1 De ken ho̱-de Ye̱so ro̱ eso jit-de Mar-o̱ o-Gariri* 5:1 u̱t-Girik: Sa-mo̱ o-Genesaret. ka da-o̱ hun-ne̱ mo̱ru̱ru̱ wu̱, remen ye̱ ho̱gu̱té̱ Ma-to̱ Shir. 2 Wu̱ hyanu̱ru̱ hat u̱t-yoor, to̱ a ruute̱ o-dor à, yan-ship u̱n jan yagu̱te̱ to̱ ye̱ ro̱ m-so'os u̱t-yo. 3 Ye̱so daaru̱ hat-o̱ gaan, o̱ ma Simo̱n wu̱ ze̱e̱ru̱ wu̱ tudbe̱ o̱ hiin n-me̱ m-sa. Ye̱so she'etu̱ru̱ n-me̱ o-hat wu̱ yoosu̱ru̱ ka bu̱u̱g-de u̱n hun-ne̱ de.† 5:1-3 Hyen komo: Mati 13:1-2; Mark 3:9-10; 4:1.

4 Bo̱ wu̱ komte̱ u̱t-ma à, wu̱ ze̱e̱ru̱ Simo̱n, “Tudbe̱ ka hat-o̱ so̱ u̱r-du̱w, wo̱ u̱n hun-ne̱ ru ne̱, no̱ he̱'e̱dbe̱ o-yo, no̱ shipt jan.”

5 Simo̱n shasu̱ru̱, “Go̱s-wu̱, te̱ se̱ngu̱te̱ m-te̱t kap, te̱ ship rii á. Amba bo̱ o zette̱ kaane̱, man he̱'e̱dbe̱ o-yo.”‡ 5:5 Hyen komo: Yoha 21:3. 6 Ye̱ he̱'e̱dbu̱ru̱ o-yo ye̱ shipu̱ru̱ jan de̱e̱n har yo-o̱ ro̱ ma-to̱ m-yishe̱.§ 5:6 Hyen komo: Yoha 21:6. 7 Ye̱ agnu̱ru̱ o̱r u̱n ye̱ ya-u̱t-yo, ye̱ ro̱ u̱n o̱ ken hat-o̱ à, ye̱ haan ye̱ gu ye̱. Ye̱ shoosu̱ru̱ ka hat-to̱ u̱t-yoor u̱n jan, har to̱ ro̱ ma-to̱ m-yi. 8 Da-o̱ Simo̱n Bitrus hyane̱ kaane̱ à, wu̱ kwu̱ktu̱ru̱ u̱n rwu̱n-se u̱n wu̱ be-u̱r Ye̱so, wu̱ ze̱e̱ru̱, “Go̱s-wu̱, arag be u̱n de! Me̱ ko-ya-u̱r-ba'as-wu̱!”

9 Wu̱ u̱n o̱r u̱n wu̱ ne̱, ye̱ bo̱pu̱ru̱ o-nu remen ye̱ shipk jan de̱e̱n. 10 Kaane̱ no̱me̱ Bitrus u̱n o̱r u̱n wu̱ ne̱ ne̱ ya-u̱t-yo, Yakubu u̱n Yohana (yakar Ze̱be̱di). Ye̱so ze̱e̱ru̱ Simo̱n, “Wo̱ ho̱ge̱ o-gye̱r á, m-mo̱ka wo̱a warag wan-hante̱ u̱n hun-ne̱ be-de Shir, bo̱ wo̱ u̱n ship u̱n jan à.”

11 Ye̱ ruutu̱ru̱ ka hat-to̱ u̱r-dor, ye̱ yagu̱ru̱ ko yo ke rii-yo, ye̱ do̱ru̱ru̱ Ye̱so.

12 Bo̱ Ye̱so ro u̱n o̱ ken bo̱-o̱ à, wu̱ ken ne̱t-wu̱ ro u̱n swo̱ u̱r-ko̱o̱b u̱n go̱m-o̱ u̱t-cim. Bo̱ wu̱ hyente̱ Ye̱so à, wu̱ so̱ru̱ hi u̱n de u̱n wu̱ n-dak wu̱ ko̱nu̱ru̱ Ye̱so, wu̱ ze̱e̱ru̱, “Go̱s-wu̱, wo̱ cu̱ne̱, wo̱a taas go̱m re.”

