Wosheetso P'awlos Wosho
K'olasiyas Ashuwots Maants
Kindo
Woshan b́ guut'e múk'ú Isiyotse Ephesoniyere aawkesho maantse daatseyiru K'olasiyas kittutsi Ik'i moowushe. Ik'i maa man bneed' P'awlosn woto b́k'azalor Rom shirotse keweetsu Isiyi kitt een wottsu Ephesonitse doo shishiyosh woshetswotsi b́ woshefotse K'olasiyastsnowere alo detsfe b́teshi. K'olasiyas Ik'i mooshowere biatse alo detsefe b́tesh, K'olasiyas Ik'i mootse «Ik'o danonat s'een beyo daatsosh asho ik ikon shayiri angwotsnat naashwotssh sagado geyituwe» etiru kootets danifwots bo beyok'o P'awlos shishre b́tesh, daniifihanoots boetirwo k'osh keewo «Asho ik ikon gof amook'o wotts nemwotssh keeweyarr mishonat k'osh niwuwotsi koto bín geyife» etka b́tesh.
P'awlos woshan b́ guut' arik wotsts krstiyani dano t'intson bo kooti dano k'efosha btesh, b́ t'intsts aniwwotsitsere eeno «Iyesus Krstos s'een wotts beyo imetwe, k'osh imnetiyotsnat k'aleyirwotsnmó bíyatsne asho bowokiyiti» etiruwoniye, Ik'o Krstosn datso b́ azii, b́ weeronowere b́ maantsan aani de'er b́ weeti, datsu kashi jango b́ detset Krstosi nibon amanon mec'rone, han jangosh P'awlos een danan amantsuwots beyon aawk'on sháánr b́be'etwok'niye b́ kitsiri.
Woshan P'awlosoke dek't K'olassiyas maants betsosh wosheetso Tikik'osnton beyirwo Onesimosi b́ wottsok'o s'iilo shenge, mansh P'awlos Onesimosi eteetso guutso jango tuzt Filmonsh k'osh wosho guut're.
Jamon mas'aafan b́detstso
Kindo 1:1-8
Krstos doyonat finon 1:9—2:19
Krstosn handr beyo 2:20—4:6
Gúúpo 4:7-18
1
1 Ik' shunon Krstos Iyesush wosheets wottso P'awlosn at no eshu T'imotiyosoke.
2 K'olasayasn beyiru Krstosn S'ayinonat amanek wotts amantsuwotssh.
Ik'o no nihokere deeronat jeenon itsh wotowe.
P'awlos Údo K'olasiyas Ashuwotssh
3 It jangosh Ik'o t k'onor nodoonz Iyesus Krstos nih Ik'o úni aawo údirwone. 4 Krstos Iyesusn it detsts imnetiyonat amants jamwotssh it detsts shuno shishrone. 5 Ari aap' wottso doo shishiyo shin shino itok b́bodor bítse fa'a jangeyirwo shishirute, mansh it imnetiyonat it shunon b́need' darotse k'aniyere itn kotirwo jangiyetsmanatsne. 6 Dooshishiyan dats jamatse shwonat eenoke b́fa'oni mank'o it doo shishyo itk'ebiyakonat Ik'i s'aato arik b́wottsok'owo t'iwints itdek'iyak aawotstson it dagots finoke b́faoni. 7 1:7 K'ol. 4:12; Film. 23 Hanowere no shegro Krstos guuts amanetso wottsonat noontonuwere towaat finirwo shuneetso Ep'afray itsh keewre. 8 Mank'owere Ik'i Shayiron it atsatseyo it shunewo bí noosh keewre.
