Hiburu
Hiburu mar kura Yesu nurd untiŋ hitte asaŋ katiŋ
1
Al Kuruŋ Urmiŋ Yesube kuruŋ wor po
1 Bikkeŋbe Al Kuruŋ beleŋ asininiŋ yago mere yire yeŋbe mere basaŋ marmiŋ porofet wawuŋ budamde yad yerke waŋ asininiŋ yago mere yirde hinhan. Goyenterbe porofet gore asininiŋ yago daha mat bebak tiwoŋ yeŋ mere yird yird belŋeŋ kurayen kurayen mat mere yirde hinhan. 2 Goyenbe kuŋ kuŋ nalu funaŋ beleŋ heŋ hikeb Al Kuruŋ beleŋ Urmiŋ teŋ kerke kateŋbe Al Kuruŋyen mere momoŋ diryiŋ. Yeŋbe det kuruŋ gate miŋ al hiyyeŋ yeŋ Al Kuruŋ beleŋ basiŋa iryiŋ. Irdeb Urmiŋ goyen hitte mat naŋkiŋya megeŋya kuruŋ goyen yiryiŋ. 3 Yeŋbe Al Kuruŋyen deŋem turŋuŋ yaŋ wor po goyen kawan forok irde hi. Irde Al Kuruŋbe al dahade wor po goyen Urmiŋ hitte matbe keŋkelak wor po keneŋ bebak teŋ hityen. Irdeb Urmiŋ gote merebe tonŋeŋ yaŋ wor po geb, naŋkiŋya megeŋya irde det kuruŋ gayen mohoŋde po yekeb tumŋaŋ gasuŋeŋyaŋ po haŋ. Yeŋbe alya bereyat mata buluŋmiŋ halde yuneŋ yuneŋ meteŋ pasi irdeb Al Kuruŋ saŋiŋmiŋ kuruŋ wor po goyen hitte hurkuŋ haniŋ yase beleŋ mat keperde Doyaŋ Al Kuruŋ hiriŋ.
Yesube Al Kuruŋyen miyoŋ gote folek
4 Al gobe Al Kuruŋ beleŋ ‘Urne’ inyiŋ. Munaŋ miyoŋmiŋbe “meteŋ marne” yinyiŋ. Niŋgeb Urmiŋbe Al Kuruŋyen miyoŋ buda kuruŋ gote folek wor po. 5 Gobe Al Kuruŋ beleŋ yeŋ ge amaŋeŋ nurde uneŋ hiyen geb, gogo gwaha iryiŋ. Niŋgeb goke teŋbe Al Kuruŋ beleŋ gaha inyiŋ:
“Gebe Urne wor po haha. Irkeb haŋkab nebe Adoge wor po hihim,” inyiŋ. Tikiŋ 2:7
Irde mere kurabe gahade:
“Nebe Naniŋ hemekeb yeŋbe Urne hiyyeŋ,” yiriŋ. 2 Samuel 7:14
Mere gobe Al Kuruŋ beleŋ miyoŋmiŋ kura goke ma yiriŋ. 6 Irde Al Kuruŋbe Urmiŋ uŋkureŋ muŋ goyen megen niŋ alya bereyat Doyaŋ Al Kuruŋ iryiŋ goke teŋbe Urne Mataliŋ inyiŋ. Niŋgeb Urmiŋ Mataliŋ goyen megen gar teŋ kerke wayeŋ tikeyab Urmiŋ goke yiriŋ goyen asaŋmiŋde gahade katiŋ hi:
“Al Kuruŋyen miyoŋ kuruŋ gayen tumŋaŋ yeŋ doloŋ irde hinayiŋ,” yitiŋ hi. Tikiŋ 2:7; 89:26-27
7 Irdeb Al Kuruŋ diliŋde miyoŋmiŋbe Urmiŋ yara moŋ geb, goke asaŋmiŋde gahade katiŋ hi:
“Al Kuruŋyen meteŋ mar miyoŋmiŋbe meremiŋ po gama irde haŋ.
Niŋgeb Al Kuruŋ beleŋ meŋe yire yeŋbe meŋe yiryeŋ, munaŋ kak melak uliŋ po yire yeŋbe gwahade po yiryeŋ,” yiriŋ. Tikiŋ 104:4
8 Goyenpoga Urmiŋ gokeb asaŋmiŋde gahade katiŋ hi:
“Al Kuruŋ, ge beleŋ alya bereyage doyaŋ yirde ha gobe hubu ma hiyyeŋ, gwahader hiyeŋ.
Irde doyaŋ yirde heŋyabe mata huwak mat po doyaŋ yirde hayiŋ.
9 Gebe mata huwak niŋ amaŋeŋ nurdeb mata buluŋ niŋbe bege ar yeŋ hiyen.
Goke teŋbe gere Al Kuruŋ beleŋ basiŋa girde al deŋem yaŋ wor po gire yeŋ olip fimiŋ teŋ tonaŋger wok iryiŋ.
Irkeb goke amaŋeŋ wor po nurariŋ.
Goyenbe kadge yago kurabe gwahade ma iryiŋ,” yitiŋ hi. Tikiŋ 45:6-7
10 Irdeb,
“Doyaŋ Al Kuruŋ, haŋkapya wor po det kuruŋ gayen forok yeŋmiŋ moŋde megeŋ ga kerariŋ. Naŋkiŋ wor gigeŋ irariŋ.
11 Det megen niŋya naŋkiŋde niŋya kuruŋ gabe buluŋ henayiŋ. Gega gebe hugiŋeŋ hayiŋ.
Det kuruŋ gabe amil bida heŋ erek yenayiŋ go gwahade goyen po, buluŋ henayiŋ.
12 Al kura uliŋhormiŋ bidak mupi yirde yemeyde haŋyen go gwahade goyen po, det kuruŋ gayen kuŋ kuŋ buluŋ heke yemeyayiŋ.
Irde amil gergeŋ teŋ amil bidak gote gasuŋeŋde kerde haŋyen go gwahade goyen po,
det kuruŋ gayen wor buluŋ heke kame det gergeŋ beleŋ gasuŋmiŋ yawarnayiŋ.
Goyenbe gebe gwahader hayen geb, gwahade po hayiŋ,” yitiŋ hi. Tikiŋ 102:25-27
13 Al Kuruŋbe miyoŋmiŋ kura goke mere gahade muŋ kura ma iryiŋ:
“Waŋ ketalner heŋ al deŋem yaŋ wor po hawayiŋ.
Irkeb asogo girde haŋ mar goyen bul yirde yawaŋ gasa yirmeke katkeb yufurka tiyayiŋ,” yitiŋ hi. Tikiŋ 110:1
14 Miyoŋmiŋ gobe alya bereya Al Kuruŋyen dirŋeŋ weŋ heŋbe kame yeŋya hinayiŋ mar goyen faraŋ yurde hinayiŋ yeŋ yiryiŋ.