1 Te Besalel dali sę ebo bidi dabe augwaligo te bomai po muabo halobage te ni akasgo nigali, te aga bobage usu nama nedali, te 110 sentamita, tama aga genuai yali usu nama, te 66 sentamita, tama aga ugwadu me te usu nama, te tiwai naga te 66 sentamita naga tama nigalio. 2 Tama augwaligo te halobage te wiegi yai golgo te tomo badu me, te bulu badu me haluama, tama augwaligo bobage gol me deligo te halobage sesege badu bagulai. 3 Tama te ring gol me si me si te halobage tolabo nigali, tama te ring dabe te sągą me si me si tede kęnani, te me si me badu kęniyu, te me si te me badu kęniyu yai. 4 Tama augwaligo te bomai po muani halobage tolabo ni dage si te ni akasgo dulama, tama te ni si te golgo haluai. 5 Tama te ni dage si te ring dedage siba me badu me, me badu me palama muani, te halobage tolainogo tiwai.

6 Tama augwaligo te halobage po paliabo nai te wiegi yai golgo nigai, aga te dwai sę yali sęgę sela sąbo pesage dao. Te aga bobage usu nama usu sali, te 110 sentamita, tama aga genuai yali usu sali, te 66 sentamita tama nigai. 7 Tama augwaligo te gol selama, tama te hamago haluama, tama mobo bidi ensel si nigai. Te mobo bidi ensel si te halobage po paliabo nai nigali si badu dolaluai. 8 Tama te mobo bidi ensel si te me deli te dolo nogo badu dolaluyu, te me deli te pobase nogo badu dolaluyu yali. Augwaligo te mobo bidi ensel si nigibadi, tama te halobage po paliabo nai te deli nai tigi tiwai naga nigai. 9 Te mobo bidi ensel augwa siba digi ma tonononaluyu, tama aba te halobageba me tonononaluyu, tama augwali sigo bogo te dinigąluyu, tama te halobage po paliabo nai geme dualama elaluai.

10 Tama augwaligo tebol sai te ni akasgo nigali, tama bobage usu nama usu ni sali, te 88 sentamita, tama aga genuai usu sali, te 44 sentamita, tama ugwadu usu sali, te 66 sentamita, te tama tiai. 11 Tama te tebol augwaligo te wiegi yai golgo haluama, tama bobage golgo te sesege badu bagulai. 12 Tama te gol dage me augwaligo te ugwadu dai tigidali sesege badu kęnani, tama aga genuai usu sali, te 8 sentamita teba sabolali. Tama augwaligo te dwasianu golgo te tebol ugwadu dai sesege tigidali bagulama au yai dao. 13 Tama augwaligo ring gol me si me si nigilama, tama te tebol dage dabe me si me si te tebol sągą dabede kęnai dao. 14 Tama te ni tolaluali ring dabe te tebol tolobo nai augwaligo te sesegede pąde ugwadu daiba muai. 15 Tama augwaligo te tebol tolabo ni dage si te ni akasgo nigai, te si te golgo haluai. 16 Tama augwaligo te tebolde muabo pou me te doado bage dabe te wiegi yai golgo nigai. Te wain ąį ofa ilibo pou dabe, tama te plet dabe me, te kap dabe, me botol, te nai dabe tama te ofa yabo nai dao, tama augwaligo te nai dabe te wiegi yai golgo naga nigai.

17 Tialima, augwaligo te wiegi yai golgo te lam sole dabe tolaluabo nai nigai. Tama augwaligo te gol hamago haluama, tama te lam dodolabo madi te pesage nigilama, tama lam nogo dabe muabo digi te lam tolalubo nai elaluai. Tama augwaligo te ni duduli dabe te golgo nigilama, te lam tolaluabo nai au ilai. Augwaligo te deli tigi tiwai nai naga tigidali nigai dao. 18 Te lam tolaluabo naigo nogo ageali, te me sela me sela elaluali, te me sela me badu elaluyu, tama me sela te me badu elaluyu yai. 19 Augwaligo te tigidali nogo age deli deli te ni duduli sela, te ni amon duduli tiwaigo au ilai dao. 20 Tama augwaligo te lam tolaluabo nai au ilali, te ni duduli me si me sigo au ilai, tama te ni amon ni duduli tiwai tonobo ąǫ yalio. 21 Tama augwaligo te dwasianu ni duduli yabe dabe te lam ageali si si dologode nidigili pai dao. 22 Augwaligo te wiegi yai gol naga me dedeli selama, tama augwaligo te dabe nigilama, tama deli nai tiwai naga mu pedelai. 23 Tama augwaligo te gol nogo a naga olama me si lam genagi nigilama, tama selama, te lam tolaluabo naiba muainogo nigali, tama te lam genagi deli deliba muabo hobi, me te plet meba badi, te tama nai nigai dao. 24 Augwaligo te sęgę te 35 kilo elalubo te wiegi yai golgo te lam tolaluabo nai, me te aga muabo nai dabe tigidali nigai dao.

25 Augwaligo te ni akas selama, tama te denami ebo pauda ulabo alta nigai. Te tigidali sesege badu te deli tigi poai yali, te 45 sentamita usu naga tiwai, tama ugwadu usu sali te 90 sentamita dąį yali. Te altade te tiwai nai te bulmakau gąų me si me si augwaligo dulama, tama te deli deli te alta kele ni dagede muai. 26 Tama augwaligo te nai me si me si ugwadu bogo badu haluama, tama te gąų me si me si me te golgo haluai. Tama augwaligo te bobobage golgo te tigidali sesege bobegelama paliai. 27 Tama me badude augwaligo te ni palabo madi te ring si golgo nigali, te alta tolabo madi nigilama, tama gasa badu me tama tiali, tama augwaligo te ring me si me si te alta ugwadu sesegede muai. 28 Tama te alta ni palabo ni dage si augwaligo te ni akasgo nigilama, tama te ni si te golgo haluai.

29 Tama augwaligo te wel nigilama, te Genuai Bidigo nai dabe da olama sa muabo wel dao, tama te begelali, te sanda tiwai dolo mu yai. Tama augwaligo te wiegi yai paudago te wiegi yai denami yabo nai nigali, tama augwaligo bugagia taluai dao. * Sai 30:22-38