48
Kapasen osuni usun mettoch mi fö
48.1-11
1 Oupwe aüselinga ei kapas, ämi chon Israel,
ämi mwirimwirin Juta.
Oupwe aüseling, ämi mi akapelü iten ewe Samol mi Lapalap
o köri iten ewe Koten Israel,
nge sap fän let me pwüng.
2 Iwe, oua püsin aita ngenikemi chon ewe telinimw mi pin
o apilükülükü ewe Koten Israel,
itan ewe Samol mi Unusen Manaman.
3 Ewe Samol mi Lapalap a üreni Israel,
“Me lomlom üa pwärätä ekewe mettoch repwe fis.
Üa pwäriretä ren awei o arongafeiliir.
Mürin üa müttir föriretä pwe ra fis.
4 Pokiten üa silei pwe en ka tipeförea,
pwe lükün üom a pöchökül usun mächä,
nge chamwom a usun chök piras,
5 üa pwärätä ngonuk ekei mettoch me lomlom.
Iwe, mwen ar fisitä üa apworausa ngonuk
pwe kosap tongeni apasa, ‘Ai anü a föriir,
nge ai uluulun anümwäl mi fal
pwal ai uluulun anümwäl mi för seni mächä ra afisiretä.’
6 Iwe, en ka fen rongorong usun ekei mettoch, nge iei ka küneer.
Ifa usun, kosap mochen aleta pwe ra pwüng?
Seni ikenai üpwe asile ngonuk mettoch mi fö,
pwal mettoch mi monomon kosamwo sisilei.
7 Iwe, ra fisitä iei chök, sap me lom.
Nge mwen ei fansoun ikenai kosamwo rongorong usur,
pwe kosap tongeni apasa pwe ka fen sileer.
8 Iwe, kosamwo rongorong ika weweiti ei,
seni me lomlom selingom esap sukula.
Pun üa fokun silei pwe kosap allükülük ngeniei,
ka pwal iteni chon ü ngeniei seni leuputiuom.
9 Iwe, fän püsin itei üa engila lon ai song,
fän iten ai iteüöch üa amwöchü senuk ai song,
pwe üsap afeiengauok.
10 Nengeni, üa limetuk, nge esap usun än eman limeti silifer won ekkei.
Üa sotunuk ren riaföü mi watte,
a wewe ngeni eu um mi fokun pwichikar.
11 Fän itei, fän püsin itei chök üa föri ei.
Ifa usun, itei epwe küna turunufas?
Üsap ngeni eman ai ling.”
Kot epwe amanaua Israel
48.12-22
12 Iwe, ewe Samol mi Lapalap a apasa,
“Oupwe aüselingaei, ämi chon Israel, ämi ewe mwichen aramas üa körikemi.
Ngang chök Kot, ngang Aemanün me Amüchülan. ✡ Ais 44.6; Pwär 1.17; 22.13
13 Iwe, pei a förätä longolongun fanüfan,
nge pöüifichi a ameresala läng.
Lupwen üa köriir, ra feito o nom mwei.
14 Oupwe chufengen o rongorong ämi meinisin.
Iö lein ekewe kot a tongeni osuni usun ekei mettoch?
Ätewe a fil me rei ngang ewe Samol mi Lapalap,
epwe apwönüetä letipei ngeni chon Papilon,
nge pöün epwe fiu ngeniir.
15 Ngang, ngang chök üa pwärätä usun o köri,
üa pwal emwenato o atufichi pwe epwe lipwäköch lon an angang meinisin.
16 Oupwe kaneto rei o aüselingaei.
Seni me lepopun üsap fos lemonomon.
Iwe, seni ewe fansoun ekei mettoch ra fis üa fen nom.”
Nge iei Kot ewe Samol mi Lapalap a tinieito me Ngünün.
17 Iei alon ewe Samol mi Lapalap om Chon Amanau,
Ewe mi Pin lon Israel,
“Ngang ewe Samol mi Lapalap om we Kot.
Üa aiti ngonuk mine kopwe feiöch ren,
üa pwal emweni ngonuk ewe al kopwe fetal won.
18 Amwo kopwe aüselinga ai kewe allük!
Mürin om kinamwe epwe wewe ngeni eu chanpupu,
nge om pwüng epwe wewe ngeni nomongun lematau.
19 Iwe, noum kewe repwe wewe ngeni pien aroset,
nge mwirimwirum kana repwe chomong usun chomongun föün pi.
Iwe, iter esap fokun mola ika talüla seni fän mesei.”
20 Oupwe towu seni Papilon o sü seni aramasen lon.
Oupwe asilefeili ei pworaus fän mweireiren pwapwa,
oupwe pwal arongafeili tori lesopun fanüfan o apasa,
“Ewe Samol mi Lapalap a amanaua nöün chon angang Israel.” ✡ Pwär 18.4
21 Lupwen a emwenala nöün aramas lon fanüapö,
resap kaka,
a apupuala koluk fän iter seni ewe achau.
A amökkü ewe achau pwe ewe koluk a puwu seni.
22 Iwe, ewe Samol mi Lapalap a apasa,
“Chon föföringau kana esap wor rer kinamwe.” ✡ Ais 57.21