49
Itlamiya tlajtol Jacob
1 Huan Jacob quinnotzqui itelpocahua huan quinilhui: “Ximonechcahuica campa na huan nimechilhuis tlen inmechpanos teipa.
2 Noconehua, ximonechcahuica huan xinechcaquica.
Na niJacob huan innoconehua.
Xinechtlacaquilica niimotata, Israel.
3 Ta Rubén, tinoachtohui cone.
Tieliyaya tinochicahualis huan quema titlacatqui eltoya queja nopa achtohui iselca nofuerza.
Tijpiyas miyac chicahualistli huan tlatlepanitacayotl.
4 Pero ayoc tielis tlen más tihueyi,
pampa tiitztoc queja atl tlen tehuahuatatza.
Queja nopa eltoc pampa tinechpinahualti quema timotejqui ipan notlapech ihuaya notlatequipanojca.
5 Simeón huan Leví nelía inicnime pampa san se imonemilis.
Imomachetes inquitequihuíaj san para tlatehuilistli.
6 ¡Ax quema nijnequi nijcaquis imotlajtol,
niyon ax quema nimosentilis imohuaya!
Pampa quema incualaniyayaj, intemictijque,
huan san pampa inquinejque, inquinmetzpostejque torojme.
7 ¡Tlatelchihualtic, quena, tlatelchihualtic imocualancayo,
pampa innelfierojtique huan ax intetlasojtlaj!
¡Nimechsemanas huan initztose campa hueli ipan nochi tlali Israel!
8 Ta tiJudá, moicnihua mitzpaquilismacase.
Huan tiquinitzquis mocualancaitacahua ininquechtla huan tiquintlanis.
Hasta moicnihua motlancuaquetzase para mitztlepanitase.
9 Ta tiJudá, tielis queja icone se tecuani tlen mocuepa pactoc ipampa nopa tlapiyali tlen quimictijtoc.
Tielis queja se león tlen mopachohua huan moteca tlalchi,
huan quichiya tlaque quiitzquis.
Tielis queja se sihua león tlen nelía quipiya fuerza.
Axaca mitzcuesolmacas.
10 Axaca huelis quiquixtilis nopa tlanahuatili tlen moteipa ixhuihua quipiyase.
Niyon quinquixtilis nopa tepos cuatopili tlen quipiyase para ica tetlatzacuiltise.
Quipiyase tlanahuatili para nochipa.
Huan teipa hualas moteipa ixhui tlen temacas tlasehuilistli.
Yajaya tlen nelía iaxca nopa tepos cuatopili huan nopa tlanahuatili para tlanahuatis.
Huan tlacame ipan nochi tlaltini campa hueli quichihuase tlen yajaya quinilhuía.
11 Elis nelrico huan campa hueli oncas xocomeca mili tlen iaxca.
Quiilpis iburro ipan tlen hueli xocomeca macuayotl tlen quinequis,
huan intla quinequi, quiilpis ipilconeburrojtzi ipan nopa xocomeca cuamayitl tlen más cuali.
Quipiyas miyac xocomeca atl hasta nesis queja huelis ica quichicuenis iyoyo.
Quena, hasta mocahuas quipiyas iayo xocomecatl tlen temacas nochi imil.
12 Iixtiyol elis más yayahuic que xocomeca atl,
huan itlancochhua más chipahuac que lechi.
13 Ta tiZabulón, moteipa ixhuihua itztose iteno hueyi atl,
huan nopano ajsise miyac barcos.
Motlal ajsis hasta tlali Sidón.
14 Ta tiIsacar, moteipa ixhuihua elise tejtetique queja se tlapiyali tlen quimati tlamama etic.
Mosiyajcahuase campa quintzacuaj borregojme.
15 Quema quiitase quejatza nelía cuali imotlal para ipan inmosehuise huan quejatza nelía yejyectzi,
huajca motlancuaquetzase huan mocuitlapantise para tlamamase.
Huan niyon ax molinise moteipa ixhuihua quema quinchihuase ma tlatequipanoca san tlapic.
16 Ta tiDan, ta huan moixhuihua intetlajtolsencahuase queja quinamiqui pampa inelise se hueyi familia ipan tlali Israel.
17 Moteipa ixhuihua elise queja se cohuatl tlen itztoc ojtipa,
huan quintzacanía inincotztla cahuayojme huan quincuamajcahua tlen tlejcotoque ipan cahuayojme.
