2
Godigo Mobo Bidi asai
1 Te nosali te Pentikos sogo asobo si, te Jisas homu dąų wabo we bidi tigidali te deli beba sisinagasali. 2 Tama polo augwaligo te u wabo dagaludu odali, te moni bomo yai wali asobo u wabo tiwai. Tama te bede bidali we bidi tigidali augwaligo te u wabo odali. 3 Tama augwaligo te nai dabe suali, te dwasianu sia bogoli dabe tiwai, bidigo hamena gagawai dabe augwaligo suali. Tama te nai dabe pebeda pelama, bidi deli deliba pelama, dią yani. 4 Tama Godigo Dwagi Yai Mobogo augwali sali, te tigidali agada weyu, tama augwali tigidaligo gasagi yai gasagi yai konesiąwai po dabe wabo gagalali, te me bidigo me po weyu, tama me bidigo gasa po me weyu yali. Tama Godigo Mobogo augwali te po dabe omainu te sę ilali, augwaligo pedauwalidu.
5 Tede, te Jerusalem be nanide, te tigidali tǫ pedaidu asai Israel hani bidi dabe bidai, te augwali Godibolo lotu po wabo bidi dabe. 6 Tama augwaligo te u wabo odama, we bidi hauwa kisu deliba sisinagasali, te beba. Tama te Jisasgo tagala palai bidi dabe augwa tigidaligo te bulu po augwaligo konesiąwai goli ola bidiyu yali. Tama, tibaso, te tamadi asai bidi deli deli dabego po odama, augwali noma sali. 7 Tama noma mu selama, augwali moni homu elama, te po wai, “Te po wabo bidi dabe tigidali augwali Galili tǫ pedai bidi dabe da. 8 Tialima, dago odali, da deli deli bidi hani dabego po dabe augwaligo wabo dago odali. Dago po augwaligo mena tama koneaniwe?” te po wali. 9 Tama te po ma wai, “Da tigidali buludu eba asali, e Judia tǫ pedai me, te Paria tǫ pedai me, Midia tǫ pedai me, Elam tǫ pedai me, te Mesopotemia me, Kapadosia me, Pontus me, Esia me, 10 Frigia me, Pamfilia me, Isip me, tama da Rom bidi dabe eba aselama, bidibo me. Da me badu te Sairini be nanidu asali, te Libia tǫ tonalubo bidigo be nani. 11 Da me badu Juda dabe mu da, me badu da homu begelama, Juda dabego ebo sę wali pabo dao. Tama da Krit me, Arebia me. Tialima, te bidi dabego Godigo bomai sę po dabe dago po dabego wabo odali,” augwaligo te po wai, te tamadi asai bidi dabego. 12 Tama augwali noma selama, augwali homu kolesaga umana pali. Tama augwa hasi ma po miyu, te po wai, “Te nai mena tama tialiwe?” 13 Tiali goli, bidi dabe me badu augwaligo te posobo po weyu, te po wai, “E bidi dabego bomai wę tulama, wabo pabo sę gagawai ebao,” te po wali.
Pitago te we bidi dabebolo pusali po
14 Te bidi Pita dali, te Jisasgo tagala palai bidi nogo si olama, sągą deli dali, augwali dodulaluali. Tama augwali dodulalu, Pitago te sisinagasai we bidigo wali po wei ponai, te po bomona wai, “Dage Juda hani, dagego odiąo, te Jerusalemde bidibo bidi dabego me, odiąo, te dagego te ede subo sę page koneagameo. 15 Dagego homu da bidi dabego bomai wę tulama, wabo pabo sę gagalali. Woo, te meni. Te kigamu giliga tamadi tama holobao. We bidi augwaligo kigamude bomai wę tulama, wabo pabo sę ebo menio. 16 Tiali goli, te subo sę page e dao. Te Godigo agabolo po olama, agai Godigo po pusa mawai bidi nogi Joel, agai e sęde polobadu te po wai,
17 ‘Te Godigo te po wai, “Te e si sia sainu ebadi
yaide, eno ena Mobo Bidi tigidali we bidibolo olo
mu mawaibao. Tama menama, dagego ogwa dabe,
wegi dabe augwaligo eno po pusa mawaibao. Tama
eno duga gesi bidi dabebolo me me gasagi yai na
dabe ola mawaibao, te monu dabe augwalibolo me.