13 Ye̱so tapu̱ru̱ kom-o̱ u̱n wu̱, wu̱ ci'u̱ru̱ wu̱. “U̱m co̱no̱g. Warag po̱r po̱r!” Da-o̱ gaan, ka go̱m-o̱ ta wu̱. 14 Ye̱so naku̱ru̱ wu̱ u̱t-to̱, “Wo̱ ru̱re̱ ko-wan-gaan á, amba neke̱ be-de u̱n wan-Co̱w u̱n ko̱n-se Shir, wu̱ byarag wo̱, remen ko̱ wu̱ ke nept go̱m-o ru taag, o seke̱ yar-mo̱ Mosa ze̱e̱ a seke̱ à.”* 5:14 Hyen komo: Rewi 14:1-32.

15 Amba myet u̱n kaane̱, ma-u̱t Ye̱so wo̱o̱ru̱ ko̱ de ke ko'so-de, hun-ne̱ haante̱ de̱e̱n ye̱ ho̱gu̱te̱ wu̱, komo wu̱ taaste̱ go̱m-se u̱n ye̱. 16 Amba Ye̱so ro̱ m-ha de ken be-de ba hun-ne̱ de, u̱n ho̱n-de u̱n wu̱, wu̱ konot Shir kane̱.

17 De ken ho̱-de Ye̱so ro̱ u̱r-yoos, Parisa-ne̱ u̱n yan-Yoos-de o-karamsa ne̱ ro̱ tara tara ye̱ rwu̱u̱ne̱ kap bo̱-to̱ n-dak o-Gariri, n-dak o-Judiya ne̱, o-Urusharima ne̱ à. 'Wo̱ns-mo̱ Wan-Ko̱yan ro̱ mo̱sse̱ u̱n wu̱ ne̱ remen Ye̱so taasté̱ ya-u̱s-go̱m, go̱m-se u̱n ye̱. 18 Ye̱ ken hun-ne̱ ye̱ sawnu̱ru̱ wu̱ ken ko-ryam-wu̱, o-karanga, ye̱ se̱ngu̱ru̱ ye̱ tu̱wu̱tte̱ wu̱ u̱n hur-o̱ Ye̱so ro̱ à, ye̱ e̱ste̱ wu̱ u̱n co-o̱ u̱n wu̱. 19 Amba ye̱ kum hek-de ye̱ hette̱ wu̱ m-tu̱wu̱t be-u̱r Ye̱so á, remen hun-ne̱ no̱mo̱g u̱t-mo̱o̱r de̱e̱n. Remen kaane̱, ye̱ detu̱ru̱ wu̱ n-to̱n o-kuke̱, ye̱ bo̱o̱ru̱ o-wu n-to̱n o-kuke̱. Ye̱ rwo̱nu̱ru̱ wu̱ u̱n karanga-o̱ u̱n wu̱ har n-dak, u̱n te̱te̱-o̱ u̱n hun-ne̱ u̱n co Ye̱so. 20 Bo̱ Ye̱so hyente̱ ye̱ bo̱k ma-to̱ u̱n wu̱ o-nip à, wu̱ ze̱e̱ru̱ ka ko-ryam-wu̱, “Wan-yen de, a sokste̱ ba'as u̱n du.”

21 Yan-Yoos-de o-karamsa u̱n Parisa-ne̱, ye̱ ze̱e̱ru̱ hi u̱n de u̱n ye̱, “Wan wu̱ ne̱ ka ne̱t-wu̱, wu̱ yo'ogte̱ Shir! Shir ye̱ cot he soks ba'as-to̱ u̱n hun-ne̱!”

22 Ye̱so napu̱ru̱ me̱n-to̱ ye̱, wu̱ ze̱e̱ru̱ ye̱, “¿Remen yan o̱ no̱ cekerte̱ kaane̱? 23 ¿Jiishte̱ a zee ba u̱r-ko̱o̱b, ‘Shir sokste̱ ba'as u̱n du,’ ko u̱m zee, ‘Ine̱ o neke̱ u̱r-hew’? 24 Man kutu no̱ u̱nze, Wà-wu̱ u̱n ne̱t ro̱ u̱t-gwo̱mo ne̱ n-dak wu̱ sokste̱ u̱r-ba'as.” Wu̱ ze̱e̱ru̱ ko-ryam, “Me̱ wo̱ m-ze̱e̱, ine̱ eso, mos karanga-o ru, o neke̱ jo!”

25 U̱n gyept-o̱ u̱n yish, wu̱ inu̱ru̱ u̱n co-o̱ u̱n ye̱ kap, wu̱ mo̱tu̱ru̱ karanga-o̱ u̱n wu̱ o̱ wu̱ rotte̱ do̱mb à, wu̱ ji'u̱ru̱ o-hur wu̱ ro̱ u̱n bo̱ngo̱n-de Shir. 26 Ye̱ hyanu̱ru̱ u̱t-hyat! Gye̱r-o shiishe̱ ye̱, ye̱ bo̱mu̱ru̱ Shir, ye̱ ro̱ m-ze̱e̱, “Yan go̱n hyat-to̱ a hyane̱ caane̱!”

