1 O̱r re ne̱, bo̱ no̱ nepse̱ yo karamsa-o ro̱ à, no̱a jiish m-nap yo u̱m he m-rwo̱r à, karamsa-o ro̱ m-no̱m u̱t-gwo̱mo to̱ u̱n ne̱t-wu̱ ro̱ u̱n ho̱o̱g ne̱ à cot. 2 A gu̱te̱ m-sha be-de u̱n ne'a-wu̱ u̱t-ge, wu̱ ro̱ u̱n ku̱s-o̱ u̱n karamsa-o campo̱ u̱n wu̱, wu̱ ro u̱n ho̱o̱g ne̱. Amba u̱rege̱ campo̱ u̱n wu̱ marag, wu̱ po̱ssu̱te̱ u̱n karamsa-o̱ gagu̱ wu̱ be-u̱r campo̱ u̱n wu̱ à. 3 Remen kaane̱, u̱rege̱ wu̱ gaag wu̱ ken campo̱-wu̱, ba campo̱ u̱n wu̱ u̱n mar, a zee wu̱ ko-wa-o-ás. Amba u̱rege̱ campo̱ u̱n wu̱ mereste̱, wu̱ ro̱ u̱r-ke̱e̱r ne̱ be-de o-karamsa ho̱r-wu̱ geet wu̱, wu̱ ken wu̱ ge'e̱ wu̱ a eeg wu̱ “Ko-wa-o-ás” á.

4 Kaane̱ no̱ ro̱ o̱r re ne̱, mar-m Kiristi n-to̱n o-kan mo̱ rwo̱'o̱g no̱ waragte̱ margan-ne̱ be-de o-karamsa. U̱n kaane̱ no̱ waragte̱ kang-o gaan, u̱n ka wu̱ Shir 'yonse̱ ne̱ u̱t-marimar à remen a no̱mo̱té̱ Shir se̱nge̱-mo̱ u̱r-bon. 5 Remen da-o̱ a ro u̱n she'et-de u̱n co̱n-to̱ o-wu̱r, karamsa-o se̱ngu̱ru̱ na u̱t-swo̱w be-de u̱n saw-to̱ u̱n re̱re̱m-mo̱ o-wu̱r co̱ne̱ à, a se̱ngu̱ru̱ no̱m u̱n yo he na hante̱ m-mar à. 6 Amba m-mo̱ka Shir ruutu̱ na o-karamsa, remen a mereste̱ u̱n yo ro gakku̱ na à. M-mo̱ka a hoks no̱me̱ u̱n Shir m-se̱nge̱ u̱n co̱w-yo u̱n ho̱o̱g-m pu̱-mo̱ mo̱ u̱n Ku̱kt-o̱ u̱n wu̱. Se̱nge̱-m 'wu̱tu̱m mo̱ a ge̱ne̱ o-karamsa n-ga à mo̱ aragsu̱te̱.

7 To̱, ¿ya a he m-ze̱e̱ ne̱? ¿Karamsa-o waragte̱ o̱ ka ba'as-de? Ay! Me̱ roa nep yo ba'as-u̱r ro̱ á, se̱ da-o̱ karamsa-o̱ Shir ru̱ru̱ me̱ à. Karamsa-o̱ ro ze̱e̱ge̱ me̱, me̱ no̱m shoob-de u̱n rii-yo u̱n ne̱t á. Me̱ roa nep yo shoob-de u̱n rii-yo u̱n ne̱t ro̱ á.* 7:7 Hyen komo: Rwu̱u̱ 20:17; Kara 5:21. 8 Amba remen ka karamsa-o̱ Shir o̱, o̱ hante̱ ba'as-u̱r kumut o-co̱w yo u̱n 'yons u̱n go̱p u̱n de u̱n kap ka yo Shir we̱ne̱ be u̱n de à! A ro ze̱e̱ge̱ karamsa ro̱ ko̱n á, ba'as-u̱r ro̱a kum u̱r-be̱e̱b á. 9 U̱m ro u̱n ho̱o̱g ne̱ n-ga, me̱ ro nak yo karamsa-o ro̱ á, amba da-o̱ u̱m nape̱ u̱n o̱ ne̱ à, ba'as-u̱r inu̱ru̱ u̱n ho̱o̱g ne̱, 10 u̱m maru̱ru̱. Karamsa-o̱ depe̱ o̱ hante̱ ho̱o̱g à, o̱ hantu̱ru̱ me̱ m-mar mo̱ wongsu̱ me̱ u̱n Shir ne̱ à.

