NINA PAPI
A ISAIA
Na Vuresi Makaliana Na Omea Ara Marea Tana Papi Iani
A Isaia aia e kesa na propete e totu i Jerusalem tana tagu kalina igira na Asiria ara baginia na Israel tabana i vava, me varangi nogo kara baginigotoa na Juda tabana i ata. (Reia tana 2 Taovia Tsapakae Lova 17.) Na papi iani tangomana ke tavota tolu vaga iani:
1) Lova 1—39: A Isaia e tuturiga na mareana na turina na papi iani tana tagu kalina igira na Asiria e varangi nogo kara maiginigira na Juda. Mara gini matagu loki sosongo igira na Juda. Ma Isaia e katevulagia vanigira laka na rota seko loki vaga e gadovigira e tau tana rongona niqira kili segeni moa igira na Asiria. Tagara. Mi tana rongona nogo niqira sasi igira na Juda ara petsakoe mangana God, mara tau dona na noru kalavataviana God. A Isaia e goko maka vanigira na tinoni ni Juda kolugira gaqira ida, laka niqira aqo nomoa kara rongomangana God, ma kara naua moa na omea e dou me gotolaka. Me ti vaga kara nauvaganana ia, me sauba igira kara totu dou tana rago. Me ti vaga kara tau rongomangana God, me sauba God ke toroutsanigira saikesa. Ma Isaia e katevulagigotoa laka sauba ke mai kesa tagu i tana ke totu na rago i laona na barangengo popono. Me laka kesa na kukuana a David sauba ke lia na taovia tsapakae me ke tagao laka.
2) Lova 40—55: Tana turina iani a Isaia e gini goko kalina ara totu tsinogo nogo i Babilon igira na tinoni ni Juda, me ponopala sosongo na tobaqira, mara tau nogo pada laka tangomana kara visutugua i veraqira. Ma na propete e veregira me tsarivulagi vanigira laka sauba God ke laumaurisigira nina tinoni, me ke adivisugiratugua i Jerusalem i tana kara tuturiga kesa na mauri vaolu. Ma na goko pukuga tana turina eni, aia nogo laka God e tagaovi kaputigira na omea sui ara laba tana barangengo popono. Maia e vangaraunogoa laka ke aqoginigira nina tinoni ni Israel, gana ke gini vangalaka vanigira goto na puku tavosi sui. Ma na butona tana turina na papi iani igira na tinoni ara donadouginia bâ tana Turupatu Tabu popono aia na goko e kalea “nina Maneaqo na Taovia.” Mi dani eni igira na Kristiano ara tutunina laka “nina Maneaqo na Taovia” aia nogo a Iesu Kristo.
3) Lova 56—66: Mi tana turina iani, a Isaia e goko vanigira na tinoni ni Israel kalina ara visumai nogo mara totu i Jerusalem, me tsarivanigira laka God e padavisua nina veke e naunogoa vanigira i sau. Ma na goko vaga iani e gini malagaisigira tugua. Mi muri, maia e raigira kara muria na sasaga gotolaka, ma na pedegoto, ma kara muridougotoa na ketsa ara kalea na mango tana Dani na Sabat, ma na kodoputsa, ma na nonginongi, ma na sangaaqira na tinoni ara tau tamanina sa omea mara kili sasanga.
Tana Lova 61 buto 1-2, e totu na goko a Iesu e tsokoa i laona na valetabu i Nasaret tana tuturigana nina aqo vanigira na tinoni. (Reia tana Luka 4 buto 16-21.)
Na Omea Ara Totu Tana Papi Iani
Igira na parovata ma na veke 1:1–12:6
Gaqira kede na puku sui 13:1–23:18
Nina pede God vania na barangengo 24:1–27:13
Visana goto na parovata ma na veke 28:1–35:10
A Hesekia ni Juda migira na Asiria 36:1–39:8
God sauba ke maurisigira tugua nina tinoni 40:1–55:13
Na susuina na parovata ma na veke 56:1–66:24
1
1 Tana papi iani e totu nina goko God e tsarivulagia vania a Isaia na dalena a Amos, tana rongona na butona momoru ni Juda ma na verabau ni Jerusalem, tana tagu kalina ara tu taovia tsapakae tana Juda tugira a Usia, ma Jotam, ma Ahas, ma Hesekia.
