Amosarini kuku
Yuwaa kirak Amosarini yandarangu anoo pakich kamanchintspa
¿Chakaja anoo yandarang?
Waana Amosarini nee kiraka yandarangiya. Amosarini yaktash Tekuwash nllurtarangiya. Anshutam taarangu, mzatspaneemsha kinarangu, opeejaa uru ksutarangiya. Tekuw Belenganungiri taariya Utaásh watsapunu. Nduntaa Amosarini Apanlleem kamanipanish pshturangu, zapishsha Apanllsha Amosarinee, Opeejareetsish kasayarush, nuwaa tputsiri Israelchichee nuwaa kuki tayaspatashincha, tárangiya.
¿Chakaama yandarang?
Amosarini Utaásh tsap taarangtaa, ashiritaa Apanll Israelap tsap kamanishini tárangiya. Ashiriya, Amosarinsha yaktarineetsi kasarangu, Israelap tsap naatarangu, yaktash Betelash Apanllee kuk kamanirangiya.
Anpuru Jerobowamarini kizpur kurakaam kinarangu, Israelshuch tputs kizpuritam taaranganaya. Kurakshtisin ichingurusin kurkiyaam kinarangana. Apanlleem shaniyarangsin, mangutari tsiyatstar ashiranganaya. Kizpur taarangitaatssin, ashiritaa kizpur yutarit taaranganaya. Pukiree tputsi kiyung yacharanganaya. Mangutari Apanllpat tsiyatarangana; nda mangpatari chinaranganaya. Watam apanllputseemarisha chinaranganawa.
Ashirucha, Apanllsha, Yuwamand nuwaa kasarangana anumand kizpur wanichima, tárangiya. Ashiriya, shiysha Amosaa, amb nuwaa kuki wanimpani kamanishini, tárangiya.
¿Mayaamaja yandarang?
Yuwamand Israelshuch tputs kizpur yutarit taarangana anoom wanimaam Amosarini tárangiya. ¿Mayaam siy yutarit ashiksa? Watsta; shirintspa. Papcha, Apanll siyaa kizpur waneerunts, tárangiya. Nuw siyaa atina: Yutaritshishee kasayarus, wanasirimsheetsimarisha chinangtsa. Siy kurakis tsiyatssee itsinsaru yasayarus, wanasirimshee tputs napangtsa. Yutaritshishpaneetsimsha waneeyarus ksangtsa. Amb ashkachinaareesa, Apanll kizpureeru, siyaa istakchu, kisshaparee tsapunshis taatssa. Siyaa Israelchicheetsis ndusha izuuru wanichima, Apanll siyaa átcha, tárangiya. (5.15)
¿Mayaatseeja kamanik?
Na yuwaa kamanku anoo kamanchintspa.
1. Apanll tsapurunasshuchee tputs kizpur wanichiya. (1.1—3.2)
2. Apanll Israelshuchee ashiritam wanichitamtaya. (3.3—6.14)
3. Amosarini waneeshshee zameetpata pamazurangiya. (7.1—9.10)
4. Zapishparee Apanll Israelchichee izuuru istachiya, (9.11-15),
Amosarini tárangiya.
Nuw Amosi Apanllee kuk kamanchintspa
1
Ashiriya, yuwaa Apanll Israelchichee kapung tsiyatarangu anoo kamanchintspa
1 Ashiriya, nuw Amosi Tekuwash opeejaa ksutamapan taaruri, anushsha Apanll Israelchichimun tsiyatssee kamanirangiya. Yuw mundaz mundaztachu, an tsimbun masach pshataru, anush nuwaa kamanirangiya. Anpur Osiyas Utaásh kurakamuna, Jerobowamsha Jowasarini wip Israelchicheem kurakamuntamta.
2 Apanll nuwaa tsiyatarangu, Siyonamand kuk kimarangu,
kariy tamapari ashiru zungan zungan ashirangiya.
Irusarinamand kizpur zunganeerangu,
tsapsha kizpur zpuzarangu, ichingaru maachi mawiruyaru, mchiroorangiya.