11 Ba'as-u̱r kumu̱ru̱ ka ke̱e̱r-de, de raksu̱ me̱ u̱n bu̱-yo o-karamsa de ho̱o̱ru̱ me̱.† 7:11 Hyen komo: Taka 3:13. 12 Remen kaane̱, o-karamsa u̱n hi u̱n de u̱n o̱ ba m-ku̱ko̱p o̱ ro̱, ka karamsa-o̱ kashi-o̱ komo o̱ ro̱ u̱r-bon ne̱. 13 ¿A ze̱e̱ o̱ ká, ka karamsa-o̱, o̱ u̱r-bon o̱, o̱ hantu̱ me̱ m-mar? Ay, ko̱ hiin! Ba'as-de hantu̱ me̱ to̱ ka. Be-de u̱n ka karamsa-o̱ u̱r-bon o̱ ba'as-u̱r hantu̱ me̱ m-mar, remen a nept 'wu̱n-de u̱r-ba'as. Kaane̱ o̱ ka ba'as-u̱r rwu̱u̱ne̱ cas u̱n ko̱m-de u̱n yo̱-mo̱ u̱n de ne̱.

14 A nepste̱ u̱nze karamsa-o̱ Shir ya'ase̱ Mosa à, o̱ u̱n rwu̱u̱n u̱n Ku̱kt-o̱ Shir. Amba me̱ ne̱t-wu̱ temb, komo a bak me̱ u̱ntu̱n ko-gu̱w-wu̱ u̱r-ba'as. 15 Me̱ nap yo me̱ m-no̱m á, remen yo ho̱o̱g-m re co̱ne̱ u̱m no̱m à, yo yo me̱ m-no̱m á. Komo yo me̱ co̱ne̱ u̱m no̱m á, yo me̱ m-no̱m.‡ 7:15 Hyen komo: Gara 5:17. 16 U̱rege̱ me̱ m-no̱m yo me̱ co̱ne̱ m-no̱m á, u̱m go̱kste̱ ma-to̱ o-karamsa nip-o̱. 17 Me̱ wu̱ u̱n hi u̱n de ro̱ u̱n no̱m u̱n ka rii-yo á, amba ba'as-de, de ro̱ be u̱n de à. 18 U̱m nepste̱, me̱ m-no̱m u̱n rii-yo u̱r-bon á, u̱n barag-u̱s re se u̱n ko-hun. Remen me̱ u̱n zak-o̱ u̱n no̱m u̱n rii-yo u̱r-bon, amba me̱ hoks yo m-no̱m á. 19 Me̱ o-sakto̱ ne̱ u̱m nomot rii-yo u̱r-bon, amba me̱ m-no̱m u̱n me̱n-u̱t jaas-to̱, to̱ me̱ co̱ne̱ u̱m no̱m á. 20 U̱rege̱ u̱m no̱mo̱g yo me̱ co̱ne̱ m-nom á, waragte̱ o̱ ka me̱ wu̱ ro̱ yo m-no̱m u̱n hi u̱n de á, ka ba'as-de de ro̱ u̱r-she'et be u̱n de à, de de ro̱ yo m-no̱m.

21 U̱m hyanu̱ru̱ yo waragte̱ me̱ u̱r-we̱t me̱ cu̱ne̱ m-no̱m u̱n rii-yo u̱r-bon, amba u̱m hyanu̱ru̱ yo me̱ hoks m-no̱m à me̱n-u̱t jaas-to̱ to̱ temb. 22 N-me̱ u̱n du̱w-de u̱n hur u̱n de me̱ m-hyan u̱n bon-de u̱n karamsa-o̱ Shir. 23 Amba u̱n wu̱r-o re me̱ m-hyan u̱n yo ken rii-yo ro̱ u̱t-mu̱r u̱n hur u̱n de. Yo garamsu̱te̱ me̱, yo muutu̱ me̱ ko-gu̱w-wu̱ u̱r-ba'as. 24 U̱m tu̱k! U̱m waragte̱ rii-yo u̱r-'wo̱n! ¿Wa he me̱ m-gu u̱n ka wu̱r-o̱ he me̱ rwo̱ m-mar à? 25 U̱m bo̱mo̱g Shir wu̱ gu me̱ à u̱n be̱e̱b-u̱r Ye̱so Kiristi Wan-Ko̱yan na!

Amba m-mo̱ka ka u̱m ro̱, n-me̱ barag-u̱s re u̱m co̱no̱g m-nome̱ karamsa-o̱ Shir o-do̱ro̱tte̱, amba wu̱r-o̱ ma-hun rwo̱'o̱g me̱ gu̱w-mo̱ u̱r-ba'as.