18 Mu tama, te side eno sę ebo bidi dabe me, eno
sę ebo we dabe me, te siba eno ena Dwagi Yai Mobo
Bidi olo mu mawaibao. Tama menama, augwaligo
eno po pusa mawaibao. 19 Tama eno dagalude me,
tǫde me, te we bidi noma sabo gasagi yai bomai
sę dabe yaibao. 20 Te kaneme me, sia me, sisi yai
hano me yaibao, te giliga eno huli si ilaibao, tama
te polua me kaneme tiwai mama yai ilaibao. Tama
nosali Genuai Bidi Jisasgo si asobo si, te side Genuai
Bidigo genuai sę dabe yaibao, tama tibaso te sigo
moni nogi elaluaibao. 21 Tama te side Genuai
Bidi nogi elama i wabo bidi dabe da, teda Godigo
augwali tau selama, aga we bidi dabe yaibao,”
Godigo te po wai,’ * Jol 2:28-32
Joelgo tama po wai,” Pitago te po wali.
22 Te Pitago po ma wai, “Dage Israel dabe, dage e po odiąo. Eno Jisas te Nasaret bidide po waibao, te agai bomai moni sę dabe Godigo agabolo mobaso, agai dagebolo ola mayu tama Godigo aga tagala palai dao. Dago te kone dao, te bomai sę dabe Jisasgo dage tomode yali duga kone dao, te bidi Jisas agai yali. 23 Tama Godigo polobadu mu koneama tiaibao homu elama, agaduba homugo po polo dąų waluyu homude tiwai, te Jisas augwaligo dagego nogode muaibao. Tama dagego dwai bidi dabego Jisas elemainu ola mobaso, tama augwaligo aga ela muani. 24 Tiali goli, Godigo te bidi ma hodolobaso, tama aga ma hodaloai dao. Bidi isibo sęgo Jisas kalabus usu isąbaso, aga dene hauwa dali isama, Godigo agade te dene silali. 25 Tama polobadu Devitgo te Jisas me hodalobo sęde te po weyu, e tobo wai,
‘Eno Genuai Bidi eno gesabide sesemane bidibo suali.
Tama aga eno dolo nogo badu bidibo. Tama tibaso,
dwai sę hauwa enabolo pedalai ebaso da, augwali
ena aiyaba elalugobeo. 26 Tama tibaso, eno homu
wiegi yai elama, tama eno tede po pusubo sogo eno
bugai homu mu ebo da. Ena bidi tama dao, ena
isaibao. Tiali goli, ena te po wabo da, eno God
agai enabolo dwagi yai sę ebo ena tonaluaibao. 27 Magi baso meni. God, nago eno noma te isi bidi
dabego pesagede olo tagalogobeo. Ena da, te nago
dwagi yai sę ebo bidi da. Tama eno tigi nago damua
pomainu tagalogobeo. 28 Nago bugagia bidiyu
bidabo tų enabolo ola mawai dao. Nage ena dali
hodobo bidibaso, ena tego dwagi yai homu mu
ilali,’ * Tib 16:8-11
Devit agai te po wali,” Pitago Jisasde te po wali.
29 Te Pitago te we bidi dabebolo po ma wai, “Ena hani bidi ama dabe, dago wąį mu Devit, te bidide po eno dagebolo hania haninama mu pusa momainu, e po obao. Devit polobadu isali, tama augwaligo aga pubulali. Agai tigi muani pesage te da bidibo digi pąde e elalubao, te ede me munalubuo. Tama tibaso, dago konebo dao, te Devitgo agai wali po agade digi wabe, te Jisasde wali. 30 Tama Devit bidibadi yaide, te agai polo koneai, te magi sę dabe dią holaibao. Tama Godigo agabolo mu tama dao olama, te po mu dąų walai, te Devitgo koneai. Godigo agabolo te po wai,
‘Te eno naga hani bidi dabego bidi me nosali mu
genuai bidi mu ilaibao, te nage tiwai,’
te po wai, Godigo. 31 Tama Devitgo suali, te Godigo nosali yabo sę. Tama tibaso, Devitgo te we bidi tau somainu sa muani bidi Krais ma hodaloabo, te sęde te po wai,
‘Te Godigo aga te isi bidi dabego pesagede olo
tagalogobeo. Tama agai tigi damua pogobeo.’
