1 Genuai Bidigo enabolo te po pusao po walali, 2 “Dage Israelgo godolo ebo po begelama wabo po me deli e tiwai da, ‘Te aya idago te tau isąwai ni wain du tubo da. Tiali goli, te augwaligo wai dabego pedauwalide ha ebo da.’ Magi baso dagego te tobage po wabo dawe? * Jer 31:29 3 Ena God Genuai Bidi, ena sesemane sogo bidaibao, eno mu po dagebolo obao, eno dagego te wabo po mu tagalabo sę ilaibao,” wali. 4 “Te aya idago bidibo ula tigidali, me te wai dabego bidibo ula eno nogode naga elalubao. Tama tibaso, te bidi deligo te sęgę sabo dwai sę ebaso, te bidi naga isaibao,” te po wai.

5 “Te wiegi yai bidi me deli elalu, te aga kolesaga doloba pai mu elalubaso da, teda te bidi bugagia mu bidaibao. 6 Te tobage bidigo te Israel dabego tibo god dabeba lotu me wasiąma, tama agai augwaligo te tibo godiba ofa tiwai elama mabo nai dabe me tugobeo. Tama agai te gasa bidigo we penani me isiąma, tama agai te we poluago elali gasi ebo sogo te we dali me pigobeo. 7 Agai gasa bidi dabeba dwai sę ilama, te augwaligo nai dabe wi sabeo. Te gasa bidi dabego agaba negeli ilama, te agai we ponabo usu nama augwaligo mani nai, agai te nai dabe tolalubo sę mu egobeo. Menio. Agai te agaba negeli ilali bidi dabeba ma mabo dao. Agai te nasi ebo bidi dabe nai mayu, te ugwa meni yani bidi dabeba te ugwa mabo dao. 8 Te abagi me delibolo agai negeli ilibo sogo, te negeli wei ponobaso da, teda agai te gasa ugadu daganobo mone dali me sogobeo. Te agai po tų odobo sogo, agai doloba pai kolesaga naga eyu, tama agai te po tųba asali bidi dabe dali po bugagia dodolobo dao. 9 Tama agai te eno po tigidali bugagia wali pelama, te eno bomai po me wali peyu, te doloba pai kolesaga naga yaibao. Te tobage bidi te doloba pai bidi da, tialima mu tama, aga bugagia bidaibao. Ena God Genuai Bidi, eno tama po obao,” walio. * Prs 18:5

10-11 “Tama te tiwai bidigo ogwa me deli elalu, te ogwa genuai pedelama, te agai nai wi dabe siyu, te bidi dabe ela muyu, ma tobage dwai kolesaga me deli te aga ayago isąwani sę me ebaso da, teda aga isimainao. Te ogwago te augwaligo tibo god dabeba ofa yali nai dabe tubo dao, te agai gasa bidi dabego we dabe penani ebo dao. 12 Agai te magi nai doado bage meni yai bidi dabeba dwai dwai sę eyu, te agai nai wi siyu, tama te gasa bidi dabego agabolo mani nai dabe dąų olama tolalu, te augwaligo mani negeli ponabo dąįba usu nubo tiwai yali. Tama agai te tibo god dabeba lotu weyu, tama te lotu wabo pesagede te tobage dwai kolesaga dabe mu eyu ebo dao. 13 Tama aga abagi dabego te negeli wei ponobo sogo, agai te gasa ugadu daganobo mone dali sabo dao. Te tobage bidi da, te bugagia bidaibao homu eba, agawe? Mu menio. Agai te yali kolesaga dabe eno godolo homu mu isąbaso, te aga isimainao,” wali. “Te aga yali kolesaga pagede te aga isaibao po wai dao,” wali.

14 “Tama te tomo bidigo te ogwa me deli ame nani, te wai genuai pedelama, te aga ayago yali dwai kolesaga tigidali suali goli, aga ogwago te kolesaga wali pisąbaso da, teda aga bugagia bidaibao. 15 Te tobage bidigo te Israel dabego tibo god dabeba lotu wagobeo, tama agai augwaligo te tibo god dabeba ofa yali nai dabe me tugobeo. Agai te gasa bidi dabego we dali penani me isąma, 16 te gasa bidi dabe dolobo sę isąyu, te gasa bidi dabego nai dabe wi siyu me ebo meni. Agai te bidi dabego wei ponabo usu nama nai deli me sabeo. Agai te nasi ebo bidi dabe nai mayu, te ugwa dabe meni yani bidi dabe te ugwa dabe mayu ebo dao,” wali. 17 “Agai te magi nai meni yai bidi dabe dolobo sę me isąyu, tama agai te abagi dabede te wei ponobo mone gasa dali ugadu daganama me sabo menio. Agai eno tigidali bomai po, me eno gasa po dali wali pobaso, te tobage bidi te bugagia bidaibao. Mu tama, aga ayago te dwai sę hauwa yali, tiali goli wai da, te ayago yali dwai sęgęde me isigobeo. 18 Aga ayago te gasa we bidi dabeba dwai sę eyu, te anoma bomonama eyu, te augwaligo nai siyu, te tobage dwai kolesaga dabe yali. Tialima, aya aga yali sę dagede te aga isimainao,” wali.

