Wosheetso P'awlos Shints Wosho
T'imotiwos Maants
Kindo
T'imotiwosi eteets jawets na'o krstiyano Esiyi datsatse b́teshor, induwereron Ayhudi datsi asha, niho weeronmó Grik dats asha b́tesh, P'awlossh karntso b́ tohonat doo shishi finoshowere karnon bish tep'foni b́ tesh, P'awlos T'imotiwossh b́ guut'ts wosho shintso keez keewu een eenuwotsatsa b́ kitsir.
Jamoniyere shino b́woshotse b́daniyruwo Ik'i mootse tuut teshts kooti danatse boatso bokotetuwok'owa b́tesh, ib wotts danman b́ bado ayhudiwotska, b́ badonmó k'osh naari ashuwots hasabiyo b́ gitsotse detsts wotat, «Be'eyiru datsan morron baad'ewutsk b́ wottsotse kasho daatso falet k'osh wotts weeron ááshts danonat ik ik naari mishuwtsnat de'eyatse bíats kotonee» eti asaabiyatse te'eeka b́ tesh. Manats dabt b́ woshotse Ik'i maa k'eezi jangonat Ik' mangiy jangosh nemona, aani Ik'i maa jishiruwotsnat boon teú'awots detset boon geyit amalo kitsituwoniye. B́ s'uwaatsnowere T'imotiwos Iyesus Krstosko doo guutso awuk'o wottso bín b́ geyituwok'onat b́ beyiru ay ashuwotsoke bín s'iilit keewotse aatewotse P'awlos bísh b́ iztso datsituwone.
Jamon mas'aafan b́detstso
B tuwo 1:1-2
Ik' moonat b́ guutsuwots jango 1:3—3:16
T'imotiwossh b́ fini jangosh imets dano 4:1—6:21
1
1 Ik'o no atoke no nojangtso Iyesus Krstos tzaziyon woshek wottso P'awlosoke.
2 1:2 Wosh. 16:1 Imnetiyon ari t naayi wottso T'imotiyossh, Ik'o nonihokere, nodoonz Iyesus Krstosoke s'aatonat mihretiyonu, jenonu neesh wotowe.
Kooti danatse boatso bokotetuwok'o b́ k'altsok'o
3 Mek'edoniy maants tiamor neesh oona ti ettsok'on, manoke fa'a ash ik ikuwots kooti dano bodanirawok'o nwoshish Efesonitse beewe. 4 Tururonat s'uu deshaw naar taawo maants k'ayr boanerawok'o boon azazowe, keewanots moosha bodoweti bako amanon fineyiru Ik'i finosh t'ak'ameratsnee. 5 Tzaziyanmó nib s'ayinotse, asaabi s'ayinon, arik wotts amanon daatsets shunoniye. 6 Ik ik ashuwots keewanotsatse k'aleyat k'awunts deshaw moosho maants k'az anernee. 7 Man bok'aluwere nemo daniyruwotsi woto geeyatniye, wotowabako bokeewiruwo danatsne, arkeewetsnone boetirwono t'iwintsratsne.
8 Asho geyitsok'on bín b́finiyal nemo sheeng b́wottsok'o danfone. 9 Mank'owa nemo ned'iye ash kááwuwots b́woterawk'o danfone, nemo beeze mishetswotsnat k'uur finetsuwotsshe, Ik'osh k'erawwotsnat morr finetsuwotsshe, s'ayin woterawwotsnat kash keewo gac'iruwotsshe, bonihonat bo indon úd'iru kash úd'iruwots, 10 Widetswotsna, g'ad'wotsnat, asho up'dek'amt kemiru jaktswotsnat kootetswotsi, kooton taarirwotsnat arik wotts dano k'uriru keew jamo finiruwotsshe. 11 Arik wotts danonmó b́ daatset mangiyets Ik'o b́ shishits mangts doo shishiyone, doo shishiyanwere taash adar imetsoniyee.
P'awlos Ik'o oorowe eti jangosh b́t'intsts udo
12 Finosh taan amanetso woshde naashiyosh taawdek't imtso nodoonz Iyesus Krstosi udirwe. 13 Dab haniyere shin Krstosi c'ashtsonat gishtso, ketitso twotiyalor, bí taash mhretiyo b́woshi, bíwere taash mhretiyan b́wosh taa jaman t k'al daronat aman tk'aztsatse tuutson b́ teshtsotsne. 14 Noo Ik'o s'aato Iyesus Krstosn nok wotts imnetiyonat t shunonton s'eent ooytso taash imere. 15 «Iyesus Krstos morr finetswotsi kashiwosh datsats waare» etiru aap'o arikonat ash jamo dek'o bin b́ geyit keewe, morrets jamuwotsitsnor bítsi bog morretso taane. 16 Ernmó taash mihretiyow oshere, taash mhretiyo woshere Iyesus Krstos ayidek't ayts b́ k'amoon ashe dash morretso wottsosh tiatse kitsosh bín amanitsuwotsnat dúre dúri kash datsituwotssh sheeng artso t wotishee. 17 Mansh dúre dúri Nugúsosh, k'irrawosh, be'erawosh, Ik'o Izar Izewersh mangonat udon bísh dúre dúrosh wotowe! Amen.
18 T naayi T'imotiwoso! haniyere shin njangosh bek'on keewetsok'on azazets adaranotsi neesh imetuwe, bek'mann jisheyar kes'i sheengo kec'ee, 19 Amanonat maac' s'ayinetso wotowe, ash ik ikuwots bonibo bojuutsatse tuutson markabo jongon b́t'ffok'o bo imnetiyo t'afs'uure. 20 Boyitse Hemenewosnat t Iskndrn fa'enee, boowere Ik' c'ash aap'o keewo k'azo bo danetwok'o Shed'anosh beshidek'at imik'rere.