18 ¡TOTECO! Nijchiya para tinechmanahuis.
19 Ta tiGad, miyac soldados hualase huan quintehuise moteipa ixhuihua,
pero teipa quintojtocatiyase.
20 Ta tiAser, moteipa ixhuihua quipiyase tlacualistli tlen cuali.
Quena, temacase tlacualistli tlen ajhuiyac queja tlen quicuaj huejhueyi tlanahuatiani.
21 Ta tiNeftalí, moteipa ixhuihua elise queja se masatl tlen nemi campa quinequi huan tlen quintlacatiltía yejyectzitzi pilconemasatzitzi.
22 Ta tiJosé, moteipa ixhuihua elise queja se cuali cuahuitl tlen quitoctoque campa ameli.
Temaca miyac itlajca huan imacuayohua moscaltía miyac hasta quionpano nopa tepamitl tlen tilahuac.
23 Tlacame quincualancaitase moteipa ixhuihua,
huan quinmajcahuilise cuatlamintli huan nochipa quinmacase cuesoli.
24 Pero moteipa ixhuihua quiquetzase inincuahuitol xitlahuac,
huan ax huihuipicase ininma quema quitequihuise pampa elise tejtetique.
Quena, tlatlanise pampa noTeco Dios, yajaya tlen quipiya nochi chicahualistli quinpalehuis.
Yajaya quinmocuitlahuis pampa yajaya totlamocuitlahuijca tiisraelitame.
Yajaya nopa Hueyi Tetl tlen techmanahuijtoc miyac huelta.
25 Quena, ma inmechpalehuis ininTeco mohuejcapan tatahua.
Ma inmechtiochihua ta huan imoteipa ixhuihua yajaya Toteco Tlen Quipiya Nochi Chicahualistli.
Ma quintiochihuas moteipa ixhuihua ica miyac tlatiochihualistli queja atl tlen huala tlen huejcapa ipan elhuicac,
huan tlen huala huejcatla ipan hueyi atl huan quichihuas ma moscaltis imomilhua.
Ma mitztiochihuas ta huan moteipa ixhuihua huan imosihuajhua.
Ma inmechmacas miyac imoconehua tlen moscaltise ica cuali.
Ma tlahuel momiyaquilica imotlapiyalhua.
26 Quena, José, Toteco ma mitztiochihua, yajaya tlen noTeco na, nimotata.
Ni tlatiochihuali momiyaquilis hasta ajsis ipan nopa tlachiquili tlen huejcahuase para nochipa.
Nochi ya ni elis nopa tlatiochihualistli tlen ta tijpiyas, José,
pampa Toteco mitziyocatlali tlen moicnihua para tielis tiinintlanahuatijca.
27 Ta tiBenjamín, moteipa ixhuihua tlatlanise queja se tepechichi.
Ica ijnaloc quicuase tlen quimictijtoque,
huan hasta tiotlac quipiyase tlen mocajtoc para temajmacase.”
28 Ya ni nopa 12 itelpocahua Israel huan nopa tlatiochihuali tlen inintata quinmacac. Quinilhui tlen quinamiqui para sesen quiselis pampa Toteco quinextili tlen panos ica ininteipa ixhuihua sese inijuanti.
Imiquilis Jacob
29 Nojquiya Jacob quinmacac itelpocahua ni tlanahuatili: “San quentzi polihui para nimiquis. Xinechtlalpachoca ihuaya nohuejcapan tatahua ipan nopa tlacacahuaya tlen eltoc ipan itlal Efrón nopa heteo. 30 Quena, xinechtlalitij nopano ipan tlali Canaán ipan nopa tlacacahuaya ipan nopa mila tlen itoca Macpela, iixtla Mamre. Nopa tlen Abraham quicohuili Efrón para ipan ma quintlalpachoca nochi iteixmatcahua. 31 Nopano quintoctoque Abraham ihuaya isihua, Sara, huan Isaac huan isihua, Rebeca, huan nopano nijtlalpacho Lea. 32 Nopa tlali huan nopa tlacacahuaya tlen eltoc nopano quincohuili nopa heteo tlacame.”
33 Huan quema Jacob tlanqui quinnahuatía itelpocahua, motejqui ipan itlapech huan mijqui.