1 Hicheng hohi kagel ji teng ka lungchang aphudot dot jeng jin, kasung a hin akithing thing jin ahi. 2 Pathen kamsung'a konna hung doh a ogin thong khu phaten ngai uvin. 3 Van dung lhungin agin akitol in chuleh kolphe vah'in ningtin asalvah phan ahi. 4 Chuti chun huipi gopi kitum gin in alal loupina ogin nasatah in ahung in thu asei teng jongle akituh tang deh poi. 5 Pathen Ogin chu van gin in aloupisah in athahat aloupina chu eigel phah hoi ahipoi. 6 Aman buhbang leisetna longlha din thu apejin, go jong leiset chunga longlha din thu apeji e. 7 Chuteng leh mijousen anatoh u angan hiti chun athaneina chu ave jiuve. 8 Gam'a gamsa ho akikhu khum un chuleh akosung uvah aum den ji tauve. 9 A indan sunga kon in huipi gopi ahungin chuleh hiche a kon chun huidap ahung nunge. 10 Pathen hu haikhum chun buhbang lhang asosah in chuin twi chu atebep bep chun akan den sah jin ahi. 11 Meiho chu twi akhumdim jin chule kolphen avahsah ji'e. 12 Ama thusah a meilhang hohi kitol leleuva, leiset chunga hi aman thu apeh jouse aboljiu ahi. 13 Hicheng ho jouse hi mihem engbolna ham ahiloule tang theilou ngailutna vetsahna a abolji ahi. 14 Job hiche hi phaten ngaijin, Pathen natoh thilbol kidang tah tah ho ngaito din khongaijin. 15 Itobang tah a Pathen in huipi gopi athua anunsah a chule meilah a konna kolphe ahung vahdoh sah ji hi nahet em? 16 Akhut themna leh akidanna chamkim keija meilhang ho atolle le ji hi iti dan ham ti nahet doh jou ding ham? 17 Nangin na-ul naponna nakitheh tengle lhanglam hui hung nung intin chule thil ijakai thipchet in aum jitai. 18 Sum-eng phatvet bangin van thamjolla konin asa chu akikhodoh sah jin ahi, hichu nangin nabol the idem? 19 Hijeh chun Pathen komma ipi kasei diu ham? Keihon imacha hetna kanei pouve. 20 Pathen in akomma thu kasei nom hi eihet peh dem? Mihem te jengin jong thil ahetkhen theilou teng ule thu akisei thei diu ham? 21 Huijin meibolho amut theng soh tengleh vantham jol'a nisa khu avah behseh jeh in eihon ive thei ji pouve. 22 Pathen hi molsang a konna sana lal loupina a kijemma hung'ah ahin ama chu alal loupina leh ahoina jousea kijemma ahi. 23 Hatchungnungpa thahat naho chu ei ngaito phah hoi hilou ahi. Ahijeng vang'in athudih in chuleh achonpha jinge. Aman eiho eisumang pouve. 24 Datmo umtah in muntinna mihem ten ama aging uvin, miching ho jouse ajanau avetsah uve.