1 Iwe, ewe Samol mi Lapalap a kapas ngeniei, 2 “Nöün aramas, ren met ewe irän wain a aüchea seni ekewe lusun irän lein wöllap? 3 Ifa usun, aramas ra angei popun o falei och pisek seni? Ika ra föri efoch chüföl seni o isetä pisek won? 4 A chök öch an epwe koturulong lon ekkei pwe epwe karala. Ifa usun, are lesopun me ruosop ra karala, nge lukalapan a wiliti mooch, a chüen lomot ngeni och mettoch? 5 Ika esap lomot ngeni och mettoch, lupwen esamwo kar, ifa usun, esap watte lomotongauan, lupwen ekkei a kenala, pwe a wiliti mooch? Ewer, esap fokun lomot ngeni och mettoch. 6 Iei mine ngang Kot ewe Samol mi Lapalap üa apasa: Usun üa angei ewe irän wain seni ekewe irän lein wöllap o atolonga lon ekkei pwe epwe karala, iei usun üpwe föri ngeni ekewe chon Jerusalem meinisin. 7 Iwe, üpwe ü ngeniir. Inamwo ika ra sü seni lon ekkei, ekkei epwe chök kenirela. Nge lupwen üpwe ü ngeniir, oupwe silei pwe ngang ewe Samol mi Lapalap. 8 Iwe, üpwe awili ei fanü ngeni fanüapö, pun chon resap allükük,” iei alon Kot ewe Samol mi Lapalap.