42
Hay Nambal Job ay Apo Dios
1 Ya tembal Job din hinapit Apo Dios ay hiya an inalinay,
2 “Immannung an He"a, Apo Dios, ya abalinam an aton an amin di logom,
ya mi'id ah ohah way abalinanan mangipawan He"a!
3 Hay inila' hi imbagam, Apo Dios, ya inalim di,
Ngadan nen tagun mi'id am'amungit hi inilana,
mu mahmahana udot di anala'eng'u?
Henen tagu ya ha"in an hi Job!
Nan hinapihapit'u ya un malgom an agguy'u inilay aatna
ya umipanoh'an mi'id di olog'un manginnila!
4 Ya inalim goh di,
Donglom ta humapita' an waday ipatbal'u,
mu mahapul an tabolom an amin!
5 Din hopapna ya dengngol'uy aatmu, Apo Dios,
mu ten ad ugwan ya hinamad'un tinnig He"a.
6 At ha"in ya bumaina' ahan an amin hinan hinapihapit'u,
ya ten mumpu'upu'a' an umbun hitun hupu' ya dapul
ta ipattig'uy aat di pangitutuyua' hinan hinapit'u!”
Hay Nalpahana ya Winagahan Apo Dios hi Job
7 Ya hidin nalpahan di himmapitan Apo Dios ay Job ya inalinan Eliphaz an nalpud Teman di, “Bumungota' ay he"a ya nan duwan ligwam ti da'yu ya agguy immannung nan inaliyuh aat'u an agguy niyummat hinan inat Job an baal'u! 8 Ad ugwan ya alanyuy pituh nan manilhig an baka ya pitu goh hinan buta'al an kalnilu ta iyuyyu ay Job an baal'u ta idawatyuh Onong an Moghob ta munhulbin da'yu. Ya ta iluwaluan da'yun Job an baal'u, at Ha"in ya abuluto' nan luwaluna ta way ato' an adi mamain ay da'yun dumalat nan inatyu. Ti manu ay ya agguy immannung din inaliyuh aat'u an agguy niyummat hinan inat nan baal'un hi Job.”
9 At inunud da Eliphaz an iTeman, ya hi Bildad an nalpuh nan himpampun an Shuah, ya hi Zophar an iNaamah din inalin Apo Dios hi atonda, at hi Apo Dios ya inabulutna din inluwalun Job.
10 Ya heden nalpahan di nangiluwaluan Job hinan tulun liligwana ya winagahan Apo Dios hiyan impabangngadna din inadangyana an nundubli, at inyal'allanay inadangyana ya un din hopapna. 11 At an amin din a'aginan linala'i ya binabai ya din nahamad an liligwana ya immuydan hiya ta ni'yam'amlongdan nangan hidih abungna. Ya inyul'ulgudanda hiya ta ipa'amlongda ti manu ay ya din nidugah an nampong Apo Dios ay hiyan hinoltapna. Ya an amin din hinohhan didan immuy ya waday indatdah adawnan pihhu ya balitu' an hengheng.
12 Ya winagahan Apo Dios hi Job eden godwan di nitaguana. Mu nidugdugah an do'do"ol di nidat ay hiya ya un din hopapna. Hiya ya waday himpulu ta opat di libuh kalniluna, ya onom di libuh kamilu, ya duway libuh baka, ya hinlibun dongkina. 13 Ya indatna goh di holag Job an pituday linala'i ya tuluday binabai. 14 Ya hay ngadan nan pangpangullun babain imbaluyna ya hi Jemimah,* Hay pohdonan ibaga ya balug. ya nan netob ya hi Keziah,† Hay pohdonan ibaga ya cassia an ohan ngadan di ayiw. ya nan miyatlu ya hi Keren-Happuch.‡ Hay pohdonan ibaga ya nan tagun mamadang hi udumnan tagu ta pumhod hiya. 15 Ya an amin tun luta ya mi'id ah babaih ma"aphod hi umat hinan imbabaluy Job. Ya indatan Job didah banohdan umat hinan banoh nan linala'in a'agida.
16 Ya hidin nalpahan nen na'at ya ni'taguh Job hi engganay hinggahut ta han napat di tawon, at tinnignay pepat di a'apuna. 17 Ya hiya ya na'alla'ay ya un matoy, mu hay aat di nitaguana ya ma"aphod.