2
1 Te Tigidali Bomo Elalubo Genuai Bidigo te pris dabeba te tiwai po wali, 2 “Eno dageba te bomo yai po me deli elalubao. Te dagego ebo sę tigidalide te eno nogi ugwaba siąo. Te dagego eno po odisąma, te dage hagoma naga ebaso da, teda eno po bomonama obaso, te dage dolaibao. Te duga sęde sabo te wiegi yai nai dabe te eno dolaibao. Te mu tama eno tiai dao, magi baso meni, dagego homude eno olo po te oba olama, te dagego eno po wali pabeo. Tialima eno dage dolai dao. 3 Te eno dagego wai dabeba dwai dene mayu, te eno dagego gesabidide te ofa ebo kibu dabego di pilaibao. Tama eno dage te kibu sibi dabe haliga sąbo pesageba sela sąwaibao. 4 Eno te tama tebode dagego koneagameo, eno te bomai po dageba mani homu yaibao. Dagego eno po wali pobaso da, teda eno dage te pris dabe dali dąų wali te bomai po, te Livai hani wąį nǫų dali yali po me bologobeo.” Te Tigidali Bomo Elalubo Genuai Bidigo te po wai dao. * Nam 3:11-13
5 “Eno te dąų wali bomai pode, eno te pris dabe hani tǫde sesabi elama bidimainu ilali, te augwaliba bugagia bidabo po mawai. Eno augwaliba tama tiali, te augwaligo ena nogi ugwaba somainu yalio. Hasia augwaligo ena nogi ugwaba siyu, te ena dologode bidali. * Nam 25:12 6 Augwaligo dolo yai kolesaga te we bidi ola mawai. Augwaligo te dwai kolesaga augwali me ola mabeo. Te augwali ena dali bugagia dugulaluali. Augwa te wiegi yai kolesaga wali peyu, te augwaligo gasa we bidi hauwa tau siyu, te augwa dwai kolesaga tudiba muai dao. 7 Te pris dabego sę dao, te we bidi dabego ena bugagia konemainu ola mabo sę yao. Te we bidi dabe augwaliba pelama, te eno homu bugagia konemainu yao, magi baso meni, te pris bidi dabego te Tigidali Bomo Elalubo Genuai Bidi eno po pusumainu ebo bidi dabe dao,” wali.
8 “Tiali goli dage pris dabego eno doloba pai sunumi tagalalio. Dagego te haniani skul wabogo te we bidi hauwa kekelama, te augwaligo dolo meni isąwai tobage kolesaga ebao. Mu tama, eno dage te Livai dabe dali dąų wali po te dagego bolali dao. 9 Dagego eno po wali pisąwai. Te eno po dagego te we bidiba ola mawainu ebo sogo, dagego te we bidi meba homu bega sabo po weyu, te meba wado po weyu, tama tebogo te po tų dolo bugagia dodolobo menio. Tama tibaso, eno digi te Israel dabego te dage hagela homu eyu, dage tudiba mumainu ilalio,” Genuai Bidigo te po weyu, tama Malakaigo pusali.
Te Israel dabego God tagalali
10 Da tigidaligo Aya te deli naga elalubao. Te God deli naga te agai da nigali. Tialima, magi baso dago te dena abagi dabe dali dąų wali po bolobo dawe? Tama magi baso dago te dena wąį nǫų dabe dali dąų wali kontrak po te dago wali pabewe? 11 Polobadu te Juda dabe me Israelgo te Godiba po dąų weyu, te augwaligo agai po wali paibao po wali. Tiali goli, augwaligo te dąų wali po bolalio, tama augwa te dwai sę mu me deli yalio. Te bidi dabego te tibo godiba lotu wabo gasa hani we dabe salio. Tama te tiali kolesagade augwaligo te Genuai Bidigo be meda mu ilalio. 12 Te Genuai Bidigo te kolesaga ebo bidi dabe te sela sąyu, te da Israel hani tomode bidimainu me elamuo wali. Tama tiyu, augwaligo te Tigidali Bomo Elalubo Genuai Bidiba te ofa sela pigio wai dao. 13 Tama eno dagebolo te dagego gasa dwai sę me ebo po obao. Genuai Bidigo te dagego agaba sela pabo ofa umabo hagela eyu, te me sogobeo wali. Tama tibaso, dagego gela weyu, te i dwai weyu, te gela kugai ąį te Genuai Bidigo alta daiba gealubo dao wali. 14 Tama nosali dagego te Godiba hanalu, te tiwai po wali, “Magi baso nago dago ofa sabo meniwe?” E tiwai ebao. Genuai Bidigo koneani, dagego te duga ogwa bidide sali we dabe sela sąwanigo te duga dąų wali bomai po bolalio. Te we dabe duga hai namu dao, tama duga te God gedude po dąų weyu, te dagego augwali munu me tagalogobeo wai. Tiali goli, dagego te bomai po bolali dao, wali. 15 Godigo te dage bidi me we deliba selama bidimainu eyu, te homu kolesaga tigi deli mu pedalumainu ilali. Godigo te sę yali kolesaga page magi baso yaliwe? E tiwai yai. Te dago wai ame nenama, tama augwa te Godigo hani mu pedalumainu yalio. Tialima te dage bugagia dua dao, te dage we de bidi si deliba daganani sogo te dąų walali po te dagego me bolamu dao, wai. 16 God, da Israel Genuai Bidigo, agai te po wai, “Eno homugo te wego bidi tagalama penani eyu, bidigo we tagalama penani eyu ebo kolesaga, te eno hagela homu mu ebo dao,” wali. “Eno homugo dage me deligo te tobage dwai kolesaga mu te aga wede ebo te eno hagela ebo. Te dage dua dao, te dagego duga we dabe dali bugagia bidainu dąų wali po te me bologio,” God Genuai Bidigo te po wai dao.
Genuai Bidigo bodolu si te pąde dao
17 Dagego te haniani po hauwa obaso, tama Genuai Bidi te pode hagela yalio. Tiali goli, dagego te tiwai po hanalu wali, “Dago mena po obaso, te Genuai Bidigo dade hagela homu ebowe?” Dagego te tiwai po obao, “Genuai Bidigo homude te dwai sę ebo bidi te augwali wiegi yai bidi dabe da waibao, po meni, te agai augwali godolo eba homu yali.” Tama dagego e tiwai po weyu yali, “Augwa te po weyu, Godigo te doloba pai kolesaga ebo dao wali. Tiali goli, dago aga te dwai kolesaga ebo bagede te tama tebo subeo,” wali. Tama tibaso, agai dagego te wabo pode hagela homu mu ebo dao po walio.