1 Genuai Bidigo po Jeremaiabolo mawai, te agai Isipde bidibo Juda dabeba pusumainogo yai. Augwali te taun Mikdol, me Tapanes, me Memfis, tede bidali, te saut Isip badu me bidai. Jeremaiago te tiwai po wai, 2 “Tigidali Bomo Elalubo Genuai Bidi, aga da Israelgo God, agai te tiwai po wali, ‘Duga digi te tigidali dene mabo sę ena Genuai Bidigo te Jerusalemba me te tigidali Juda taunba yali sę suai dao. Megi augwali dolama elalubao, tede bidi me bidibe dao. 3 Eno augwali dolali, magi baso meni, te Juda dabego dwai kolesaga hauwa yali, te tama tialigo te eno augwaliba haliga sębę yabo sę ilali. Augwaligo te gasa godiba lotu weyu, te augwaliba wiegi yai denami ilibo hano ebo ofa yali. Augwaligo te god dabe polobadu me konesiąwai. Te dage ede bidibo Juda dabe, te dagego wąį nǫų dabego me te god dabe polobadu me konebeo. 4 Hauwa sogo eno ena sę bidi dabe, te profet dabe, te dage Juda dabeba tagala palai. Te augwaligo eno po e tiwai pusali, “Dagego eno homu godolo isąbo te kugumini yai kolesaga dabe igimio,” wali. 5 Tialima, te Juda dabego te poba olo musiąma, te augwaligo wali me pabeo. Te augwa dwai kolesaga ebo me tagalisąma, te augwa tibo godiba lotu wabo me tagalobeo. 6 Te eno haliga sębę umabo mu augwalide elama, te eno Juda taun dabeba, me Jerusalem sunumi dabeba me dolobo sę eyu, te augwali eno dwagila mu dolali. Te augwali doludubadi geąį dao,’ da Israelgo Godigo te po wai,” Jeremaiago te po wali.

7 “ ‘Tialima, ena God, Tigidali Bomo Elalubo Genuai Bidi, ena Israelgo God dao, megi eno te tiwai po obao. Magi baso dagego te duga digi dolabo homu ebawe? Te kolesaga dagego ebaso da, teda dage Juda bidi, me we, me wai puluba dolama, te dage deli me bidigobeo. 8 Dage Isipba bidagaselama, dagego te tibo god dabegopiksa nigilama, te wiegi yai denami ebo ofa te god dabebaebo dao. Dagego te tebo kolesagade ena haliga sębę dwaimu ilibao. Tibaso, te dage dolaibao. Te gasa tǫ kantribulu we bidi dabego dageba dwai posobo po waibao. Te augwa boi bidi dabeba dwai po wabo sogo da, tedaaugwaligo te po waibao, ‘Dage te Juda dabe dolali tiwaigilama yagameo,’ te po waibao. 9 Te duga wąį nǫųdabego me, te king dabego me, te kingo we dabego medwai kolesaga yali. Te dage me, duga we dabe dali, tedwai kolesaga ebao. Dage tigidaligo te kolesaga te Judatǫ pedai tigidali badu eyu, te Jerusalem sunumi dabedeme yali. Dagego te homu kone gegeda palai da, agawe? 10 Megiba usu nagasu, te duga ebo dwai kolesagadehale elama, te dage ena dologoba me asobeo, te dagegoeno bomo yai po, me eno po te dagebolo me duga wąįnǫų dabebolo mani po, te wali me pabe dao,’ Godigote po wai,” wali.

