉nan us a꞉na madali alifo꞉len.
15 Eyo꞉ heno꞉ nafale ba꞉daki, a꞉la꞉ta꞉ga꞉
Elo꞉ ha꞉salo꞉ mesa꞉no꞉ hen a꞉no꞉ ego꞉le ba꞉ba꞉.
A꞉la꞉fo꞉ko꞉lo꞉ eyo꞉ hida꞉yo꞉ kelego꞉wo꞉ ene kelena dia꞉ta꞉ga꞉ ha꞉naki,
eyo꞉ madali nanogdo꞉ dian kalu a꞉la꞉ka dowo꞉.
16 Dana꞉ ene so꞉lo꞉ iliyo꞉ inina꞉ma꞉la꞉ bo꞉fo꞉lalikiyo꞉,
ene so꞉lo꞉ a꞉no꞉ Isolael so꞉lo꞉ nol o꞉lia꞉yo꞉ imilo꞉ ka doma꞉ib.
17 Dan e sowa꞉ kisa꞉wa꞉l o꞉ngo꞉ ko꞉lo꞉,
tog aniba delikiyo꞉, hoso a꞉na yab amio꞉, dalolia꞉ ya꞉ga꞉ gesena ma꞉bululaliki,
kaluwo꞉ ho꞉s wa꞉l amilo꞉ sen a꞉no꞉ fa꞉sela talulia꞉ga꞉ sandita꞉mela꞉ib.
18 Yawe gilo꞉ kaluka꞉isaleyo꞉ asuwa꞉takilo꞉ a꞉ma꞉la꞉ gasilia꞉no꞉ a꞉no꞉ ko꞉lo꞉ niyo꞉ yasilo꞉l.
19 Afalo꞉ dian kalu iyo꞉ ya꞉ga꞉ Gad o꞉lia꞉ babuma꞉ib ko꞉sega,
eyo꞉ kalu i a꞉no꞉ o꞉lu dalaidaliki, i o꞉lia꞉ babuma꞉ib.
20 Asela꞉ ene hen amio꞉ ma꞉no꞉ ma꞉no꞉wo꞉ nafale fa꞉la꞉doma꞉ib ko꞉lo꞉,
misa꞉ kaluwa꞉lo꞉ ma꞉no꞉ nafale nan a꞉no꞉ eyo꞉ o꞉li gela꞉liki tula꞉mela꞉ib.
21 Nabtali e no꞉ sili alitab amilo꞉ ga꞉li dowan o꞉ngo꞉ ko꞉lo꞉ dowab.
Eyo꞉ inso꞉wo꞉ nafale ko꞉lo꞉ mada sa꞉la꞉la꞉mela꞉ib.
22 Yosa꞉b e i waina꞉ ele nafaleyo꞉ o꞉ngo꞉ ko꞉lo꞉,
ho꞉n si aniba iliki, fo nafaleyo꞉ modo꞉ ko꞉lo꞉ heda꞉lab.
Ele a꞉no꞉ tambo ha꞉na꞉sa꞉ga꞉, ilif tolo꞉ a꞉no꞉ a꞉ma꞉ go꞉lufa꞉lab.
23 Da꞉ya꞉lo꞉ buban kaluwa꞉yo꞉ e o꞉lia꞉ halaido꞉ bubaki,
iyo꞉ gadia꞉sa꞉ga꞉ e da꞉ya꞉ ola꞉len.
24 Ko꞉sega Ya꞉koba꞉ Gode Halaido꞉lo꞉ A꞉lab a꞉ma꞉yo꞉ emo꞉wo꞉ halaido꞉wo꞉ dimi ko꞉lo꞉,
dagi elo꞉ a꞉no꞉ halaido꞉ dowaki, elo꞉ sililiab a꞉no꞉ mo꞉halala꞉sen.
Gode a꞉no꞉ Isolaeldo꞉ bo꞉fo꞉lowano꞉ e ko꞉lo꞉, Isolael iyo꞉ ene halaido꞉ usa wo꞉no꞉le elen.
25 Go꞉la꞉ Gode a꞉ma꞉yo꞉ ge asuwa꞉fa꞉ib.
A꞉la꞉ta꞉ga꞉ Gode Halaido꞉lo꞉ A꞉lab a꞉ma꞉yo꞉ ge nafale mesea꞉ki ta꞉fa꞉ib.
Eyo꞉ akin halona a꞉la꞉ta꞉ga꞉yo꞉ ho꞉no꞉ dimia꞉ib.
Gi hen amio꞉lo꞉ ho꞉n siyo꞉ modo꞉ fa꞉la꞉do alifa꞉ib.
