1 Ai Kot, a fich ngonuk pwe aramas repwe mwareituk lon Sion,

repwe pwal apwönüetä ar pwon ngonuk,

2 pun en ka aüselinga iotek.

Aramas meinisin repwe feito reöm

3 pokiten ar tipis.

Lupwen äm pupungau ra chouitikem,

en ka amuseer senikem.

4 Feiöchün chokewe ka filiretä

o emwenireto pwe repwe nom lon leniom mi pin.

Äm aipwe üren feiöch ren ekewe mettoch mi mürina

me lon imwom we mi pin.

5 Ai Kot äm Chon Amanau, ka pälüenikem fän pwüng

ren föför mi amwarar.

En ewe chon fanüfan meinisin

pwal chon ekewe fanü toau mi nom lematau

ra eänuk apilükülük.

6 Ren om pöchökül ka anüküchara ekewe chuk,

pun ka pwärala om manaman.

7 Ka aükätiu ötötün ekewe matau,

pwal püngüpüngün ekewe no

me akürangen chon ekewe mwü,

8 pwe chokewe mi nonom lesopun fanüfan repwe niuokus

ren om kewe manaman.

Ka föri pwe chon ekewe fanüen ötiu tori chon ekewe fanüen lotou

ra mweireir fän pwapwa ren om kewe föför.

9 Ka tümwünü fanüfan o achöchönü,

ka föri pwe a pwülüöch o fanüeräs.

Ka aurala ekewe chanpupu ren koluk.

Ka ngeni chon fanüfan ener mongö.

Iei usun mine ka föri ngeni fanüfan:

10 Ka fokun achöchönü ekewe warawar lon ekewe tanipi,

ka asosonöchü o apwetetei ewe pwül ren üt

o afeiöchü mine a märitä.

11 Ka awora iteiten ier räs mi fokun somwola.

Ekis meinisin ia ka fetal ie a wor räsimong.

12 Ekewe mälämäl lon fanüapö a märitä chomong fetil wor,

nge ekewe chuk ra pwölüla ren pwapwa.

13 Ekewe maasies ra ur ren pwiin sip,

nge ekewe lemol ra ur ren wiich.

Aramas meinisin ra mweireir o kölfengen fän pwapwa.