Machpitaa íwar Karmelu sur kizpur mawiruyaru, mchiroorangitamta.
Apanll tsiyatku amb ashirangiya.
Kamanchintspa yuwaa, Israelanung tsap tputs yutarit taarangana anoo nuw wanichima, Apanll tárangu, anootsi
3 Ashiri siyaa Damáskushcheetsis Apanll tárangiya.
Siy Damáskushchis kapung yutaritshishi chinarangus,
Galaadshuchee tputs tirikoo ngusambpat tokuch tamatarpachi ashiru chuwiyarus, kasarangis,
anumand nuwsha siyaa zurampatari wanichintspa.
4 Anumandtam nuwsha sumasee zanganchima.
Kurakaa Asayela nlluranur ichingaru kachingchima.
Mishat, Ben-jadadtam pang' pangurangana anootstam ichingaru muchchitamma.
5 Siy Damáskushchis pshtumaam wachoo kámanartaateesa,
anoo nuwsha wizpurirpati tawateeruri, Bikat-avenshucheetstam kurak,
misha Bet-edenshucheetstam kurak ashparitaatsis siyaa Síriyashcheetsis tputsis putayarusin,
arap Kirip tsap machinllinaya Asirshuch tputsiya,
Apanll siyaa tárangiya.
6 Filistewshucheetssha Apanll tárangitamta.
Gasshuch yutaritshisheetsimaritam chinarangusin,
tputsee ichingaru machtayarusin,
muchchureetspaz ashiru Edomshucheemsha tupaxanxarangana,
anamand nuwsha zurampatari wanichima.
7 Ashirucha, anumandtam sumasee Gasshuch tandapunurangana anoo mucheeruri,
kurakpatari pangu izuuru muchimaam zanganchima, atina.
8 Wizpurirpati Asdodshuchee urkar,
Askalonshucheetstam urkar izuuru tpachingayaruri kasachima.
Ekronshucheetstam urkar nduntam pakchiyam nayanikuri, izuuru tpachingachima.
Amb ashkachuri, Filistewshuch ashpari tsipachinllinaya,
Apanll tárangiya.
9 Tirshucheetssha tárangitamta.
Tirshuch kapung yutarit chinarangana.
Zoonlleetspaz ashiru tputsee amikurtayarusin,
anootssha tamapingayarusin,
muchchureem ínayarusin,
Edomshucheemsha tupaxanxaranganaya.
Anumand nuwsha zurampatari wanichima.
10 Anumandtam Tirshuch tandapunurana anoo muchkachu,
kurakpatari pang' wanasireew pangurana anpatari muchimaam sumasee zanganchima,
Apanll tárangiya.
11 Edomshucheetssha Apanll tárangitamta.
Edomshuch kapungtam yutarit chinarangusin,
waanaatstaata zoonll Israelchichee nda nayanimaam zandkusin, pacharanganaya.
Yuwari zandkana anuri watsiyun sitarangsin, zoonlleetstaa kachingaranganaya.
Anumand nuwsha zurampatari wanichima.
12 Ashirucha, Temanshuchee, misha Bosráshcheetstam kurakaam pangurangana
anoo ichingaru muchimaam sumasee zanganimaam zandkina,
Apanll tárangiya.
13 Amónshucheetssha tárangitamta.
Amónshuch kapungtam yutarit chinarangusin,
Tsapunni kapungup, atusin,
Galaadshuchee tpachingayarusin, kiz mireeru, anoo pachayarusin,
chikaa taarayarusin, kasaranganaya.
Anumand nuwsha zurampatari wanichima.
14 Anumandtam Rabaa yakat tandapunurana,
anoo muchkachu, kurakaam pangurangana,
anpatari muchkachu, tapazish pachaksin,
kizpur zunganitaru ashiru, muchimaam sumasee zanganimaam zandkina.
15 Amb ashkachuri, urkarshitisin, misha yuwatamsin nuw kizpurtana átana,
antamsin arap naakchusin, imarchachinllinaya,
Apanll tárangiya.