5
Solomon Maimaituwa ena vanuwa ḡalana aubaina i vononoḡa
1 Sauginemo Taiya edi ḡalibona Ḡilam i vaiye te Solomon tamana Deivida ena gabu i vai ba tauwainoyanoya i giukamaḡedi Solomon waiyebonena aubaina banina tamana Deivida wala ma miyana ba Taiya edi ḡalibona vaitena a waitau kauwa.
2 Kamaina bi Solomon giu i giukamaḡe ḡalibona Ḡilam lisinemo bi i giuwena gado,
3 “Tam kuna sibe te bainewa tamagu Deivida dobu wapewapedi vaitedi a waiḡaviya. Taunana aubaina mote ḡemoḡemotina te maso Maimaituwa anilaudunena vanuwina i ḡala. 4 Bi tagu niganana Bada egu Maimaituwa nuwauba i vitegu te visuvisunemo yà miyamiya bi mote bamo egu ḡaviya. 5 ✡ 2 Sam 7:12,13Taunana aubaina niganana yà wainoḡota te Maimaituwa anilaudunena vanuwina yà ḡala. Bainewa Maimaituwa tamagu Deivida i giugiuwena mainana, tana i giuwena gado, ‘Tagu kaka natum ḡemota yà voiye te em gabu ya vai bi tana taunana kaka anilaudune vanuwina ya ḡala isagu anivivilena aubaina.’
6 Taunana aubaina em taubagibagi kwa giukamaḡedi Lebononmo te kai seda sa oidi tagu aubaigu. Bi egu taubagibagi vaitedi sa noya ḡemota bi em taubagibagi bainewa kwa ḡoeḡoena luvanemo yai maiidi. Kuna sibe te tama mote kai oidi ka sibedi mai temi Sidon lavemi kona sibesibena.”
Kamaina bi ḡalibona Solomon Ḡilam edi ḡalibona lisinemo kai i gimelidi bi Islael oloolotodi 30,000 i legaudi te a sagu bi kai bi anilauḡala ḡoneḡonedi a liye tavaite. Maimaituwa ena vanuwa ḡalana aubaina.
Bi Solomon kota olooloto 150,000 i legaudi te sa noya, tedi ḡakima nananakidi a bwalibwalidi Maimaituwa ena vanuwa ḡala aubaina.