1-2 Dis me, Paul. I one messenja fo God da Fadda an Jesus Christ, da Spesho Guy God Wen Send. I stay write dis letta fo all you church peopo inside Galatia. Jesus Christ an God da Fadda, who wen make Jesus come back alive from mahke, dey wen tell me fo go all ova fo tell peopo da Good Stuff Bout Jesus. No was peopo dat wen tell me fo go, o give me da right fo do um, was God. All da odda bruddas an sistas ova hea wit me, dey give you guys dea aloha too.

3 I like God our Fadda an da Boss Jesus Christ do plenny good tings fo you guys, an make you guys hearts rest inside.

4 Christ wen give himself fo mahke fo throw out da bad kine stuff us guys wen do. He wen do dat cuz God our Fadda like him take us outa da bad kine stuff da peopo nowdays stay doing. 5 I like everybody tell how awesome God stay, foeva. Dass it!

6 You guys blow my mind! Quick time you guys pau trus God an go trus odda kine stuff. God wen pick you guys cuz he like Christ fo do plenny good kine stuff fo you guys. But you guys go trus odda kine stuff awready. 7 Da kine odda stuff dey teach, dass not da Good Kine Stuff Bout Christ. Dem guys like change da Good Kine Stuff Bout Christ. Dey ony stay jam up you guys. 8 Listen! Even if us guys o one angel guy from da sky tell you guys odda kine stuff, diffren from da Good Kine Stuff From God dat we wen teach you guys befo, God goin punish um foeva. 9 Jalike we wen tell you guys befo, I goin say um one mo time: Whoeva teach you guys diffren kine stuff den da Good Kine Stuff From God dat you guys wen take from us, God goin punish um foeva.

10 You guys tink I trying fo say wat da peopo like, o wat God like? O you guys tink I trying fo make me look good? No way! If I wen try do wat da peopo like an make me look good, den I no can be one worka fo Christ.

11 Eh, bruddas an sistas, I like you guys know dis: da Good Stuff From God dat I wen tell you guys, dass not someting da peopo wen make up. 12 I neva get um from peopo, an nobody wen teach um to me. Jesus, da Spesho Guy God Wen Send, he wen show um to me.

13 You guys wen hear bout da way I wen make befo, wen I wen do everyting da Jewish Rules say we gotta do. I wen make Godʼs church peopo suffa plenny, an even waste um, cuz dey believe dat Jesus, he da Spesho Guy God Wen Send, an dat time I neva believe dat. 14 I wen stick wit da Jewish Rules plenny, mo den da odda Jewish guys my age. I wen go all out fo do everyting our ancesta guys wen tell us fo do.

15 But God wen pick me even befo I wen born. Latas he tell me fo come by him, cuz he like do someting spesho fo me. 16 God wen like show me who his Boy fo real kine, so I can teach da peopo dat not Jews da Good Stuff Bout Jesus. Right den an dea I neva talk to nobody, 17 an I neva go Jerusalem fo check out dis stuff wit da guys dat God wen pick befo me fo send um all ova, but I go Arabia side, an den I go back Damascus town.

18 Three years lata I wen go Jerusalem fo talk story wit Peter, an I stay ova dea his place fifteen days. 19 Dat time I neva see da odda guys God wen send all ova, ony James, da Boss Jesus brudda. 20 Listen. In front God I say dis: all da stuff I stay write you guys stay true. I no bulai.

21 Den I wen go Syria an Cilicia side. 22 Da church peopo Judea side, dey neva know wat I look like. 23 Dey ony wen hear, “Da guy dat wen make us suffa befo, now he telling everybody fo trus da Good Stuff From God, da same Good Stuff he wen try wipe out befo.” 24 An da church peopo Judea side stay tell everybody how awesome God stay, cuz a me.