1 Da ⌊Lod⌋ bóktanórr Moseska wagó, “Ka zirrapóndóla dómdóm darrpan kolae bain kla parraodó* Izipt pamkolpama tibiób king parraobóka ngilianónóp. Tóbanan ngi koke yarilürr. akó Izipt pamkolpamdó. Ene kakóm, wa yabü sab ok nirre tótókóm algab. Wa sab yabü nóma ok nirre tótókóm, wa sab yabü blaman tai amkoman amóne algab, metatómpükü. 2 Errkyadan bóktanke Isrrael pamkolpamdó magó, ‘E blamana nümtinamke Izipt kolpam, yabü minggüpanan nidi ngyabendako, ⌊golde⌋ akó ⌊silba-e⌋ tómbapórrón elklazam.’ ” 3 Da Lod Izipt pamkolpam morroal gyagüpitótók nókyenóp, igósüm i morroal esenóp Isrrael pamkolpamdó tibiób obzek kwata. Anda, parraoan zaget pam akó blaman Izipt kolpama Mosesón igó ngakanónóp wagó, wa kari wirri ngi pam kokea.

4 Da Moses bóktanórr wagó, “Lod inzan yaril wa, ‘Irrüb zokrrok, ka kalma wamlo blaman Izipt kantrri kugupidüma. 5 Da blaman ngaensingül babótórrón simanal olmala kalma nurrbarine, tai parraoan ngaensingül siman olomdógab, sab solkwat aban mórran pabodó nótó mórróne, kókó ⌊leba zaget⌋ ngulmokuran ngaensingül siman olomdó, enan wirri zaget nótó tómbapóndo ⌊wit⌋ küp zaze amgünüm. Ngabyón larab ngaensingül babótórrón simanala ta inzan nurrbarine. 6 Sab wirri yón gyaur yarile blaman Izipt kantrridü. Ngaen inzan wirri yón gyaur babul yarilürr ó myamem babul yarile ene kakóm. 7 A darrü kolaea sab kokean tómbapóne Isrrael pamkolpamdó akó ibü ngabyón elklazadó.† Ibrru bóktane inzan angrirrüna: A darrü umea sab koke alkwóm yarile Isrrael pamkolpamdó akó ibü ngabyón elklazadó. Da e sab umul bainane igó, ka, Lod, Isrrael pamkolpam darrpan tonarre koke ngabkandóla, Izipt pamkolpamdógab.’ ”