1 Mwami Dahudi anahanuusa ngiisi birongoozi byaꞌbasirikaani baage kihumbi, kiri neꞌbyaꞌmagana. 2 Ha nyuma, anababwira: «Iri twangaba twayemerezania, neꞌri Rurema Nahamwitu angalooza, tulungike indumwa imwaꞌBahisiraheeri booshi ábali mu kihugo. Tulaalike abagingi, naꞌBalaawi ábali mu twaya twabo, na mu ndagiriro zaabo, gira bayije tukuumane. 3 Ha nyuma, tunagendi yabiira Akajumba keꞌKihango kya Rurema witu. Mukuba, mu butwali bwa mwami Sahuli, tutâli kizi kahanuusa.»

4 Ikyanya Dahudi akadeta kwokwo, balya bandu booshi banabona kwo buli bwija, banamúyemeerera. 5 Kwokwo, Dahudi anakuumania Abahisiraheeri booshi, ukulyokera ku lwiji Shihoori i Miisiri, halinde kwiꞌrembo lyeꞌHamaati mu kisaka, banagenda i Kiryati-Yariimu, gira bagendi yabiira yaꞌKajumba keꞌKihango.* 13.5 1 Samweri 7.1-2.

6 Uyo Dahudi anagenda naꞌBahisiraheeri booshi, halinde mu kaaya keꞌBaala (kuli kudeta: i Kiryati-Yariimu) mu kihugo kyeꞌBuyuda. Mukuba, bâli loziizi ukuleeta kalya Kajumba keꞌKihango. Kâli kizi buuzibwa kwiꞌziina lya Nahano Rurema, ulya úli mu beera ha kati ka bamakerubi.† 13.6 Kulyoka 25.22.

7 Kalya Kajumba banakahulusa mu nyumba ya Habinadabu, banakatereka kwiꞌgaare lihyahya. Yiryo igaare, Huza na Ahiyo bo bâli kizi lirongoora. 8 Dahudi naꞌBahisiraheeri booshi, banakizi tamba ku bushambaale bwingi, imbere lya Rurema. Bâli kizi yimba, iri banalasa inzeeze, neꞌbinanda, neꞌngoma, neꞌsembaale, neꞌbibuga.

9 Balya booshi, iri bakahika ha kiyeluuliro kyeꞌngano i Kidooni, bali naꞌKajumba ka Rurema, lyeryo ingaavu zanatindira. Kyanatuma Huza agayami golola ukuboko, gira akagwate. 10 Lyeryo, Nahano anarakarira Huza, bwo ahuma ku Kajumba, anayami múyita. Ee! Huza anayami lambuukira haaho imbere lya Rurema.

11 Iri Dahudi akabona kwokwo, anarakarira Nahano, bwo akayita Huza ku bute. Kyanatuma, yaho handu hagayinikwa iziina Kihano kya Huza, halinde zeene.

12 Ukulyokera ku lulya lusiku, Dahudi anayoboha Rurema, anadeta: «Kalya Kajumba keꞌKihango, kutagi kwo nangaki katwala imwani?» 13 Kwokwo, atanaki katwala mu Kaaya ka Dahudi.‡ 13.13 mu Kaaya ka Dahudi kuli kudeta i Yerusaleemu. Si anakasiga mu nyumba ya Hobedi-Hedoomu, Umugaati.

14 Yako Kajumba ka Rurema, kanahisa imyezi ishatu, kali haaho ha mwa Hobedi-Hedoomu. Iyo nyumba yage, Nahano anagigashaanira bweneene, kuguma neꞌbindu byage byoshi.§ 13.14 1 Kutondobola 26.4-5.