10
Augwaligo biugel si te silvago nigali
1 Te Genuai Bidigo Mosesbolo te po walali, 2 “Megi dagego te kapa silva meba selama, hamago elama, te bu wabo nai biugel si nigiąo. Tama nago te biugel te nago te we bidi sisinagasomainu i wabo sogo me eliyu, me te painu doado bage sisi ebo sogo me eliyu yao. 3 Dagego te biugel si bobobage sogo elebo sogo da, teda te we bidi eno ugwa be sunumiba sisinagasomainao. 4 Ma, dagego biugel deli naga elebaso da, teda te tigidali hanigo tobolu bidi dabe naga aselama, nage dali sisinagasomainao. 5 Ma, dagego te biugel pęwadage sogo mu elebaso da, teda te giliga asobo badu bidalubo hani bage augwali hogodasa pomainao, te kem pesagede bidalubo bage bolo pomainao. 6 Tama dagego te biugel pęwadage sogo ma elebaso da, teda te saut badu bidibo bidi hani hogodasa pomainao. Dagego biugel dage te pesage nigilama bidibo pesage taga peyu painu da, dagego te biugel pęwadage sogo eliyu yao. 7 Tiali goli, dagego te we bidi deliba sisimainogo i weyu da, dagego te biugel bobobage sogo elao,” wali.
8 “Te Arongo ogwa dabe te pris bidi dabe augwaligo te biugel elebo sę emainao. Dage me, dagego hani nosali asobo bagego te bomai po wali bidada peyu yao. 9 Te boi bidi dabego dagego tǫba dage dali hwįainu asobaso da, teda dagego te biugel elama, bidi dabe hodolama, hwįgi pomainao, te boi bidi dabe dali. Dagego te tama tiyu da, teda ena God, dagego Genuai Bidi, eno dage homu koneama, tama te boi bidi dabe dolaibao, te augwaligo dage aiyaba elalugobeo. 10 Tama me ma, te lotu wabo genuai sogo me, te gesi noma poluade me, ma gasa lotu wabo genuai sogo me, te biugel eliyu yao. Dagego te biugel te isigo ulama, sese dela silibo ofa ulubode, me homu deliba yainu ebo ofa ebode, te biugel eliyu yao. Tama eno dage koneama, eno dage tau saibao. Ena God, dagego Genuai Bidi, eno polo wali.” Te po wai.
Te Israel dabe augwaligo Sainai bulu du taga pali
(Dąį 10:11–12:16)
11 Te namba 20 dei, te namba 2 poluade, namba 2 kibu bede te Israel dabe augwaligo Isip bulu taga solama nosali, te pǫgo Godigo name ugwa be tagalama pali. 12 Tama te Israel dabego sulama, te nai meni yai bulu Sainai taga peyu pali. Tama te pǫ pelama, te nai meni yai bulu Paranba doligi pelama, elaluali. 13 Genuai Bidigo Mosesbolo po hasia menama, tama Mosesgo Israel dabe hogodama pao po wali. Tama augwali hogodama pali.
14 Tama te Juda hani, me Isakar, me Sebulun hani, augwali bolo polasa pali. Augwali dwasianu hani pebeda selama, augwa plak ugwa nogo tolasa pepela yali. Tama te Nason, te Aminadapgo ogwa, te hani selade tobolu bidi nigasa, tama Juda hani polasa mu pali. 15 Tama Natanel, te Suargo ogwa, te Isakar hanigo tobolu bidi nigasa pali. 16 Tama te Eliap, te Helongo ogwago, te Sebulun hanigo tobolu bidi nigasa pali. 17 Te Gerson hani me, Merari hani me, Livaigo hani si, augwaligo te hani sela wali tama pali. Augwaligo name ugwa lotu be me, aga doado bage me, augwaligo selasa pali.