God e Taimataqira Nina Tinoni
2 Na Taovia e tsaria, “!Kagamu na barangengo ma na masaoka kamu ka rongomia na omea inau au tsaria! Igira nogoa na baka inau au lokisigira ara tû mara sove taniau inau. 3 Migira na buluka mara donaginia asei na tamaniqira, migira na asi mara donaginia na nauna i tana e palagira gaqira taovia. Migira moa niqu tinoni ni Israel ara tau saikesa padagadovia sa omea. Migira bâ na buluka ma na asi ara sasaga liusigira igira.”
4 Sauba ke seko sosongo nomoa vanigamu igamu na puku na tinoni vanga nauseko, amu seko pitsu nogo, me tabaru saikesa nimui sasaga. !Nimui sasi nogo ara raqa tsunagamu! Igamu amu sove tania na Taovia, aia na God tabu ni Israel, mamu piloligi tania. 5 ?Rongona gua ti igamu amu sove tania babâ moa? ?Laka amu ngaoa ke gadovigamu na kede loki seko goto bâ? Igamu na Israel, na lovamui ara viri bokaboka nogo, ma na kosumui ma na papadamui ara seko sui nogo. 6 E tû tana lovamui, me tsau tsuna tana perana tuamui, e tau goto mamanga sa tabana na konimui. E danga dato moa na tsomo, ma na vora, ma na boka. Mamu tau lelê malesigira se kamu porogira na bokamui. Me tagara goto sa sinagore kamu molo bâ i koniqira.
7 Igira gamui gala ara toroutsani poponoa nimui butona kao, mara tungigira sui nimui verabau. I matamui nogo igamu, igira na tinoni ni veratavosi ara laugira nimui kao, mara toroutsanigira nimui omea sui. 8 Maia lelê moa na Jerusalem e kauvisu, ma na gala ara totu polipolinogoa. Me tau lelê susuliga na isutuguna segeni. E maluku lê vaga moa na babale e totu malemale lê i liligina na sautu loki. 9 Me ti vaga na Taovia Susuliga Sosongo ke tau tamivanigira visana nida tinoni kara mauri, ma na Jerusalem ke toroutsa popono saikesa, vaga nogo kaira na Sodom ma na Gomora i sau.
10 Eo, igamu na tinoni lokiloki ma na toga ni Jerusalem, amu usuligira saikesa nogo na tinoni ni Sodom mi Gomora. Kamu rongomidoua na omea na Taovia e tsaria vanigamu. Kamu pukudougira na omea e sasaniginigamu nida God. 11 Aia e tsaria, “?Egua amu padâ igamu laka inau au reingaogira nimui kodoputsa sui girani amu tau kuti na savoriana vaniaqu inau? Au vatsa nogo inau na reiaqira nimui sipi igamu amu gini savori-kodoputsa, ma na seregana nimui omea tuavati uluvao laka. Mau qisi goto nogo na reiana na gabuna nimui buluka, ma nimui sipi, ma nimui naniqoti. 12 ?Masei nogo e nongigamu kamu adimai vaniau na omea sui girani kalina amu mai na samasama vaniaqu? ?Masei e nongigamu kamu mai kabakutu sagata vaga ia i laona niqu Vale Tabu? 13 Kamu laka goto na adimai vaniaqu nimui sausau. Au siginisavia inau na vuruna nimui bulunagai uruuru amu kodogira. Mau reisavigira nimui Dani Tabu na Vula Vaolu, ma nimui Dani na Sabat, me pipi nimui sai na lotu; rongona nimui sasi nogo igamu ara sekoliginia nimui lotu tana dani tabu gira. 14 Au tau saikesa reingaogira nimui Dani Tabu na Vula Vaolu ma nimui dani tabu sui, igira na kalagai mamava vaniau mau qisi nogo na kalagaiaqira.
