Unang Surat i Pablo dut mengeꞌ tawʼt
KORINTO
Kepurisnan et itueng Surat neng 1 Korinto
Sinurat i Pablo sengmenu surat dut mengeꞌ mengengandel dut Korinto, temed maya tyu duwa lang tinektak dut Biblia tyu. Itueng surat betengen tyu Unang Korinto. Sinurat i Pablo dut mengeꞌ tawʼt Korinto sabab et kesusaan neng timimbuꞌ pasal et pemimiyag et mengengandel dut peneteg i Pablo neng pegtimung-timungan et mengengandel na dut lungsud et Korinto. Atin neng Korinto tagnaꞌ tiꞌ kelang lungsud et kabisera dut probinsiya et Akaya, seled bangsa et Griego. Pegkilelanen atin ne kelang mabbu naꞌ pinegarat, lekep naꞌ pemimiyag neng megpekibeis, bekeꞌ kekinensangan neng mengeꞌ egama.
Segwaꞌ elulaꞌ banar pegsusaan et ating bibilinan neng si Pablo, pasal eset pegpekparak bekeꞌ pemimiyag neng megpekibeis dut seled et pegtimung-timungan et mengengandel bekeꞌ mengeꞌ ingkut pasal eset napsuꞌ bekeꞌ pegesawa, penedseled, keusayan dut pegtimung-timungan et mengengandel, begey et Empung Nakem, bekeꞌ pegbiyag peuliꞌ. Sabab et tantung kesesewran pinebiriꞌ ye baꞌ enukwan ating Menungang Abar meres dut itue neng mengeꞌ ingkut.
Dut Kapitulu 13, pinesewd ye pegmergaꞌ, atin banar luwas dut ibang begey et Empuꞌ dut kenyeng mengeꞌ mengengandel. Kapitulo 13 kaluꞌ na tantung pegkilelanen naꞌ bagiꞌ dut seled itueng buuk.
Ketulduan et itueng Surat
Peribasa Kapitulo 1:1-9
Pegpekparak mengeꞌ Taaw dut Pegtimung-timungan 1:10—4:21
Napsuꞌ bekeꞌ Biyag Keusbaan 5:1—7:40
Mengeꞌ Mengengandel bekeꞌ Mengeꞌ Kaya Mengandel 8:1—11:1
Pemimiyag et Pegtimung-timungan et mengengandel 11:2—14:40
Pegbiyag Peuliꞌ i Kristo bekeꞌ Mengeꞌ Mengengandel 15:1-58
Seraka eset Mengeꞌ Mengengandel dut Judea 16:1-4
Pasal eset Diri bekeꞌ Penimpusan 16:5-24
1
1 Itueng surat mawaꞌ ki Pablo neng piniliꞌ sabab eset gaay et Empuꞌ neng negmendyaring Apostol* 1:1 Apostol - ingin bersen “Bibilinan etawa Mengengabar et Empuꞌ”. Betsaen “apostol” eset Diksyunario. , ingin bersen Bibilinan i Jesus Kristo, bekeꞌ mawaꞌ dut tipused tyung si Sostenes.
2 Dut mengeꞌ pegtimung-timungan et mengengandel et Empuꞌ na dut lungsud et Korinto, eset ginsaʼt piniliꞌ supaya megmendyaring pasek metignaꞌ neng taaw et Empuꞌ sabab et pekikisembatu dut ki Jesus Kristo, sampay ginsaʼt dut peembe-embe neng pemengempuꞌ dut Begerar neng si Jesus Kristo, kedyeng Begerar sampay kityu.
