14
Hairam a tipeeu ngeni Tafit
14.1-2
(2.Sam 5.11-16)
1 Iwe, Hairam ewe kingen Tirus a tinala chon künö ren Tafit, a pwal tinala irä setar, chon ses fau me taikü, pwe repwe aüetä eu imw fän iten Tafit. 2 Iei mine Tafit a mefi, pwe ewe Samol mi Lapalap a anüküchara lon wisan wisen king lon Israel, a pwal fokun afefeitä mwün fän iten nöün aramasen Israel.
Nöün Tafit kewe mi uputiu me lon Jerusalem
14.3-7
3 Iwe, Tafit a pwal angei ekoch pwülüan me lon Jerusalem, a pwal wor nöün ät me nengin me wor. 4 Ikkei iten nöün kewe a nöüniir me lon Jerusalem: Samua, Sopap, Natan, Salomon, 5 Ipar, Elisua, Elpelet, 6 Noka, Nefek, Jafia, 7 Elisama, Peliata me Elifelet.
Tafit a akufu ekewe chon Filistia
14.8-17
(2.Sam 5.17-25)
8 Iwe, lupwen ekewe chon Filistia ra rong pwe Tafit a seikitä king won unusen Israel, ra feila meinisin pwe repwe aoi Tafit. Nge lupwen Tafit a rong usun, a feila pwe epwe maun ngeniir. 9 Iwe, ekewe chon Filistia ra feito lon ewe lemolun Refaim o angei liaper. 10 Nge Tafit a aisini Kot, “Ifa usun, üpwe feila maun ngeni ekewe chon Filistia? Ifa usun, kopwe awinnaei?” Iwe, ewe Samol mi Lapalap a üreni Tafit, “Kopwe feila maun ngeniir, nge üpwe awinnok.” 11 Iei mine Tafit a feila Pal-perasim o akufu ekewe chon Filistia me ikenan. Iwe, a apasa, “Kot a nöünöü ngang pwe üpwe küütalong ekewe tettelin sounfiu mi oputaei, usun puun eu chanpupu a pwangenalong ewe fanü ünükün.” Iei mine ewe leni a iteni Pal-perasim * wewen Pal-perasim ewe Samol mi Lapalap a pwangenalong. 12 Lupwen ekewe chon Filistia ra sü, ra likitala ar kewe uluulun anümwäl ikenan. Nge Tafit a allük pwe repwe kenirela.
13 Mürin, ekewe chon Filistia ra feitosefäl pwe repwe angei liaper me lon ewe lemol. 14 Nge lupwen Tafit a aissefäl ngeni Kot, Kot a üreni, “Kosap fetal wenewen ngeniir, nge kopwe pwelila lükisökürür o maun ngeniir seni akawenewenen ekewe irä pwokus. 15 Iwe, lupwen kopwe rongorong mwataten peche le ülün ekewe irä pwokus, lon ena otun kopwe popuetä le maun ngeniir, pun ngang üpwe akomwowu mwom, pwe üpwe niela ekewe sounfiun Filistia.” 16 Tafit a föri usun mine Kot a allük ngeni. Iwe, ra niela ekewe sounfiun Filistia seni Kipeon tori Keser. 17 Iwe, iteüöchün Tafit a chöfetal lon ekewe fanü meinisin, nge ewe Samol mi Lapalap a föri pwe chon ekewe mwü meinisin ra niuokusiti Tafit.