27 Bo̱ u̱n de ka, Ye̱so ruuru̱ n-do̱, wu̱ hyanu̱ru̱ ko-yan-go̱ks u̱n tar jin-de u̱n wu̱ Rewi, wu̱ ro̱ tara be-de u̱n kuke̱-o̱ u̱n se̱nge̱-mo̱ u̱n wu̱, Ye̱so ze̱e̱ru̱ wu̱, “Do̱nd me̱.” 28  Rewi inu̱ru̱ eso, wu̱ dek rii á, wu̱ do̱ru̱ru̱ Ye̱so.

29 Ka da-de Rewi no̱mu̱ru̱ caari-o̱ o-biki u̱n hur-o̱ u̱n wu̱ rem Ye̱so, yan-go̱ks u̱n tar ro̱ de̱e̱n ye̱ haane̱ à, u̱n ye̱ ken hun-ne̱ ye̱ ne̱ komo. 30  Parisa-ne̱ u̱n yan-Yoos-de o-karamsa ne̱ ye̱ rwu̱u̱ne̱ kang-o gaan à, ye̱ nomu̱ru̱ yan-neke̱-m Ye̱so u̱s-cenene. Ye̱ citu̱ru̱, “¿Remen yan o̱ no̱tte̱ m-re̱ m-swo̱ ne̱ mo̱sse̱ u̱n yan-go̱ks u̱n tar ne̱, komo u̱n ya-u̱r-ba'as ne̱?”† 5:30 Hyen komo: Ruka 15:1-2.

31 Ye̱so shasu̱ru̱ ye̱, “Hun-ne̱ ye̱ ro̱ ba u̱s-go̱m á, ye̱ ro̱ u̱n hoob-o̱ u̱n ko-ya-u̱s-baat á, amba ya-u̱s-go̱m. 32 Me̱ haan remen kashi u̱n hun-ne̱ á, amba remen ya-u̱r-ba'as-ye̱ waktu̱nte̱ be-de Shir.”

33 Ye̱ ken hun-ne̱ ye̱ ze̱e̱ru̱ Ye̱so, “Yan-neke̱-m Yohana ro̱ m-no̱m o-swo̱o̱t ko̱ o̱ ke da-o̱ ye̱ ro̱ u̱n ko̱n-se Shir komo. Ya-m-neke̱ u̱n Parisa-ne̱ ro̱ m-nom kaane̱ komo, amba yan-neke̱-m ru ye̱ ro̱ m-re̱ m-swo̱ ne̱.”

34 Ye̱so shasu̱ru̱, “¿No̱a hoksu̱sse̱ m-we̱n u̱n ya-o-biki o̱ u̱t-ge m-re̱ m-swo̱ ne̱, da-o̱ wa-u̱t-ge ro̱ u̱n ye̱ ne̱? No̱a hoks á! 35 Amba ho̱-u̱r ro̱o̱n de a hette̱ m-de̱k u̱n wa-u̱t-ge à be-de u̱n ye̱, ka da-o̱ ye̱ he m-no̱m o-swo̱o̱t.”

36 Ye̱so dooru̱ ye̱ m-ru̱re̱ ka ma-to̱ u̱s-we̱e̱r to̱: “Yatt-wu̱ he m-yiish matuku-u̱r pu̱-de remen wu̱ dept matuku u̱r-ut á. Wu̱ no̱me̱ kaane̱ wu̱ yiishte̱ o̱ ka matuku-u̱r pu̱-de, komo ka dap-de a nom u̱r-bon be-de u̱n matuku u̱r-ut á. 37 Komo yatt-wu̱ he wu̱u̱s m-ke̱ m-pu̱ mo̱ u̱n tur-o̱ o-ka o-ut á, remen mo̱ pu'e̱ mo̱a caat tur o-ut o̱ o-ka, ka ke̱-mo̱ ukse̱, komo ka tur-o̱ o-ka o̱ naase̱. 38 Remen kaane̱, a wu̱u̱s ke̱-m pu̱-mo̱ u̱n tur-o̱ o-ka o-pu̱ o̱! 39 Wu̱ su̱u̱se̱ ke̱-m ut à, wu̱a cu̱n wu̱ su̱ m-pu̱ mo̱ komo á, wu̱a zee, ‘Ka ut-mo̱ jiishe̱.’ ”