3 Mesen teyen redyikiꞌ bekeꞌ kesenangan et Empuꞌ neng Amaꞌ tyu bekeꞌ Begerar tyung si Jesus Kristo.
Mengeꞌ Redyikiꞌ teyeg ki Kristo
4 Daran ku pegpeselamat dut Empuꞌ pasal eset dimyu sabab et redyikiꞌ neng binggey ye dimyu pebiyaꞌ ki Jesus Kristo. 5 Sabab eset pekikisembatu dut ki Kristo, kemyu negmendyaring mentiriꞌ dut ginsaʼt ginis, peiibut dut pememresan sampay kesesewran. 6 Ating keberbenaran neng pegtutulduꞌ kay dimyu pasal ki Kristo, atin melinew mekebiriꞌ set dimyu mengeꞌ sebayaꞌ sabab et pememresan sampay kesesewran myu. 7 Enu ga diki kew negkurang dut enu-enung mengeꞌ begey teyeg et Empung Nakem, sasat kemyu megtetagey na mebunayag Begerar tyung si Jesus Kristo. 8 Ya in daran dyeganan kemyu seked kepuspusan, supaya tumeteg kew set pengandel myu seked na dumateng ating eldew na muliꞌ Begerar tyung si Jesus Kristo. 9 Mebentel Empuꞌ neng nemiliꞌ dimyu supaya mekisembatu dut kenyeng yegang neng si Jesus Kristo naꞌ Begerar tyu.
Pegkekepekparak-parak dut Pegtimung-timungan et Mengengandel
10 Mengeꞌ ketipusdan, megpengasiꞌasiꞌ ku dut dimyu sabab et kepengdyarian et Begerar tyung si Jesus Kristo, na megsulut-sulut kew ginsan supaya diki kew pegkekepekparak-parak, supaya mekisembatu kew dut pikiran bekeꞌ mengeꞌ paru buwaten myu. 11 Mengeꞌ tipused ku, ipineabar daken et mengeꞌ sengkebenwa i Kloe na kemyu kunuꞌ maya pegiiseg. 12 Itue ingin ku bersen, kwat sembatu, “Eset ki Pablo ku.” Sugid gasi et sembatu, “Eset ki Apolos ku”. Maya gasi pegsugid, “Dut ki Pedro aku”, bekeꞌ maya nega iba megsugid, “Aku eset ki Kristo”. 13 Manu! Nebagiꞌ be takuꞌ si Kristo? Si Pablo be takuꞌ ating rinansang dut krus sabab et dimyu? Binewtismuan kew be takuꞌ supaya mendyaring pengenaren i Pablo?
14 Salamat dut Empuꞌ, kaya binewtismuan ku eset dimyu selyu de Krispo bekeꞌ si Gayo lang. 15 Angkan kaya mekepegsugid dimyu na kemyu binewtismuan ampaꞌ mendyaring pepengenaran ku. 16 Nerendeman ku pelan, binewtismuan ku gasi ating sengbinenwa i Estepanas. Lyu kedye, kaya ne mekerendeman ku na binewtismuan ku. 17 Sabab aku tuꞌ dinaak i Kristo, diki supaya memewtismu, erapun supaya menulduꞌ et Menungang Abar. Ipegtutulduꞌ ku pesi itue segwaꞌ diki sabab dut pememresan kuyun dut kesesewran et taaw petetaaw. Angkan supaya diki meugaran et kepengdyarian ating kepeteyan i Kristo dut krus.
Si Kristo Kepengyedian bekeꞌ Kesesewran et Empuꞌ
(2 Korinto 2:16)
18 Dut mengeꞌ megkebinasa dut Narkaꞌ, ating ketulduan pasal eset pegkematey i Kristo dut krus atin kerupangan. Segwaꞌ dut kityu sebarang nemekebawiꞌ, atin ketulduan kepengyedian et Empuꞌ. 19 Nesurat ne et Empuꞌ dut buuk i Isaias,
“Rungkaten ku ating kesesewran et mengeꞌ mekesewd bekeꞌ ugaran et kepulusan ating pendey et mengeꞌ mepependey.”† 1:19 Isaias 29:14.