9 Mansh han noshishts aawotstson tuwat Shayiri dani teleefon t'iwints jamo Ik'i shunon t'iwints itdek'etu s'eents dano it detsetwok'o itsh Ik' k'ono ned'iratsone. 10 Mank'owere doonzosh wotts weeron beyarr b́ jamon bín it gene'ushitwok'o kon naari sheeng fino finon shuwo it shwitwok'onat Ik' danon eenfere it ametuwok'o Ik'o k'onituwe. 11 Doonzo aydek' een wotts b́ kup'on itsh ang jamo ime, k'amoon jam keewo falon k'andek'tswotsi it wotitwok'o itn woshwe, 12 dabnuere shááni mengstutse S'ayinwotsnton rstiyo it kayitwok'o itn betsts Ik'o niho gene'on údooere. 13 Bíwere t'alwi angotse noon kashit shuneets naayo mengstots no kinditwok'o woshre. 14 1:14 Efe. 1:7 Bíínowere noo aaniyi keeweyat no morrosh orowe eto daatsrone.
Krstos azeets jamoniyere damb b́wottsok'o
15 Krstos be'eraw Ik'osh bíariyoniye. Bí azeets jamoniyere k'aabe. 16 Daronat datsatse fa'awots, be'eyirwonat be'eraw, daratsi angwotsnat keewirwotsno, naashwotsnat aliru jamwots bo azee bíne. Ik'o jam keewo bí az bín bíshe. 17 Bí jam keewoniyere shine b́ teshi, jam keewo desheyat b́ need' bíne. 18 1:18 Efe. 1:22-23 Bí bí ats wotts Ik' moosh b tooke, jam keewon shntso b́ wotitwok'o, k'irotse tuwon shintsonat k'aaboniye. 19 Han b́wotwere Ik'o Ik' b́woti s'eeno b́ naayn b́wotish Ik'o niho shuntso b́wottsotsne. 20 1:20 Efe. 2:16 Bínowere daron wotowa datsatse fa'a keewu jamwotsi b́ tookonton maniyo shunre, jitatse kud'ts b́naay s'atson jeeno b́woshi.
21 Shin Ik'atse wokaatni it beefoni, it asaabiyona it gond finatse tuutson balangarwotsiye it teshi. 22 Andmó S'ayinwotsnat eegonor s'amiyerawotsi, boatse eeg eeg daatserawotsi woshdek't b́shinats itn t'intsosh, b́ naay meetson b́ k'irtsosh, Ik'o b́tookonton itin b́ maniyi. 23 Han b́ wotitwere bíyats need'dek'at matseyat bíko dooshishiyatse daatsosh jangiyets keewatse it giwrawo amanon kup'arr it beewor s'uziye, dooshishiyanwere it it shishtsonat datsatsere fa'a ashuwotssh nabetsoniye, taa P'awlos guutso twot dooshishiyanshe.
P'awlos woshetsi fino
24 And it jangatse tdek'iru gond bek'osh geneeúwirwe, bíats wotts Ik'i moowshowere Krstos gondbek'o kaydek'oonton taash shapitwo tmeetson s'eentsitwe. 25 Ik'i aap'o s'eenon itsh kitsosh Ik'oke taash imets alok'oon Ik'i moosh fintso wotere. 26 Ik'i aap'onwere beshts dúron shweets ash na'úwotssh ááshat teshtsonat andmó Ik'o bík S'ayinwotts jamwotssh b́kiitsts ááshat teshtsoniye. 27 Ik'onwere bík S'ayinwotssh kitsosh b́geeyir hanoke fa'o ááshts mangi gaalo ititse Ik'i ashwoterawwots dagotse awuk'o bodts een b́wottsok'oniye, ááshtsanwere jangat nokotiru mang bín datsetu Krstos ititse b́ wotoniye. 28 Asho ik ikon Krstosn bodtso b́wotitwok'o kaldek'at t'intsosh ash jamosh dani teleef jamon daniyat izon Krstos jango nabirwone. 29 Ik'o bíeen angon tgitsotse b́ finirwotse angaann no keewtsán b́finetwok'o kup'dek'at maak'orefetsat shaatsirwe.