1 Afe mei Juzíñamui abɨ ímɨe ɨáɨnide imánina cue ácatate. Afémani jaɨnoi cómena zíiñona cáatate. Afeji vidrio enéfenemo uáfori cɨoina izói cɨ́oide. Afe imani Juzíñamui illáɨmana ráɨiranomona tote. Afe ráɨirano daje izói Cordero ie. 2 Afe jofue cɨ́gɨdo áillue macárao illa. Afe macárao dáafenedo comɨ́nɨna zíiñona cáatate aménaɨaɨ riina. Daje izói afénomo ite imani fuédado nágafene daje ie aménaɨaɨ riina. Afe aménaɨaɨ illa dɨga fɨui llɨzífɨrede. Iemo jɨáɨ afe aménaɨaɨ íbiaɨ naɨraɨ ñue manóllena ite. 3 Aféruillaɨdo afénomo faidórafuena jae íñeite. Juzíñamui illáɨmana ráɨirano afe jófuemo ite; daje izói Cordero ráɨirano afénomo ite. Ie ocuífɨregano daa afémɨemo caɨmátaitiaɨoɨ. 4 Afe llezica afémacɨ Juzíñamuimo, meáiruiñeno jofo conímamo éroitiaɨoɨ. Afémacɨ ozócɨmo afémɨe mámecɨ cúeina. 5 Afénomo mona jaca náuiñeite. Afénomo itɨno mechera izoide egáiñuana jítaiñeitiaɨoɨ. Daje izói jitoma egáiñuana jítaiñeitiaɨoɨ, mei caɨ Ocuide Juzíñamui íaɨoɨna egáioite. Iemo afémacɨ jaca nɨnomo zíiñona illáɨmaitiaɨoɨ.

6 Afe méifomo Juzíñamui abɨ ímɨe nane cuena daɨde:

—Bie uai ɨere ua uaiza. Daje izói bie uai ɨere ɨ́ɨnofɨregaza. Afe caɨ Ocuíraɨma naui Juzíñamui uai jino llóraɨnɨ comécɨmo úritɨmɨe. Afémɨe birui ie abɨ ímɨe orede, ie ocuícamacɨmo raɨre cómuitɨfuiaɨna onótallena, —daɨde.

7 Iemo Jesucristo daɨde:

—¡Raɨre bitɨcue! Binícomo cuega Juzíñamui uáillaɨna jiéruitɨmɨe caɨmare ite, —daɨde.

8 Cue Juáadɨcue. Bífuiaɨna cacádɨcue, daje izói bífuiaɨna cɨódɨcue. Bífuiaɨna cacáillano, íemo daje izói cue cɨona méifomo, cuemo ácatate Juzíñamui abɨ ímɨe anamo dújudɨcue afémɨemo caɨmátaillena. 9 Mei íadɨ afémɨe cuena daɨde:

—Jadíe izói cuemo iñeno. O izói Juzíñamui ocuícamɨedɨcue. Daje izói Juzíñamui dɨbénedo úrifɨrede o ámatɨaɨ izóidɨcue. Iemo jɨáɨ binícomo cuega uáillaɨna náfuetɨno izóidɨcue. Cuemo caɨmátaiñeno; dama Juzíñamuimo caɨmátaifɨreiri, —daɨde.

10 Nane dáanomo cuena daɨde:

—Binícomo cuega Juzíñamui uaina báinino o comécɨmo jóoneñeno o iri. Mei bífuiaɨ ɨ́coɨmo ñue fuizájillɨrui ja áɨnozideza. 11 Naɨ bie fuiñena llezica, fɨénidɨmacɨ íaɨoɨ fɨnófɨrega fɨénidɨfuena dama íaɨoɨ fɨnócaza. Fia eroi, mei afe izói íaɨoɨ íllado jamánomo duere fɨnólliaɨoɨza. Daje izói comécɨna ɨáɨredɨno dama comécɨna ɨáɨreoicaideza. Fia eroi, mei áfedo duere fɨnólliaɨoɨza. Mei íadɨ ñue itɨno íaɨoɨ illa baɨmo ñue iri. Daje izói Juzíñamui íena ñue fɨnócamɨe fáɨcanocaiñeno afémɨe íena ífɨreiri, —daɨde.