19 “Tiali goli, dage Israelgo enabolo te tama po hanalu wali, ‘Magi baso ogwago te aga ayago sęgę tolabo usu egobe da po obawe?’ Tialima, eno dagego po te tiwai wei ponobao. Te ogwago doloba pai kolesaga eyu, te eno bomai po tigidali wali pobaso da, teda aga bugagia bidaibao. 20 Te sęgę sali bidi, te aga naga isaibao. Te ayago sęgę sai baso da, teda te ogwago mena dwai sę me isąwani, tama agai te ayago yali sęgę tolabo usu munu me egobeo. Te ogwago dwai sę ebaso da, teda ayago te magi dwai sę me isąbaso, te ogwago sęgę agai me tologobeo. Doloba pai bidigo te aga yali doloba pai kolesagade te wiegi yai mone sabo tiwai eyu, te dwai sę ebo bidigo te aga yali dwai kolesagade sęgę tolobo dao,” wali. * Bom 24:16

21 “Tiali goli, te dwai bidi me deligo aga dwai sę yali tagalama, te agai eno bomai po wali peyu, te doloba pai kolesaga naga ebaso da, teda mu tama, aga tede me isigobeo. Menio. Aga bugagia bidaibao. 22 Te agai polobadu yali dwai sę eno homu kone ma palogobeo. Megi da, agai doloba pai kolesaga ebaso, te aga bugagia bidaibao. 23 Ena God Genuai Bidi, eno dageba hanalu wabo homu yali, te dwai bidi me deli isibo sogo eno homu pemene eba homu dagego eba, agawe? Mu menio. Te bidi me deligo aga dwai sę ebo tagalama, bugagia bidibaso, tede eno wiegi yai pemene yaibao,” wali.

24 “Tiali goli, te doloba pai bidi me deligo te doloba pai kolesaga tagalama, te tobage eno godolo menisąbo dwai dwai kolesaga eyu, te dwai bidi dabego ebo kolesaga tiwai ebaso da, teda aga bugagia bidaiba homu ebo da, agawe? Mu menio. Te eno agai wiegi yai kolesaga yalide homu kone munu ma palogobeo. Agai te enaba homugo kęą pai kolesaga togolama, tama ena tudiba munama, te dwai sę yali, tibaso te aga isimainao,” wai dao. 25 “Tiali goli, dagego te tama po obao, ‘Genuai Bidigo ebo te kolesaga, te dolo menio,’ wali. Tialima, dage Israelgo, eno po wabo bugagia odao. Dagego homude eno kolesaga te dolo meni da homu eba, agawe? Menio. Te dagego ebo kolesaga da, te dolo me ebe dao. 26 Te doloba pai bidigo te doloba pai kolesaga yali tagalama, te dwai kolesaga ebaso da, teda aga te yali dwai kolesaga pagede te aga isabo elalubao. 27 Ma, te dwai sę yali bidi aga te yali dwai kolesaga tagalu, te doloba pai kolesaga ebaso da, teda aga me isigobeo. Menio. Te aga bugagia bidaibao. 28 Agai koneanio, te agai kolesaga wiegi yai isąbaso, tibaso aga te dwai kolesaga tagalama, te wiegi yai kolesaga wali pali. Tiali da, te aga me isigobeo. Menio. Aga bugagia bidaibao. 29 Tiali goli, eno te kolesaga wali pobaso, te dage Israelgo te po obao, eno kolesaga dolo meni po wali. Dagego eno kolesaga dolo meni da homu eba, agawe? Menio. Dagego kolesaga naga te dolo ebe dao,” wali.

30 “Megi da, ena God Genuai Bidi, eno dage Israelde po elalubao. Te eno dage po tų ilibo sogo te dage deli deligo kolesaga eno dagalaibao. Tama tibaso, dage homu begelama, ge neyu, dagego te ebo dwai kolesaga tigidali tagalao. Te dagego tama tibaso da, teda duga te yali dwai kolesagago dage me dologobeo. 31 Magi baso dage Israel isainu ebawe? Te dagego ebo dwai kolesaga tigidali te dagego tagaliąo, te dagego poloba meda haliga elalubo kolesaga hasegelama, te dagego gesi noma haliga, me gesi noma mobo bidi sao. 32 Ena God Genuai Bidi, eno te bidi me deli, ma we, ma wai, te isibaso eno homu pemene me ebeo. Tama tibaso, dagego te ge neyu, dwai sę tagalama, te haliga begelama, te dage bugagia bidiąo,” te po walio.