15 “Mi kalina igamu kamu saukaegira na limamui tana nonginongi, minau sauba e utu kau rongomigamu. Me atsa moa ke oka koegua kamu nonginongi, minau e utu saikesa kau rongomigamu, rongona na limamui ara liasigabu popono. 16 Kamu malesi segenimui, ma kamu mololegira pipi sui nimui sasaga tabaru igira inau au morosigamu amu naugira. Eo, kamu mololea na nauana na omea seko, 17 ma kamu sasania na nauana na omea e gotolaka. Kamu reia ke laba na pedegoto tana nimui tinete, kamu sangagira igira ara bingi sekoligira, ma kamu isutuguqira na baka tinamate ma na daki tinamate.
18 “Bâ, mi kalina ia, e dou ti ka tinetea na omea iani. Atsa moa ti kara danga nimui sasi, vaga moa na polo sere e liasigabu, minau na Taovia au tsaria laka sauba kau vulimalegamu ma kamu sere maka vaga na snou. 19 Ti vaga igamu kamu rongomangaqu moa inau, me sauba kamu gini mage na ganiaqira na mutsa dou ara dato tana nimui kao. 20 Me ti vaga amu petsakoe mangaqu inau, me sauba nomoa kamu mate tana vailabu. Inau nogo na Taovia au tsaria na omea iani.”
Na Verabau Sasi Sosongo
21 Igoe na verabau ni Jerusalem, i sau igoe o totukakai i konina na Taovia, mi kalina ia nimu sasaga e vaga nina sasaga na daki rebi. I sau ara danga sosongo na tinoni e gotolaka niqira sasaga ara totu i laomu, mi kalina ia na tinoni vanga labumate moa ara danga i konimu. 22 Jerusalem, i sau igoe o angaanga vaga na siliva, mi kalina ia igoe o tau saikesa lia sa omea dou; i sau igoe o vaga na uaeni dou, mi kalina ia igoe o lia vaga moa ti na kô lê. 23 Igira nimu ida ara sove taniau inau, mara saidou kolugira na tinoni vanga komi. Igira ara tami sailagi na adi vangalaka ma na qolona na pede kesa tabana. Ara tau dona na isutuguqira na baka tinamate tana tinete, se kara rorongo kalina igira na daki tinamate ara tsarivanigira na omea ara gini rota.
24 Mi kalina ia, ko rongomia na omea na Taovia Susuliga Sosongo, aia niqira God susuliga igira na Israel, e tsaria: “Inau sauba kau tangotuguqu i konimu, igoe gaqu gala, me sauba ke utu vanigo goto ko molorota vaniau. 25 Inau nogo sauba kau rotasigo igoe, ti ke gini gotodoutugua nimu sasaga. Eo, sauba kau malesigo vaga moa kalina ara moloa na siliva i laona na lake romaroma gana na malesiligi taniana pipi na bauna. 26 Me sauba kau tusuvanigo na tinoni tagao dou ma na mane sauparovata vaga nogo ara totu i laomu i sau. Mi muri ti kara soaginigo, Na Verabau e Gotolaka Nina Sasaga me Totukakai Konina God.”
27 Mi tana rongona e gotolaka pipi nina pede na Taovia, ti aia sauba ke maurisitugua na Jerusalem, migira sui goto i laona igira ara padasavigira niqira sasi mara pilovisu i konina. 28 Maia sauba ke tsogori rapasigira igira sui ara sasi mara sove tania, me ke labumatesigira igira sui ara piloligi tania.
29 Me sauba ko gini padasavi loki rongona o ba samasama vanigira na gai, mo tsukagira na uta, mo balogira vania na god peropero. 30 Sauba ko ratsa vaga kesa na gai loki e varangi nogo ke mate, me vaga goto na uta e tau tsoni kona ke kesa. 31 Vaga moa na buruburu makede e dona ke lautsakua na iruna na lake, sauba kara vaga goto igira na tinoni susuliga sosongo, niqira sasaga tabaru segeni nogo sauba ke toroutsanigira, me ke tagara goto ke kesa tangomana ke sangagira.