12 Iemo Jesucristo daɨde:

—Jɨɨ, raɨre bitɨcue. Illa dɨ́gamɨemo cue fecalle fia jɨrídoga izoide raa atɨ́dɨcue. Illa dɨ́gamɨemo afémɨe fɨnoca dɨeze fécaitɨcue. 13 Nanóidɨmɨedɨcue. Iemo jɨáɨ íiraɨmɨedɨcue. Daje izói naga ráfuiaɨ uícodo itɨ́mɨedɨcue. Daje izói fuizájillanomo itɨ́mɨedɨcue. Iemo jɨáɨ abecedario A-mona táɨnia izóidɨmɨedɨcue. Daje izói abecedario Z-mo fuizájilla izóidɨmɨedɨcue.

14 Iaɨoɨ ɨníroina jocófɨredɨno izói, comecɨ ifue ñuérana méidotɨno caɨmare itíaɨoɨ. Íemona cáatate amena llɨzíllana güírediaɨoɨ. Afe bie izói daɨíacade zíiñona íaɨoɨ íllena. Daje izói íaɨoɨ ɨniroi ñue jócuamona, afe jofue nazedo Juzíñamui illánomo jofo jáirediaɨoɨ. 15 Mei íadɨ comécɨna ɨáɨredɨno afénomo jofo jáinidiaɨoɨ. Iemo daje izói jɨáɨma fue gáɨana fɨbídɨno, íemo daje izói nana jɨáɨforiede jɨruifue fɨnódɨno, daje izói cómena méinetɨno, daje izói jánaraɨmo caɨmátaidɨno, daje izói jɨáɨe comɨ́nɨna ɨere jɨ́fuefɨredɨno, naa afe izoide fɨbídɨnori; nana bie izoide comɨnɨ afe jófuemo jofo jáinidiaɨoɨ; jáiñeno jino fɨébitiaɨoɨ.

16 Cue Jesúdɨcue. Juzíñamuimo ua jaɨnáidɨnomo nana bífuiaɨ jino llóllena cue abɨ ímɨe ja cue oreca. Jaiai illaɨma David comuilla moi ímɨedɨcue; daje izói afémɨemona jebuídɨno comuítagamɨedɨcue. Iemo ɨere egáiñote monáiracudu izóidɨmɨedɨcue, —daɨde.

17 Iemona Juzíñamui Ñuera Joreño daɨde:

—Mai bi, —daɨde.

Daje izói Cordero aɨ daɨna afémɨemo ua jaɨnáidɨno íena daɨde:

—Mai bi, —daɨde.

Daje izói bíuaillaɨna cacádɨno afémɨena:

—Mai bi, —omoɨ daɨíri.

Iemo Cristo daɨde:

—Jiróacaitɨmɨe zíiñona cáataite jáɨnoina ɨbáñeno mai fia jíruaɨbiri. Afe bie izói daɨíacade zíiñona illáfuena óiacadɨmɨe mai cuemo bi; raiñóñeno omo fécaitɨcueza.

18 Nana binícomo cuega Juzíñamui uaimo cacáreidɨnona bie izói llétaitɨcueza, cacai: Dáamɨe bie ráfuena baɨmo zotáadɨ, Juzíñamui binícomo cuega jacɨ́rede duere fɨ́nuanɨaɨna afémɨemo jóoneite. 19 Daje izói binícomo cuega Juzíñamui uáimona dáamɨe daa uai oni óiadɨ, Juzíñamui afe zíiñona cáaitɨno mámecɨ cuiánicomo cuega afémɨe mámecɨna oni óite. Daje izói binícomo lloga nɨ́fuenide jófuemo Juzíñamui afémɨena jofo jáitañeite. 20 Bifue jino llotɨ́mɨe nane dáanomo llote:

—Jɨɨ, raɨre bitɨcue, —daɨde.

Afemona Juan daɨde:

—Aquíe izóideza. ¡Caɨ Ocuíraɨma Jesús, mai bi!

21 Caɨ Ocuíraɨma Jesucristo nana ómoɨna ñue fɨ́noiteza. Daɨítadeza. Jae nɨɨe.