Радосаво Лав Лукастар
1
1-3 Пативало Феофило, бут мануша линэ тэ стидэн и тэ запистросарэн роспхэнимос пала кода, со сас. Када роспхэндэ амэнди мануша, савэ майанглал дикхэнас вся пэстирэ якхэнца тай ашыле бутярнэ Лавэстирэ. Важ кода мэ тховдэм андо води мишто вся тэ ужанав, со сас майанглал, и екх пала авэр тэ запистросарав тути. 4 Тунчи ту полэса: кода, со ту ашундян, исин чячимос.
Ангело пхэнэл Захариясти, со бэяндёла лэстэ шаво
5 Андэ деса, кала андэ Иудея сас тхагараса Иродо, сас мануш, савэс акхарэнас Захария, андай рашая Авиястирэ стидимастар, и лэстэ сас ромни андав родо Аароноско, акхарэнас ла Елизавета. 6 Онэ лэдуй сас жужэ англав Дэл, жувэнас пав всаворо запхэнимос Раеско бидошако. 7 Лэндэ на сас бэяцэн, колэстар со Елизавета сас бибэяцэндири, и онэ лэдуй сас андэ бэрша пхурэ.
8 Екхвар авиля вряма рашаенди лэстирэ стидимастар тэ терэл бути англав Дэл. 9 Сар сас прилито машкар рашая, онэ шутэ жребиё, и прижыляпэ Захариясти тэ зажал андо храмо лэ Раеско тэ пхабарэл ладано. 10 Андэ кодья ж вряма, кала вов пхабарэлас ладано, всаворэ мануша мангэнаспэ Дэвлэс аври. 11 Тунчи вов удикхля ангелос Раестирэс, саво тэрдёлас пай право риг лэ жэртвеникоско, кай пхаболас о ладано. 12 Захария сар удикхля лэс, бари дар авиля пэр лэстэ, и вов на жангля, со тэ терэл. 13 Ангело пхэндя лэсти:
— На дара, Захария! Ашундя о Дэл мангимос тиро. И ромни тири, Елизавета, бэянэла тути шаворэс, и акхарэса лэс Иоано. 14 Авэла тути баро радомос, и бут мануша авэна тэ радонпэ, кай вов бэяндиля. 15 Вов авэла баро англав Рай, на авэла тэ пэл ни мол, ни матимаско пимо и пхэрдёла Свэнто Духоса майанглал, сар вов бэяндёла. 16 Бутэн Израилёстирэ шавэн вов рисарэла палпалэ кав лэнго Рай о Дэл 17 и авэла тэ жал англав Лэстэ андо духо и зор Илиястири, кай тэ рисарэл и водя лэ дадэндирэ кай лэнди бэяцэ, и найкандунэн кав гындо чячимастирэн манушэн, кай тэ гытосарэ манушэн, кала авэла о Рай Дэл.
18 Захария пхэндя ангелости:
— Сар мэ ужанава када? Мэ пхуро, тай ромни мэрни найтэрни.
19 Ангело пхэндя лэсти:
— Мэ Гавриило, саво тэрдював англав Дэл, бишалдо тэ дав дума туса и тэ пхэнав тути кадва радосаво лав. 20 Акэ, ту авэса муто и на дэса дума кай кодва дес, кала када вся авэла, важ кода со ту на патяйлян мэрнэ лавэнди, савэ терэнапэ андэ пэсти вряма.
21 Андэ кадья вряма мануша ажутярэнас Захарияс и дивонаспэ, состар вов бут вряма на выжалас андав храмо. 22 Кала Захария выжыля котар, вов на дэлас дума, и мануша полинэ, со вов андо храмо варисо дикхля. Вов сикавэлас вастэнца лэнди и ашэласпэ муто.