32 Tama te bidi Jisas, Godigo aga ma hodolali. Te sę da Godigo po wali pabo bidi dabego gedugo mu suali. 33 Tama Godigo Jisas ma hodolama, aga dolo nogo badude muani, tama te nogi yai bidi bidibo madi. Tama Godigo agabolo aga Dwagi Yai Mobo mawai, te aga aya Godigo polobadu mawaibao olama polo po dąų walai. Tama megi Jisas agai Godigo Dwagi Yai Mobo dabolo olo mu menama, e dagego suali sę me, odali po me pedalali. 34 Tama Devit aga digi dagaluba pai menio, te Jisas yaligia. Me ma Devitgo e tǫba wai,
‘Eno Godigo eno Genuai Bidibolo te po wai, “Nage
eno e dolo nogo badu dugayao. 35 Tama pelama,
eno naga boi bidi dabe aiyaba elaluama, nago sągą
dologoba muaibao, te sogo dąį egi paibao,” Godigo
te Genuai Bidibolo tama po wai,’
Devitgo te po wali.” * Tib 110:1
36 Te Pitago po ma wai, “Eno dagebolo te po obao, dage Israel we bidi tigidali, dagego hania koneao, te duga te nide enani bidi Jisas, te bidi Godigo te Genuai Bidi ilali, te Godigo we bidi tau somainu sa muani bidi Krais,” Pitago te po wai.
37 Te we bidi augwaligo te po odobo si, augwali moni homu mu elama, Pitabolo me, tama me badu Jisasgo tagala palai bidi dabebolo me te po wai, “Hani bidi ama dede, da magi egowe?”
38 Te Pita agai augwalibolo te po wai, “Dage tigidali deli deli dabego tigidali dwai sę dabe tudiba togolama, tama homu begelama, Jisasgo nogide baptais sao, te Godigo dagego dwai sę sela sąnama, boi bidi egobe weyu yao. Tama tilama, Godigo aga Dwagi Yai Mobo dagebolo mawaibao. 39 Tama Godigo polobadu mawaibao olama polo dąų walai po dagebolo me, te duga ogomani dabe nosali ame nabo tebolo me, tama te digibulu bidibo we bidibolo me, te dago Genuai Bidi God aga pąba i wabo we bidi tigidalibolo me, agai te tigidali we bidibolo aga Dwagi Yai Mobo mawaibao,” Pitago te po wali.
40 Te Pitago augwalibolo dwasianu po wabe, te po hauwa wai, te po bomona weyu, te po wai, “Duga digi duga ma tau siąo. Tibaso, dage dene sogobeo, te Jisas ela muai dwai bidi dabe nosali dene sainu ebo yaligia,” te po wai. 41 Tama we bidi hauwa augwaligo agai wali po homude dąų wai. Tama we bidi hauwa mu 3,000 augwali te sogo baptais selama, tama augwali te Jisasde polobadu homu dąų wai we bidiba wadolagasai. 42 Tama augwali wadolali we bidi augwaligo Jisasgo tagala palai sę bidi dabego augwalibolo po hauwa mu ola momaina homu yali. Tama augwali deli hani tiwai bidali. Tama augwali deli madi hodobo nai tubo da, augwali Jisasde homu dąų wai dao weyu yai. Augwali Godibolo hodobo po wabo da.
Jisasde homu dąų wai we bidi augwali bugagia bidai
43 Te bidi Jisasgo tagala palai bidi dabe augwaligo te we bidi noma sabo gasagi yai bomai sę dabe hauwa sogo mu eduali. Tama tibaso, we bidi tigidali noma mu sai. 44 Tama te Jisasde homu dąų wai we bidi tigidali augwali deli hani tiwai pedelama bidali. Godigo po wali pabo bidi dabego homugo te da deli deligo munalubo nai dabe denaduba nai dabe da homu ebe, te Godigo dąį ilai me badu bidi dabe tau sabo nai dabe da, te homu yali. 45 E tiwai yai. Te augwaligo me sogo be dabe me, te tǫde me, te munalubo me badu nai dabe me bidi dabeba menama, tama mone ge selama, me me nai habuge yai bidi dabe tau siyu yali. Tama tilama, augwali tigidali usu yali. 46 Tama augwali te Moni Lotu Be tempel tede sesemane sogo sisinagasu sisinagasobo da, te deli hani tiwai. Tama augwaligo sesemane sogo wiegi yai homu dali nai tuyu bidali, te augwa be dabede. Tama augwali wiegi yai homu dali nai tubo da. 47 Augwaligo te po wabo da, “Te God da, aga dwagi yai mu da.” Tama te olo we bidi tigidali augwaligo te Jisasde homu dąų wai we bidi dabebolo wiegi yai homu yai. Tama Godigo sesemane deli deli sogo te olo we bidi dabe selama, agai po wali pabo bidi dabeba wadolobo dao.