11 “ ‘Tibaso ena, Tigidali Bomo Elalubo Genuai Bidi, ena Israelgo God, eno te po obao, eno dage Judadabeba boi bidi homu elama, dage dolabo homu elalubao. Te dage deli me bidigobeo. 12 Eno dage te Isipbabidagasainogo bomo yali dwasianu Juda hani te musilaibao. Te dage te Isipde bidibo sogo, dage isaibao. Teboi bidi dabego dage ela munama isibadi, te nai sǫą peyu, nasigo isibadi yaibao. Dage tigidali isaibao, te gegunaibidi dabe me, olo bidi dabe dali isaibao. Te gasa bulu webidi dabego eno dagede te yali sę po odama, te augwaliwi mu elama, midigi saibao. Te dage dolama, posobo powaibao. Te augwa boi bidi dabeba posobo po wabosogo da, augwa te tiwai po waibao, “Dage te Judadabe dolali tiwai gilama yagameo,” waibao. 13 Enodagebolo dene mabo sę te Jerusalem dali yali sę tiwaiyaibao. Te dage boi bidigo ela muyu, te dage nai sǫąpelama isibadi, te dwai gasi selama, isibadi yaibao. 14 Dage megi Isipde bidibo dwasianu Juda hani, dagego te Juda tǫba ma pabo homu godolo ebao. Tiali goli, te dageme deli te dolabo sęgo geda munama, te duga tǫba mepogobeo. Dage tigidali dolaibao, te deli deli bidi naga wipeyu, ma paibao,’ Genuai Bidigo te po wali.” Jeremaiagote Isip tǫde bidali Juda dabebolo te po pusali.

15 Genuai Juda hani sisinagasai elalubadi, tama Jeremaiago te po pusali. Te tigidali Juda te Isip saut badu bidibo Juda dabe, augwali me bidali. Te sisinibo madi asali bidi tigidaligo, augwa te tama koneani, augwa we dabego te wiegi yai denami ebo ofa te gasa god dabeba ebo da homu yali. Tialima, te bidi dabe augwa we dabe daligo Jeremaiago po wei ponama, te tama po wali, 16 “Nago te Genuai Bidigo nogide dabolo po pusali. Tiali goli, dago te po me odogobeo. Menio. 17 Dago te dena yaibao olama, po dąų wali sę tigidali yaibao. Dago te wiegi yai denami ebo ofa te god weba idu geaibao, augwa te tama nogi yali, Te Dagalude Kwin We dao wali. Te dago agaba te wain ofa gelidu geaibao. Polobadu dena digi me, dago wąį me, king dabego me, te tobolu bidigo me, dago te tobage ofa Te Dagalu Kwin Weba yali. Dago te ofa te Juda taunde, me Jerusalem sunumi dabede yalio. Te dago tama tiali sogo, te dago nai hauwa elalu, te da bugagia bidiyu, te dwai me deli dabolo me pedalubeo,” te po wali. 18 “Te dago Dagalu Kwin Weba ofa ebo tagalali tede gagalasa, te megi sogoba usu nagasu, te da tigidali nai mu sǫą pelama, te boi bidi dabego da ela muyu, te nai sǫą pelama, nasigo isiyu ebo dao,” Juda dabego te po walio. 19 Te we dabe sibigo po wadolama weyu, te po wali, “Dago te Dagalu Kwin Weba ofa ebo sogo, te dago bisketgo aga piksa tiwai nigali, dago te wain ofa agaba gelali, te dena bidi dabego te dago te kolesaga ebo koneani. Nago te konebe, agawe?” Te we dabe sibigo te po wali.

20 Jeremaiago te po odama, tama agai te we bidi tigidaliba te tiwai po wei ponani, 21 “Te dage, me duga wąį nǫų dabe, me king dabe, me tobolu bidi dabe, te Juda tǫde tigidali we bidi te Juda taun dabede bidali, me Jerusalem sunumi dabede bidali, te wiegi yai denami ebo ofa yali, te Genuai Bidigo dagego te yali kolesagade homu kone isąwai da, agawe? Menio. Agai bugagia homu kone palai dao. 22 Dagego te dwai kugumini yai kolesaga ebaso, tama nosali Genuai Bidi dagego te kolesagade hagela mu yai. Tama agai te tama sę elama, te dagego tǫ dolama olo elalubadi, te bidi bidisiąbadi, te megi e sogoba usu nagasobao. Te gasa tǫ kantri we bidi dabego te augwa boi bidi dabeba dwai po wabo sogo, augwa te tiwai po waibao, ‘Dage te Juda tǫ dolali tiwai gilama dolagameo,’ wabo dao. 23 Dagego te tibo godiba te wiegi yai denami ebo hanoilibo ofa mobaso, te dagego Genuai Bidi gedude sęgęsobao. Te dagego agai bomai po sela sąnama, te agaite tobage bomai po dabe wali me pabeo. Tama tibaso, dageba te dwai sę pedalumainu elama, te megi tama meelalubo dao,” Jeremaiago wali.

