1 Ai Samol mi Lapalap, en ai lenien op,

kosap fokun mwüt ngeniei pwe üpwe kuf.

2 Pokiten ka pwüng, kopwe angasaei o alisiei.

Kopwe aü selingom ngeniei o amanauaei.

3 En kopwe ai lenien op usun eu föimw,

ia üa tongeni op ie fansoun meinisin.

En ewe mi pwon ngeniei pwe kopwe amanauaei,

pun en ai achau me ai imwen maun.

4 Ai Kot, kopwe angasaei seni ekewe aramasangau,

pwal seni ekewe mwän mi ngau o mwäneson.

5 Ai Samol mi Lapalap, en ai apilükülük,

üa lükülükuk seni lesäräföi.

6 Lon unusen manauei üa unnenuk,

en ewe mi tümwünüei seni ai uputiu.

Üpwe chök mwareituk fansoun meinisin.

7 Üa usun chök eu asisil mi eniwokus ngeni chomong aramas,

nge en ai lenien op mi pöchökül.

8 Üa mwareituk iteiten rän

o pwärätä om ling.

9 Kosap pöütieila iei lon ai chinlap,

nge kosap likitieila iei, lupwen üa apwangapwang.

10 Pun chon oputaei ra kapas usi,

ra rawangauaei o mochen nieila.

11 Ra apasa, “Kot a likitala ätei.

Ousipwe tapweri o turufi,

pun esap wor eman epwe angasa i.”

12 Ai Kot, kosap toau seniei.

Ai Kot, kopwe kaito pwe kopwe alisiei.

13 Amwo ekewe chon atipisiei repwe säw o rosola.

Nge chokewe mi kütta ar repwe afeiengauaei repwe küna turunufas me itengau.

14 Nge ngang üpwe apilükülükuk fansoun meinisin

o alapala ai mwareituk.

15 Iteiten rän üpwe apworausa usun om föför mi pwüng,

pwal usun om amanauaei,

inamwo ika üsap tongeni weweiti meinisin.

16 Ai Kot, Samol mi Lapalap, üpwe feito o apworausafeili om kewe föför mi manaman,

üpwe mwareiti om pwüng echök.

17 Ai Kot, ka aiöüei seni lesäräföi,

nge ngang üa chüen asilefeili om föför mi amwarar.

18 Ai Kot, kosap likitieila iei,

lupwen üa chinlap o pwech mökürei.

Kopwe etiei, lupwen üpwe asilefeili om manaman me om tufich

ngeni ekewe täppin aramas repwe up me mürin.

19 Ai Kot, om pwüng a tori ekewe läng mi tekia.

En ka föri mettoch mi amwarar.

Ai Kot, iö a wewe ngonuk?

20 En ewe mi öküna ngeniei chomong weires me riaföü,

kopwe pwal apöchökülasefäliei,

kopwe uweesefälieitä seni epin fanüfan.

21 En kopwe alapala ai iteüöch

o achipasefäliei.

22 Ai Kot, ngang üpwe fokun mwareituk ren kitar,

pokiten om allükülük,

üpwe kölün mwareituk ren ükülele,

en Ewe mi Pin me lon Israel.

23 Üpwe mweir fän pwapwa, lupwen üpwe kölün mwareituk.

Üpwe mwareituk,

pun ka amanauaei.

24 Iteiten rän üpwe kapas usun om pwüng,

pun chokewe mi kütta ar repwe afeiengauaei

ra säw o itengau.