1 Mürin eu fansoun Nahas ewe kingen Amon fiti nöün sounfiu ra feitä o pwelifeili Japes-kiliat, pwe repwe maun ngeni. Iwe, ekewe re Japes meinisin ra üreni Nahas, “Kopwe mwüt ngenikem pwe sipwe föri eu pwonen atipeeufengen, nge en kopwe nemenikem.” 2 Nge Nahas a üreniir, “Üpwe föri ewe pwonen atipeeu ngenikemi won eu chök lapalap, pwe üpwe olusawu pelifichin föün mesemi, pwe üpwe awarato itengau won chon Israel meinisin.” 3 Iwe, ekewe souakomwen Japes ra üreni, “Kopwe mwüt ngenikem ükükün fisu rän pwe aipwe tinala chon künö lemenen fanüen chon Israel meinisin. Nge are esap wor eman epwe alisikem, mürin aipwe fangatä ngonuk.” 4 Lupwen ekewe chon künö ra tori Kipea än Saul telinimw, ra apworausa ei pworaus ngeni ekewe aramas. Mürin, ekewe aramas meinisin ra kechü fän leüömong.

5 Lon ewe otun Saul a liwinto seni lemäl o tapweto mürin nöün kewe ätemwänin kow. Iwe, a ais, “Met a fis ngeni ekewe aramas? Pwota ra kechü?” Mürin ra apworausa ngeni pworausen ekewe re Japes. 6 Nge lupwen Saul a rongorong ekei kapas, Ngünün Kot a fokun feitiu won. Iwe, a fokun song. 7 Mürin a angei ruoman ätemwänin kow, a pökükisiretiu o tinifetaleer ngeni chon künö lemenen unusen ewe fanü Israel, pwe repwe asilefeili, “Iö esap tapwela mürin Saul me Samuel le feila maun, iei usun mine epwe fis ngeni nöün ätemwänin kow.” Mürin, eu niuokus me ren ewe Samol mi Lapalap a tori ekewe aramas, pwe ra feito fän tipeeu pwe repwe maun. 8 Iwe, lupwen Saul a achufengeniir o aleaniir me lon Pesek, iteiten ekewe re Israel ülüpükü ngeröü, nge iteiten ekewe re Juta ilik ngeröü. 9 Mürin ra üreni ekewe chon künö mi feito seni Japes-kiliat, “Iei usun oupwe üreni aramasemi kewe: Lesor, lupwen akkar a tinekeniken, epwe fis ämi ngasala.” Iwe, lupwen ekewe chon künö ra liwin o üreni ekewe re Japes ekei kapas, ra pwapwa. 10 Iei mine ekewe re Japes ra üreni Nahas, “Lesor äm aipwe fangatä ngonuk pwe kopwe föri ngenikem ükükün mine ka mochen.” 11 Nge sorotän ewe rän Saul a ineti ekewe aramas lon ülüngat mwich. Iwe, lupwen a tori wilingäch, ra sälong lukalapen lenien ekewe sounfiun Amon o nirela tori fansoun akkar a tinekeniken. Nge chokewe mi chüen manau ra toropasfeil pwe esap wor ruoman ra nonomfengen.

12 Mürin, ekewe aramas ra üreni Samuel, “Iö a apasa pwe Saul esap nemenikich? Oupwe emwenato ekewe mwän pwe sipwe nirela.” 13 Nge Saul a üra, “Esap fokun wor eman mwän epwe ninnila ikenai, pun ewe Samol mi Lapalap a angasa chon Israel ikenai.” 14 Mürin, Samuel a üreni ekewe aramas, “Ousipwe feila Kilkal o anükücharasefäli mwüüch we me ikenan.” 15 Iei mine ekewe aramas meinisin ra feila Kilkal. Ikenan ra seikätä Saul me fän mesen ewe Samol mi Lapalap, pwe epwe king. Ra pwal eäni asoren kinamwe ngeni ewe Samol mi Lapalap ikenan. Nge Saul me ekewe chon Israel meinisin ra fokun pwapwa.