48
Te Kora hani dabego asęani balia po me deli dao.
Saion taun te genuai nogi elalu, te au wiegi yai elalubao
1 Genuai Bidigo genuai nogi elalubao.
Da te Godigo bulu duba holinao,
tama agai taun tomoba pelama,
tama dago agai nogi ugwaba mu sinao.
2 Godigo te bulu du te wiegi yai mu,
tama te ugwanu mu elalubao.
Te tigidali tǫde we bidi augwaligo
te Saion bulu du godolo mu ebo dao.
Te bulu du te not badu elalubao,
tama te polalubo kingo taun dao. * Mat 5:35
3 God te taun tomode bidiyu,
tama agai te we bidi dabego
hwįbo sogo tau siyu yai.
Tama tiyu, augwali bugagia bidai.
4 Polobadu te king dabego te Saionba hwįgi painu yai.
Augwali te deliba sisinama, tama te taun pąba asai.
5 Tiali goli, augwaligo te taun sulama,
tama augwali polo tama dwai midigi sali.
Tama augwali wi umabo mu ebaso,
tama augwali wi pai dao.
6 Augwali te dwai noma mu selama,
tama augwali genuai dene sali,
te wego wai ame nayu ebo dene tiwai gilama yai.
7 Godigo te genuai wali
te giliga asobo badu asomainu elama,
tama te Tasis hanu bidi dabego
genuai sip dabe dolali.
8 Te sę te polobadu Godigo yali po odolama,
tama megi dago subo me agai te tiwai ma yai.
Da te Genuai Bidigo taunde bidibao.
Dago God, te Tigidali Bomo Elalubo God dao,
tama agai te sę ebo dago suai.
Godigo te aga taun dąų walama,
tama te taun sesemane sogo
elalua pomainu yai dao.
9 God, da te nago tempel bede bidibao,
tama dago te nago da sesemane
godolo ebo kolesagade te homu kone palubo dao.
10 Te tigidali tǫ habu badu
te we bidi dabe augwaligo
te nago nogi ugwaba sabo dao.
Te tigidali habu badu we bidi dabego
te nago genuai nogide wiegi yai pemene ebo dao.
Nago te tigidali bage te doloba pai kolesagade naga
tonalubao.
11 Tama tialima, te Saion bulu dude
bidibo we bidi tigidaligo te augwa
wiegi yai pemene yao.
Nago te tigidali we bidigo ebo kolesaga
te dolo dagalubo dao.
Tama tibaso, eno homugo te Juda taun we bidi dabe
augwa te wiegi yai pemene mu emainao.
12 Dage we bidi, dage te Saion bulu dude biliyu,
tama te taun obo baguliyu,
tama tede elalubo bobobage be taua dabe nedao.
13 Dagego te Saion bagulali
obode bugagia homu kone palao,
tama agai te bomai be dabe bugagia suiąo.
Tama tiyu, dagego te nosali pedalubo
hani dabeba te po pusagameo.
14 Dagego augwaliba te tama waiyagameo,
“Te Godigo da tonaluai da,” po wao,
“Aga te dago sesemane sogo
bidada peyu, bidada pabo God dao.
Tama sesemane sogo te aga poligi soyu,
tama dabolo te sunumi ola mawaibao,” te po wao.