11
Kot a positi nöün aramas mi tokola
11.1-11
1 Ewe Samol mi Lapalap a apasa,
“Lupwen Israel a eman semirit, ngang üa tongei.
I nei mwän üa körawu seni Isip. ✡ Eks 4.22; Mat 2.15
2 Nge lupwen üa alapala ai kökköriir,
ir ra chök alapala ar feila seniei.
Nei aramas ra asor ngeni ekewe anü Paal
o keni apach mi pwokus ngeni ekewe uluulun anümwäl.
3 Nge ngang ätewe mi aiti chon Israel fetal.
Üa ekiir o amwöchüür lepei.
Nge ir resap mefi pwe ngang üa tümwünüür.
4 Üa emweniir fän kirikiröch me tong.
Üa usun chök eman mi ekiretä o efitiir,
üa rotiu o amongöör.
5 Iwe, resap fokun mochen liwinitiei, iei mine repwe liwiniti ewe fanü Isip, nge Asiria epwe nemeniir. 6 Maun epwe tori ar kewe telinimw o ataela amwöchün asamalapen tittir kewe, epwe pwal niela ekewe aramas, pun ra chök föri mine ra püsin ekiekietä. 7 Nei aramas ra oucho le kul seniei. Inamwo ika ra siö ngeniei, üsap fokun angaseer.
8 Ifa usun ai üpwe tongeni fangatä, en Israel?
Ifa usun ai üpwe tongeni likitukela?
Ifa usun ai üpwe ataakela usun ai ataela Atma?
Ifa usun ai üpwe tongeni föri ngonuk usun mine üa föri ngeni Sepoim?
Letipei a siwil, ai tong a pwichikar o nüküchar. ✡ Tut 29.23
9 Üsap apwüngükemi ren ai song mi fokun watte,
üsap ataasefäli Israel.
Pun ngang Kot, nge sap eman aramas.
Ngang Ewe mi Pin mi nom leimi.
Üsap feito pwe üpwe kata.
10 Iwe, nei aramas repwe tapweto müri, lupwen üpwe wörüwör ngeni chon oputeer usun eman laion. Iwe, repwe müttir feito rei seni lotou. 11 Repwe müttir feito seni Isip usun machang, pwal seni ewe fanü Asiria usun chök lisom, nge ngang üpwe aliwinireto ngeni lenier. Ngang ewe Samol mi Lapalap üa kapas.”
Kot a apwüngü chon Israel pokiten ar chofana o ariaföüü aramas
11.12–12.14
12 Iwe, ewe Samol mi Lapalap a apasa, “Chon Israel ra pwelifeiliei fän chofana me atuputup, nge chon Juta ra ü ngeniei, ngang ewe Kot mi Pin o allükülük.