1 “Üa anioputa püsin manauei.

Iei mine üpwe fokun pwärawu ai siö, üpwe kapas fän riaföün letipei.

2 Üpwe üreni Kot: Kosap atipisiei.

Kopwe asile ngeniei popun om apwüngüei.

3 Ifa usun, a mürina ngonuk pwe kopwe ariaföüüei?

Ifa usun, a öch om kopwe aücheangaua förien poum,

nge ka pwapwaiti mine ekewe aramasangau ra ekiekietä?

4 Ifa usun, mesom a usun mesen aramas?

Ifa usun, ka küna usun eman aramas a küna?

5 Ifa usun, ränin manauom a mochomoch usun chök ränin manauen aramas?

Ifa usun, ierum ra usun chök ierin aramas,

6 pwe kopwe kütta ai kewe föför mi ngau o chosani ai kewe tipis?

7 Ka silei pwe üsap tipis,

esap pwal wor eman a tongeni angasaei senuk.

8 Poum kana ra auluuluei o föriei.

Nge iei ka kunnula seniei o afeiengauaei.

9 Kopwe chechemeni pwe ka föriei seni pwül.

Ifa usun, kopwe pwal aliwinisefäliei ngeni pwül?

10 Ka apöchöküla semei pwe epwe nöüniei,

ka amärieitä lon letipen inei.

11 Ka achufengeni inisi ren chü me säl

o pwölüei ren fituk me ünüch.

12 Ka fang ngeniei manau me om tong ellet,

nge ren om tümwünüei üa manau.

13 Nge ei ekiek ka aopala lon lelukom,

üa silei pwe a fen nom lon om ekiek:

14 Are üa tipis, en ka nenengeniei,

nge kosap amusala ai föför mi ngau.

15 Feiengauei are üa föföringau.

Nge are üa pwüng, üsap pwal tongeni chimwetä,

pun üa uren itengau o mefi ai kewe riaföü.

16 Nge are üpwe chimwetä,

en kopwe tapweriei usun eman laion a tapweri liapan,

ka pwal pwärisefäli om kewe manaman pwe üpwe feiengau rer.

17 Ka awora chon pwärätä mi fö pwe repwe ü ngeniei,

ka alapala om song ngeniei o awarasefälieto noum mwichen sounfiu

pwe repwe fiufochofoch ngeniei.

18 Pwota ka atoeiwu seni letipen inei?

Amwo üpwe mäla me mwen än aramas repwe künaei.

19 Mürin üpwe wewe ngeni eman esap manau,

üpwe towu seni letipen inei o tolong lon peias.

20 Ifa usun, ränin manauei esap kan ngeni an epwe müchüla?

Kopwe mwüt ngeniei pwe üpwe emanüla, pwe üpwe ekis pwapwa

21 mwen ai üpwe feila ngeni ewe leni üsap chüen liwinsefäl seni,

ngeni ewe fanü mi rochopwak o fokun rochokich,

22 ewe fanü mi rochopwak o fitikoko,

ia saram a usun chök rochopwak ie.”