1 Iwe, iei ewe fanü mi ainet ngeni chon ewe ainangen Manasa nöün Josef mwänichi. Nge Makir nöün Manasa mwänichi semen Kiliat, a inetini Kiliat me Pasan ra nom peliötiuen ewe chanpupu Jortan, pun i eman chon maun mi iteföüla. 2 Nge ewe fanü mi nom pelilotoun ewe chanpupu Jortan a pwal ainet ngeni lusun chon ewe ainangen Manasa lon tettelin ar kewe famili: Apieser, Helek, Asriel, Sekem, Hefer me Semita. Ikkei ir ekewe mwän mwirimwirin Manasa nöün Josef we mwän lon tettelin ar kewe famili.

3 Nge Selofeat nöün Hefer we mwän esap wor nöün mwän, pwe a chök wor nöün fefin. Iwe, Selofeat nöün Hefer we mwän, nge Hefer nöün Kiliat, nge Kiliat nöün Makir, nge Makir nöün Manasa we mwän. Iwe, ikkei iten nöün Selofeat kewe fefin: Mala, Noa, Hokla, Milka me Tirsa. 4 Ra feito ren ewe souasor Eleasar, ren Josua nöün Nun we mwän, pwal ren ekewe souemwen o üreniir, “Ewe Samol mi Lapalap a allük ngeni Moses, pwe epwe ngenikem fanüem usun chök märärim kewe mwän.” Iei mine Josua a ngeniir fanüer me lein fanüen pwin semer, usun ewe Samol mi Lapalap a allük. 5 Iei popun chon ewe ainangen Manasa ra sereni engol kinikinin fanü lükün ewe fanü Kiliat me Pasan ra nom ötiuen ewe chanpupu Jortan, 6 pokiten mwirimwirin Manasa kewe fefin ra pwal angei fanüer usun chök ekewe mwän. Nge ewe fanü Kiliat a ainet ngeni ekewe lusun chon ewe ainangen Manasa.

7 Iwe, kiännin fanüen Manasa a popuetä seni Aser tori Mikmeta mi nom ötiuen Sikem. Mürin ewe kiä a pwerela ngeni peliör tori fanüen chon En-tapua. 8 Iwe, Manasa a fanüeni ewe fanü Tapua, nge ewe telinimw Tapua mi nom won kiännin fanüen chon ewe ainangen Manasa än chon ewe ainangen Efraim. 9 Mürin, ewe kiä a pweretiu tori ewe öüwö Kana. Iwe, ekewe telinimw peliörün ewe öüwö än chon ewe ainangen Efraim, nge ra nom lein ekewe telinimwen chon ewe ainangen Manasa. Mürin kiännin fanüer a pwerela peliefengin ewe öüwö o müchütiu me ren ewe mataulap. 10 Iwe, ewe fanü mi nom ör fanüen chon ewe ainangen Efraim, nge ewe fanü mi nom efeng fanüen chon ewe ainangen Manasa, nge ewe mataulap kiännin fanüer me pelilotou. Iwe, kiännin fanüer me efeng fanüen chon Aser, nge kiännin fanüer me ötiu fanüen chon Isakar. 11 Iwe, a pwal wor än Manasa telinimw lon fanüen Isakar me Aser iter: Pet-sean me Ipleam fiti wisoposopur, pwal ekewe telinimw Tor me Entor, Taanak me Mekito fiti chor me wisoposopur, pwal eu leülüngatin ewe fanü Nafat. 12 Nge chon ewe ainangen Manasa resap tongeni eäni ekewe telinimw, pun ekewe chon Kanaan ra chök amwöchümwöchütiu le nom lon ewe fanü. 13 Nge lupwen ekewe aramasen Israel ra pöchökülela, resap asüela ekewe chon Kanaan meinisin, nge ra chök aweiresiir ren angangochou. ✡ Souk 1.27-28

14 Iwe, chon ewe ainangen Josef ra üreni Josua, “Pwota ka ngenikem eu chök kinikinin fanü pwe fanüem? Nge äm aia kon chomong, pun ewe Samol mi Lapalap a fokun afeiöchükem.” 15 Iwe, Josua a üreniir, “Are ämi chon ewe ainangen Efraim oua kon chomong, nge fanüemi a kükün ngenikemi, oupwe feitä ren ewe wöllap, oupwe limeti ewe fanü fän itemi, ewe fanüen chon Peris me chon Refa.” 16 Nge chon ewe ainangen Josef ra apasa, “Ewe fanü mi chukuchukutä esap naf ngenikem. Nge ekewe chon Kanaan meinisin mi nom lon ewe maasies a wor war woken seni mächä, chokewe mi nom Pet-sean pwal lon wisoposopun me chokewe mi nom lon ewe lemolun Jesreel.” 17 Mürin, Josua a üreni chon ekewe ainangen Efraim me Manasa, “Ämi oua kon chomong, oua pwal pöchökül. Ousap fanüeni eu chök fanü, 18 nge oupwe pwal fanüeni ewe fanü mi chukuchukutä. Inamwo are ewe fanü a wöllap, oupwe limeti o fanüeni tori leamüchülan kiännin. Pun oupwe asüela ekewe chon Kanaan, inamwo are a wor war woken seni mächä, are ra pwal pöchökül.”