18 Te augwali nosali badu te Ruben hani we bidi, me Simeon hani, me Gat hani, augwali augwa hanide dwasianu pebedasa, augwa plak ugwa tolasa pepela yali. Tama te Sedeurgo ogwa Elisur te hani selago tobolu bidi bidali. 19 Tama te Surisadaigo ogwa, Selumiel, te Simeon hanigo tobolu bidi bidali. 20 Te Duelgo ogwa, Eliasap, te Gat hanigo tobolu bidi bidali. 21 Tama te Livai hanigo hani Kohat dabego te Tedali Gasagi Yai Be Habu doado bage dabe augwaligo tolasa, gasa hani meba wali tama pepela yali. Tama te Kohat dabe te gesi noma pesage nigibo madi saboligi peyu da, te hasia pali meba Livai hani dabe augwaligo Godigo name ugwa be polo sę eyu yai suali. Teda te Kohat dabe te tolali doado bage dabe te pris dabebolo menama, te pris dabego te doado bage dabe te ugwa be tomoba muyu yali.
22 Tama nosali te Efraim hani we bidi, me Manase hani we bidi, me Benjamin hani we bidi, augwali augwa dwasianu hani pebedasa pelama, augwa plak ugwa nogo tolasa pepela yali. Te hani selago tobolu bidi te Amihutgo ogwa, Elisama, bidali. 23 Te Pedasurgo ogwa, Gamaliel, te Manase hanigo tobolu bidi bidali. 24 Te Gideongo ogwa, Abidan, te Benjamin hanigo tobolu bidi bidali.
25 Tama nosali mu te Dan hani we bidi, me Aser hani we bidi, me Naptali hani, augwali augwa dwasianu hani pebedasa pelama, augwa plak ugwa tola sesa pelama, pebela yali. Tama te hani selago tobolu bidi te Amisadaigo ogwa, Ahieser, bidali. 26 Te Okrango ogwa, Pagiel, te Aser hanigo tobolu bidi bidali. 27 Te Enango ogwa, Ahira, te Naptali hanigo tobolu bidi bidali. 28 Te tigidali sogo te Israel dabego te pesage nigilama bidali te taga peyu da, augwali tama nanidu peyu yali.
29 Augwali painogo Mosesgo aga base Hobap, Jetrogo ogwa, Midian bulu bidibolo e tiwai po wali, “Megi da, da te Genuai Bidigo dabolo mawaibao wali te buluba hogodama paibao. Agai dabolo polo wai dao, da te bulude bugagia mu bidaibao po wai dao. Tama tibaso, eno homugo nage da dali aselama, tama dago wiegi yai nai hauwa nage dali dobolama saibao,” wali.
30 Tiali goli, Hobapgo te po wali, “Te usu dao, tiali goli, tagalao. Ena ena bulu muba ma paibao,” wali.
31 Tama Mosesgo te po wali, “Hobedeo, baseo, nago da taga pigio. Nago koneani, te menade te wiegi yai madi te pesage nigilama bidabo nago koneani, te moni nai meni yai bulude nago da ola mabo usu yaibao. 32 Ma, nage da dali asiyu da, teda Genuai Bidigo dabolo mani wiegi yai nai dabe nage dali dobola saibao,” wali.
Te we bidi hogodama pepela yali
33 Te we bidi augwaligo te Genuai Bidigo bulu du taga pali, te Sainai bulu du dao. Augwali sela sogo tama pali. Tama augwaligo Godigo Dąų Wali Bomai Po Munaluali Halobage bolo polasa sela pali, te bidabo pesage nigabo pesage gege peyu pali. 34 Te augwali pabo sogo da, teda te Genuai Bidigo pǫ augwali ugwadu elalubo dao. Te tigidali sogo giligade te pǫ me tama elalubo dao. 35 Augwaligo te kontrak halobage tolasa pabo sogo, te Mosesgo te po wabo dao, “Genuai Bidi, nage polasa pelama, nago boi bidi dabe dali hwįnama, augwali sela sągi pao. Tama te bidi dabego nage godolo ebo tagalai bage, augwali wi peyu emainao.” * Tib 68:1 36 Tama augwaligo te kontrak halobage toma tuyu tǫba mubo sogo, Mosesgo Genuai Bidibolo te po wabo dao, “Genuai Bidi, nage da tausen tausen Israel we bidi daba ma asao,” te po wabo dao.