24 Tialima, Jeremaiago po meba te tigidali Judabolo pusali. Agai po te we dabeba kisilama wainogo, te tiwai po wali, “Dage Isipde bidalubo tigidali Judago, te Genuai Bidigo poba bugagia olo muao. 25 Tigidali Bomo Elalubo Genuai Bidi, aga da Israelgo God dao, agai te po wali, ‘Te dage bidi dabe te duga we dabe daligo te dagego dąų wali po usu nainogo ebao. Dage te tama po dąų wali, “Dago te wiegi yai denami ebo ofa eyu, te wain gelibo ofa te Dagalu Kwin Weba yabo po dąų wali, mu tama dago te dąų wali po usu naibao.” Tialima, tegoba, dagego te po dąų weyu, te yaibao wali sę dagego iyąo,’ Genuai Bidigo dagebolo te po wali,” Jeremaiago wali.

26 “Te Genuai Bidigo te me me wali, ‘Tialima, dage te Isipde bidalubo tigidali Judago, dagego Genuai Bidi eno poba bugagia olo muao. Eno mu po ena genuai nogide obao, te dage Isipde bidibo Juda dabe me deligo eno nogide bomai po dąų obaso, usu egobeo. Te dagego te tiwai po munu ma wagobeo, “Te sesemane sogo bidibo Genuai Bidi Godigo nogide mu dao,” munu me wagobeo. 27 Ena Genuai Bidi, eno po dolo obao, eno dage bugagia wiegi yai me iligobeo. Menio. Eno dage dolainogo tonalubao. Te eno boi bidi tagala palama, te dage Isipde bidibo Juda dabe ela muagasaibao. Te dage nai menia siyu, isaibao. Te dage tigidali mu silaibao. 28 Dage bidi deli deli naga te hwįbode me dologobeo, te augwa Isip tagalama, te Juda tǫba ma paibao. Te sogo dage Isipba bidagasali dwasianu Juda hani dabe, te dagego te dego pogo bomo mu elalubo koneaibao, eno pogo, ma dagego po, te sogo koneaibao.’ God Genuai Bidigo te po wai,” wali.

29 “ ‘Ena Genuai Bidi, eno po dolo obao, te eno dagebolo te nai me delide te tiwai ola mawaibao, te eno dene mabo sę dage te bulude bidibo sogo yaibao. Te sę ebo dagego suyu da, teda duga koneaibao, eno me geda mugobeo. Menio. Te eno po wali gilama, eno te dene mabo sę dageba yaibao. 30 Te sę te ena Genuai Bidi, eno yabo homu ebao, te e tiwai dao. Eno te Isip king Hofra te aga ela muabo boi bidigo nogoba mawaibao, te eno Juda king Sedekaiade yali tobage kolesaga tiwai yaibao. Te Babilon king Nebukatnesargo te Sedekaiade boi bidi elama, ela muainogo ebaso, te eno Nebukatnesar aga nogoba muai dao.’ Te po da, te Genuai Bidigo po dao,” Jeremaiago te po wali. * Te aga Isip tǫ kantride bidali sogo, Jeremaia agai po pususu asali, te buku Jer Dąį 44 teba silagasai. Te sogo Jeremaia monu dabe yalio, tama te kolesaga koneai bidi dabego te homu yai, Jeremaia te tǫ kantri Isipde bididubadi, te aga isibo sogoba usu nai da homu yai dao. * 2 Kin 25:1-7