23 А сар прожыле кола деса, кала вов терэлас рашаендири бути, тунчи рисайля пэстэ черэ. 24 Прожыля вряма, Елизавета, и ромни лэстири, ашыля пхари. Панч шон вой гарадёлас манушэндар и пхэнэлас:
25 — Акэ, со стердя манди Рай Дэл андэ кадэла деса, кала Вов обрисардя мандэ пэстирэ якха, кай тэ злэл пар мандэ о лажавимос мэрно англай мануша!
Лав, со бэяндёла Иоано
26 Кала Елизавета сас шов шон пхари, о Дэл бишалдя ангелос Гавриилос андо форо галилейско, саво акхарэлпэ Назарето, 27 кай щиёры, савя акхарэнас Мария. Вой дя лав тэ жал палав ром палав Иосифо, саво сас андав родо лэ Давидоско. 28 Ангело авиля латэ и пхэндя:
— Тэ авэс бахтали! Тути дяпэ мищимос! О Рай Дэл туса!
29 Мария на жангля, со тэ пхэнэл, и гындолас, важ со вов кади пхэндя. 30 Ангело пхэндя:
— На дара, Мария! Ту аракхлян мищимос кав Дэл! 31 Акэ, ту авэса пхари, и бэянэса Шавэс, и акхарэса Лэс Исусо. 32 Вов авэла баро, и Лэс акхарэна Шаво Майбарэско. Рай Дэл дэла Лэсти троно Давидоско, лэ прапапос Лэстирэс. 33 Вов по вако авэла Тхагараса англав родо Иаковоско, и тхагаримос Лэско никала на пэрэашэла тэ авэл.
34 Мария пхэндя ангелости:
— Сар када авэла? Мэ инке на сымас палав ром!
35 Ангело пхэндя лати:
— Свэнто Духо сжала пэр тутэ, и зор Майбарэско ушарэла тут, и свэнто Бэято, Саво тутэ бэяндёла, акхарэлапэ Шаво Дэвлэско. 36 Акэ Елизавета андав родо тиро, палай сави пхэнэнас, со латэ на авэна бэяцэ, подикх, вой шовто шон пхари. Андо пхуримос лако бэяндёла латэ шаво. 37 О Дэл терэла вся, со Вов закамэла.
38 Пхэндя Мария:
— Мэ бутярни Рае Дэвлэстири. Мэк авэла манди, сар ту пхэндян.
И ангело отжыля латар.
Мария авиля кай Елизавета
39 Андэ кадэла деса Мария вщиля и сыго жыля андо форо, саво сас андо плаенго тхан Иудеяко. 40 Вой зажыля андо чер кав Захария и пхэндя ла Елизаветати:
— Тэ авэс бахтали!
41 Кала Елизавета ашундя лава Мариятирэ, подхукля о бэято андэ Елизавета, и пхэрдиля вой Свэнто Духоса. 42 Вой зацыписайля фартэ гласоса и пхэндя:
— Тут авэна тэ лашарэн майбут аврэ жувляндар! И лашарэна тирэ Бэятос, Савэс ту пхиравэс! 43 Сости манди када, со мандэ авиля дэй мэрнэ Рае Дэвлэстири? 44 Кала мэ ашундэм, сар ту пхэндян манди, тэ авав бахтали, подхукля андэр мандэ о бэято радомостар. 45 Бахтали кодья, сави патяйля, со терэлапэ кода, со пхэндя лати Рай Дэл!
46 И пхэндя Мария:
— Лашарэл о води мэрно лэ Рае Дэвлэс.
47 И радосайля о духо мэрно палав Дэл,
Фэрисаримари мэрно.
48 Вов удикхля, со мэ цэкни бутярни Лэстири.
Акала вряматар всаворэ родоря
авэна тэ акхарэн ман бахталяса.
49 Со зорало Дэл тердя манди баро рындо,
и свэнто алав Лэско!
50 Тангимос Лэско андэ всаворэ родоря,
ко пативаса дарал Лэс.
51 Вов тердя барэ рындоря Пэстирэ зоралэ вастэса,
рострадя колэн, савэ пхутярдэ годяса и водеса,
52 Сшута раен пай лэндирэ троноря
и вазгля упрэ цэкнэн машкар мануша.