20 Enu kepulusan tiban et mekekesewd, et mengeꞌ menunulduꞌ et Keseraan binggey et Empuꞌ ki Moises, sampay et mengeꞌ mepependey neng mengderawa eset penewnan naꞌ itue? Ipekilala et Empuꞌ na ating kesesewran et mengeꞌ taaw et sengkedunyaan naꞌ itue kerupangan. 21 Sabab kuyun dut kesesewran et Empuꞌ, diki ye ipegtugut na ya mekilala et taaw sabab dut kesesewran et sengkedunyaan naꞌ itue. Segwaꞌ nepesegya Empuꞌ na usalen et keblan dye kedupangan neng Menungang Abar neng dameng ipegtutulduꞌ apang puwasen dye in na nemengandel kenye. 22 Ating mengeꞌ Judio in, dye in nanew et keliꞌliluꞌ bilang pesebanar, bekeꞌ pegtutulusen et mengeꞌ tawʼt Griego kesesewran. 23 Angkansa ganang ipegtutulduꞌ kay pasal et ki Kristo naꞌ Mesias‡ 1:23 Mesias - ating piniliꞌ et Empuꞌ apang memegbeg atuʼt dunyaꞌ na itue. Ating Mememawiꞌ et ginsaʼt taaw pasal kedyeng mengeꞌ salaꞌ bekeꞌ kedusaan et Empuꞌ. neng neransang dut krus, sembatung keseruruan dut mengeꞌ Judio bekeꞌ kaya keguna-guna dut mengeꞌ tawʼt lein Judio. 24 Segwaꞌ dut mengeꞌ piniliꞌ et Empuꞌ, misan Judio etawa Griego ne, si Kristo ating kepengyedian bekeꞌ kesesewran et Empuꞌ. 25 Sabab kwan tyu lang na atin kerupangan et Empuꞌ segwaꞌ pelan ating kesesewran neng luwas dut kesesewran et ginsaʼt taaw, bekeꞌ ating penganal tyu kelumkan et Empuꞌ, pelan atin basag neng luwas eset basag et ginsaʼt taaw.
26 Kemyu mengeꞌ mengengandel, kinkiranaꞌ myu dimyung kepentangan ganang piniliꞌ kew et Empuꞌ. Sesenu ga dimyu ating mekesewd dut penyek et mengeꞌ tawʼt sengkedunyaan. Sesenu dimyu ating mekepengdyarian. Sesenu dimyu ating esen-esenan. 27 Segwaꞌ piniliꞌ et Empuꞌ sebarang mebaba dut penyek et tawʼt sengkedunyaan supaya inlelewen sebarang mekesewd, bekeꞌ piniliꞌ et Empuꞌ ating merurungkey neng kekepentang et tawʼt sengkedunyaan supaya inlelewen sebarang mebebasag. 28 Piniliꞌ ye ating pegentangen naꞌ mebaba, kaya keguna-guna, bekeꞌ kaya kepulusan dut sengkedunyaan naꞌ itue supaya meugaran et guna ating mengeꞌ pegpantang na derekelaꞌ dut sengkedunyaan. 29 Angkansa kaya mekedyaring megpeabbu dut elepaʼt Empuꞌ. 30 Segwaꞌ dut kenye mawaꞌ ating pekikisembatu tyu ki Jesus Kristo na binwaʼt yeng kesesewran tyu. Sabab ye kityu metignaꞌ dut pemiriꞌ et Empuꞌ, sampay pinegpendyaring tyu pasek metignaꞌ bekeꞌ binawiꞌ tyu. 31 Angkansa pesi samat pegsugiren dut Kesuratan, “Ating Begerar Empuꞌ meipegpe-abbu et sebarang meingin megabbu.”§ 1:31 Jeremias 9:24.
*1:1 1:1 Apostol - ingin bersen “Bibilinan etawa Mengengabar et Empuꞌ”. Betsaen “apostol” eset Diksyunario.
†1:19 1:19 Isaias 29:14.
‡1:23 1:23 Mesias - ating piniliꞌ et Empuꞌ apang memegbeg atuʼt dunyaꞌ na itue. Ating Mememawiꞌ et ginsaʼt taaw pasal kedyeng mengeꞌ salaꞌ bekeꞌ kedusaan et Empuꞌ.
§1:31 1:31 Jeremias 9:24.