13
Rurema agasivya abaleevi beꞌbibeesha
1 «Ku yikyo kyanya, ishyoko igatondeera ukuhinga, gira iyeruuse ibyaha bya beene Dahudi, neꞌbyaꞌbatuulaga beꞌYerusaleemu.»
2 Nahano woꞌbushobozi bwoshi, adetaga kwokuno: «Ku kirya kyanya, ngashaaza imigisi mu Bahisiraheeri. Kiri naꞌmaziina gaayo, gagayibagirwa lwoshi-lwoshi.
«Ngazimiiza abaleevi beꞌbibeesha, kiri neꞌmizimu íri mu bakoleesa. 3 Iri umundu angashubi tanga ubuleevi bweꞌbibeesha, emwe! Yishe bo na nyina boonyene, bagamúbwira: “Si ufitiirwi ukubeesha kwiꞌziina lya Nahano. Aahago! Ukufwa, ugaafwa!” Neꞌkyanya agaaba aki gweti agaadeta ubuleevi bweꞌbibeesha, lyo balya babusi boonyene, bagayami múyita neꞌngooti.
4 «Ku yikyo kyanya, umundu ukutanga ubuleevi bweꞌbibeesha, kugamúteeza ishoni. Batagaki yambala imirondo íyahangwa mu bwoya, mbu batebe abandu kwo balyagagi baleevi. 5 Si ngiisi muguma, agakizi deta, ti: “Niehe ndalyagagi muleevi, nanga! Si ndi mulimi naaho. Nyamiri ndi mulimi ukulyokera mu busore bwani!” 6 Neꞌri umundu angamúbuuzagya, ti: “Yizi nguma íziri mu boneka ku magala gaawe, ziri za bikagi?”, anashuvye, ti: “Nꞌgakomerekera imwa mwira wani!”»
Ibibuzi byashaabuka
7 Nahano woꞌbushobozi bwoshi, adeta kwokuno:
«E ngooti, uvyukage, gira uteere uwitu.
Ee ma! Uyitage umungere, halinde ibibuzi biyami shaabuka.
Kiri na naani, ngateera ibyanabuzi.* 13.7 Mataayo 26.31; Mariko 14.27.»
8 Nahano anashubi detaga kwokuno:
«Mu bandu ba mu kino kihugo, ibimaanye bibiri byaꞌkashatu, bigaminikwa.
Kihande kiguma naaho, kyo kigasigala mwo.
9 Yabo ábagaaba bakoli sigiiri, ngabaleeza mu muliro, halinde banayeruuke.
Ikyanya ngabayeruusa mu muliro, kugaaba nga kuyeruusa inooro neꞌharija.
Ikyanya bagaaba bakola beeru, bagandabaaza, naani na mbashuvye.
Ngaadeta, ti: “Bandu baani, yaba!”
Nabo, ti: “Nahano, ye Rurema witu!”»