53 Бокхалэн пхэрдярдя мищимаса
и барвалэн отмэкля нисоса.
54-55 Вов сэрэсардя, со пхэнэлас лэ дадэнди,
лэ Авраамости и лэстирэ бэяцэнди,
тэ авэл тангимаско по вако,
и подритярдя Израилёс, Пэстирэс бутярнэс.
56 Мария сас лэ Елизаветаса варикай трин шон и рисайля андо пэско чер.
Сар бэяндиля Иоано
57 Кала авиля вряма, Елизавета бэяндя шаворэс. 58 Ашундэ мануша, савэ жувэнас паша лэндэ, и о родо лако, со дя Рай Дэл о тангимос Пэско лати, и радонаспэ ласа. 59 По охто дес онэ авиле тэ обшынэн лэ бэятос и камле тэ акхарэн лэс, сар акхарэн лэсти дадэс — Захария, 60 а лэстири дэй пхэндя:
— Нат, акхараса лэс Иоаноса.
61 И пхэндэ лати:
— Никас на сас андо родо тиро, савэс акхарэнас кадя.
62 И пушэнас, сикавэнас лэ вастэнца кав лэско дад, сар вов камэл тэ акхарэл лэ бэятос. 63 Захария мангля каштуни сандёры и пистросардя лэнди: «Алав лэско — Иоано». Всаворэ дивосайле.
64 Андэ кодья ж вряма отпхэрнэпэ лэстирэ ушта, и вов ля тэ дэл дума и тэ лашарэл Дэвлэс. 65 И сас дар пэ всаворэ, ко жувэлас паша лэндэ, и роспхэнэнас пала када пав всаворэ плаендирэ тхана Иудеятирэ. 66 Всаворэ, ко ашундя када, тховдэ андо води пэско и пхэнэнас:
— Каса авэла када бэято?
И о васт лэ Рае Дэвлэско сас лэса.
Захария пхэнэл лав Дэвлэстар
67 О Захария, дад лэско, пхэрдиля Свэнто Духоса и пхэндя лав Дэвлэстар:
68 — Бахтало исин Рай, Дэл Израилёско,
со авиля кай пэстирэ мануша и вытиндя лэн.
69 Бишалдя амэнди зоралэс Фэрисаримарес
андав чер и родо Давидоско, бутярнэс Пэстирэс,
70 сар бут бэрша палпалэ пхэндя
уштэнца свэнтонэ пророкэнца Пэстирэнца,
71 со фэрисарэла амэн лэ вражымарендар амарэндар
и вастэндар кодэлэндар, савэ амэн на камэн.
72 Вов тангосардя амарэ дадэн
и сэрэсардя Пэско свэнто завето,
73 сар Вов солахадя амарэ дадэсти Авраамости,
74 со Вов фэрисарэла амэн лэ вастэндар амарэ вражымарендар,
кай амэ бидарако тэ терас бути Лэсти,
75 тэ жувас англав Лэстэ свэнто и жужо всаворо пэско жувимос.
76 И тут, бэято, акхарэна пророкоса Майбарэстирэса,
колэсти со ту авэса тэ жас англав Рай Дэл,
кай тэ гытос о дром Лэсти,
77 тэ роспхэнэ Пэстирэ манушэнди,
со фэрисаримос дэлпэ,
кала авэна эртисардэ лэндирэ бэзэха.
78 Амаро Дэл камэл и тангол,
и Вов бишалэла амэнди дэнзорутно удуд упрал.
79 Вов дэла удуд колэнди, савэ жувэн андэ калимос,
и миримос пхирэл паша лэндэ,
и тэ тховэл пэрнэ амарэ по дром кав миро!
80 Бэято барёлас и терэласпэ майзор духоса, и жувэлас андэ мал жы кола вряматэ, кала сикавэла пэс манушэнди Израилёстирэнди.