48
Bidi dabego God deliba naga genuai nogi maiąo po wali
1 Dage Jekopgo hani dabe, dage we bidi nogi
Israel elalubao,
dage te Judago bulai wąįgo wai dabe, dagego odao.
Dagego po dąų waliyu, nogo guni sisu muyu,
dagego te Genuai Bidigo nogide
mu po dao po wabo dao.
Tama dagego te tiwai po weyu,
dagego te Israelgo Godiba lotu obao po wali,
tiali goli dagego aga dologoba mu pelama,
te doloba pai me ebeo wali.
2 Tama duga digi duga nogi ugwaba siyu, te po weyu,
dage te God aga digi sa muyu, aga da wali,
te taungo hani we bidi da, po wabo dao.
Tama dage te Israelgo Godide
tau mabo sainu tonalubo dao.
Aga nogi da, te Tigidali Bomo Elalubo Genuai Bidi dao.
3 Agai e tiwai po dage dali elalubao wali,
“Polobadu mu eno te po dageba pusuyu,
te nai dabe pedelaibao po wali,
tama eno polo naga tama te sę dabe
pedalumainu ilali.
4 Magi baso meni. Eno te tiwai bugagia koneani,
dagego tobolu te masigi me ain dila pai tiwai elalu,
tama dagego eno po wali me pisąwai dao.
5 Tama tialima, polobadu mu eno te dageba pedelabo
nai po hanilama pusali, tiyu dagego te po waidali,
te dagego tibo god dabego,
te piksa dabe dagego te nigo me aingo nigibo nai
dabego te nai dabe pedalumainu yali da po waidali,”
te po wai.
6 “Te nai dabe te eno polobadu te pedelaibao po wali,
te augwali pedalubo dagego sualio.
Te megi dagego te tama po waiyąo, ‘Genuai Bidigo mu
po wabo da po wao.’
Tialima, megi te eno dageba te gesi noma nai pedelali
po obao,
te geme dualaluali nai dabe,
te nai po eno polobadu me wabeo.
7 Megi eno te po obaso,
te gesi noma nai mu pedelaibao,
te polobadu me pedalisiąwai nai dabe.
Tama te nai te dagego munu me konesiąwai,
tama dagego te tama po me wasiąma,
dagego te nai dabe koneai da po me wagobeo.
8 Eno te tama koneani, te eno gagalama,
dage te deli hani we bidi pedalumainu ilali sogo,
dage te po sela sąyu,
hagoma ebo hani mu pedelali.
Tama tibaso, eno te nai dabe po
dageba hanilama, me pusubeo.”
9 “Eno dageba haliga sębę mu elama,
eno dage silabo homu yali,
tiali goli sesemane sogo eno
ena genuai nogiba homu kone palama,
te eno haliga sębę homu aiyaba
tamugulali, te we bidi dabego
eno nogi ugwaba somainu tiai dao.
10 Eno dage wiegi yai pedalumainu homu yali,
tialima eno dage te siaba me ulusiąma,
te bidi dabego silvade ebo tiwai eyu,
te aga meda yali sela sąwainu ebo tiwai ebeo.
Menio.
Eno dageba te haniani sęgę pedalumainu ilali, te
dagego dwai kolesaga ebo tagalomainu yai dao.
11 Eno ena genuai nogiba homu kone palama,
eno te kolesaga dageba yalio.
Eno homugo te bidi dabego eno nogi elaluama,
begela dolidali homu elama,
te gasaba genuai nogi me magobeo. Menio.
Augwaligo te ena deliba naga genuai nogi momainogo
ebo dao,” te po wali.
Genuai Bidigo naga te Sairus sa munama, te agai te boi bidi aiyaba elalumainu ilali
12 Genuai Bidigo te tiwai po wai,
“Dage Israel, eno i wali we bidi dabe,
dage Jekopgo hani dabe, dagego eno po odiąo.
Enaduba deli naga God dao.
Ena polasa mu bidai, te nosali ena sabi badu
nosali mu elalueibao. * Ais 44:6; Ped 1:17; 22:13
13 Te ena nogogo digi eno nigilama,
te tǫ page eno dąų walali,
te eno dolo nogogo te dagalu diniginama, elalubao.
Eno te dagalu de tǫ si i wabo sogo,
te polo tama augwali si aselama,
te eno geduba dolagasobo dao,” wali.
14 “Dage tigidali, dage sisinagaselama, eno po odao.
Te tibo god me deligo dageba
te tiwai po me pusai menio,
‘Te Genuai Bidigo godolo homu mu ebo bidi te aselama,
te Genuai Bidigo sę yagasu, te Babilonba hwįaibao.
Te aga bomogo digi, Genuai Bidigo
te Babilon dabe aiyaba elaluaibao,’
te tibo god me deligo te po wabe.
15 Menio. Ena deligo naga eno dageba weyu,
te bidi asaibao po wali.
Ena digi eno aga asao olama, i wali.
Te eno aga odasa aselama,
te agai te boi bidi dabe aiyaba elalumainogo yai
dao,” wali.
16 “Megi da, dage ena pąba aselama, eno po odiąo.
Polobadu digi gagalasa asali, megi sogoba usu nagasu,
ena te sesąwai pesagede geme dualalu,
augwaliba te nai pedelaibao po pusubeo. Menio.
Te sę dabe pedalisiąbadi, eno te tonalu,
te sę mena tama pedelabo te eno digi dodolobo sę
yali,” te po wali.
God Genuai Bidigo aga bomo yai mobo bidi dali ena
Genuai Bidigo aga we bidi dabe bugagia wiegi yai ilabo sisilama elaluali
17 Genuai Bidi, aga te Israelgo Wiegi Yai Doloba Pai
Kolesaga Mu Ebo God,
aga te dage tudibadu posolalu, te dage tau sabo bidi,
agai te tiwai po wali,
“Ena Genuai Bidi, te duga God dao.
Sesemane sogo eno te doloba pai kolesaga dagego wali
peyu,
dage bugagia bidimai hagede ola mabo dao.
18 Te dagego eno po odigi sogo da,
teda dage bugagia megi bidiyu,
te sesemane sogo dagego bidabo ula te wiegi yai
pemene ebo pągąnalugi da,
te ąį sesemane sogo sodu, te sula sisąbo tiwai igi da.
Te dagego doloba pai kolesaga te bomo elama,
sesemane sogo pedaludu, te tamu ąį
nambisde peda pabo tiwai igi da.
19 Te dagego wai dabe te hauwa mu,
te nambis ąį masigi kemi sane tiwai pedeligi da.
Te eno augwali bugagia tonalu,
te augwa nogi te e tǫde mu sia sigi menigi da.,” te
po wali.
20 Dagego te tǫ kantri Babilon tagalama,
tama te bulu we bidi dabede wi soao.
Te duga pemene elama, genuai po dągą weyu,
te tigidali tǫ habuba po tagala palu, te tiwai po wao,
“Genuai Bidigo te aga sę bidi Israel ma dobola salio,”
po wao. * Ped 18:4
21 Polobadu, Genuai Bidigo aga we bidi dabe te bulu
tǫ wa pai pesageba odasa pali,
tiali goli augwali wę nogonego me isibeo.
Menio.
Agai te masigide ąį pedalumainogo ilali.
Agai te masigi dalama,
te ąį buluba asobode te augwa tuali.
22 Genuai Bidigo te tiwai po wali,
“Te dwai kolesaga ebo we bidi dabe,
te augwa bugagia wiegi yai bidabo sogo me
gegegobeo,” te po wai dao. * Ais 57:21