A꞉la꞉ta꞉ga꞉ gi so꞉lo꞉ amilo꞉ ga i a꞉ma꞉yo꞉ so꞉wayo꞉ modo꞉ sa꞉la꞉la꞉ melea꞉ki ta꞉fa꞉ib.
26 Go꞉la꞉lo꞉ ge ko꞉lo꞉ nafale mesea꞉kilo꞉ dulugu so꞉lo꞉l wema꞉yo꞉, kelego꞉ nafayo꞉ fa꞉la꞉do alitaki, misio꞉wo꞉ go꞉lula꞉sa꞉ga꞉, felesilo꞉ a꞉no꞉lo꞉ o꞉go꞉sema꞉ib.
Yosa꞉b giyo꞉ gao i we bo꞉fo꞉lab ko꞉lo꞉, bo꞉ba kelego꞉ gemo꞉lo꞉ dimia꞉no꞉ a꞉no꞉ ko꞉lile ko꞉lo꞉ dia꞉nigab.
27 Ba꞉nsamen e saila gasa ko꞉lo꞉ maiyo꞉ sia꞉lab o꞉ngo꞉ dowab. Kea꞉fowo꞉ no꞉ ta꞉la꞉iyo꞉ a꞉no꞉ sa꞉nda꞉sa꞉ga꞉ na꞉len.
A꞉la꞉ta꞉ga꞉ ga꞉lowo꞉ no꞉ ho da꞉lab a꞉no꞉ aloba꞉da꞉sa꞉ga꞉ dimia꞉len.”
28 Isolaela꞉ so꞉lo꞉wo꞉ kugula꞉fo꞉wo꞉ we ko꞉lo꞉, iyaya꞉yo꞉ iyo꞉ halale alifoma꞉ki, to a꞉no꞉ ko꞉lo꞉ dulugu sio꞉. Eyo꞉ towo꞉ insiso꞉imo꞉wo꞉ man ina꞉li ina꞉lilo꞉wa꞉lo꞉ ego꞉ o꞉leau dinali sio꞉. 29-30 Mo꞉mo꞉ 23.3-20To a꞉no꞉ imo꞉wo꞉ dinali sa꞉la꞉sa꞉ga꞉yo꞉ a꞉la꞉sio꞉, “Ne ni ma꞉mu i dane ane sab o꞉lia꞉yo꞉ galima꞉ni ha꞉na꞉nigo꞉l ko꞉lo꞉, ni do꞉mo꞉ we Ka꞉ina꞉n hena dia꞉ha꞉na꞉sa꞉ga꞉, ni ma꞉mulo꞉ daido꞉ amilo꞉ difa꞉ amio꞉, Makbela hen, Mamele hen anib amilo꞉ u a a꞉na dia꞉fa꞉ni ha꞉na꞉bi. Tamin amio꞉ hen a꞉no꞉ Hit kalu Eflon eno꞉ ko꞉lo꞉, Ablaham eyo꞉ nilo꞉ dali alita꞉mela꞉no꞉ hen a꞉no꞉ ko꞉lo꞉ kilili. 31 Mo꞉mo꞉ 25.9-10, 35.29Ablaham o꞉lia꞉ inga Sa꞉la o꞉lia꞉yo꞉ a꞉na dali alifa꞉. Aisa꞉g o꞉lia꞉ inga La꞉ba꞉ga o꞉lia꞉yo꞉ a꞉no꞉lo꞉ a꞉na dali alifa꞉. A꞉la꞉ta꞉ga꞉ ni ga Leayo꞉lo꞉ niyo꞉ a꞉na dali alifa꞉ ko꞉lo꞉, nelo꞉ a꞉na dali alita꞉bi. 32 Tamin amio꞉ egelo꞉ hen o꞉lia꞉, u a a꞉namilo꞉ elen a꞉no꞉lia꞉yo꞉ Hit kalu eno꞉ ko꞉lo꞉ Ablaham eyo꞉ kilili.” 33 Ilig 7.15Ya꞉kob eyo꞉ ene insiso꞉imo꞉wo꞉ asuluma꞉no꞉ towo꞉ a꞉la꞉sa꞉la꞉sa꞉ga꞉ eletakiyo꞉, ene gido꞉fo꞉wo꞉ uwo꞉ba dia꞉ta꞉sa꞉ga꞉ alilakiyo꞉, ha꞉fo꞉ko꞉ siliga꞉taki sowa꞉sa꞉ga꞉, e iasi dane ane sab o꞉lia꞉ galima꞉ni ane.