1 Pali e Isu i lakea na lolo e Oliva. 2 Na parava muri na hatelanga poko­poko i lakea tabu na roho na Vure. E huriki a bakovi a ngatavine ri valai maia, ri made haluia, lakea i made puru i vara ria. 3 E huriki a mari na vinara, a Pariseo ri tuli vilia tara ngatavine i parangi, ni matavisi i rata a rabu na molenga. Lakea ri vakapesia na matane huriki. 4 Ri takia e Isu ri ta maea, “Mari ni tovo, ra ngatavine iea, mi masia i rata a rabu na molenga. 5  * Levi 20:10; Vin 22:22-24Na vinara ne Moses ra ngatavine maea bara ni padimate na kedo. Pali o ta navai ke?” 6 Ri nana maea a vuhuna ri ngarua ge ratea tara ngava ri gi padi virihi ia vona.

Pali e Isu i pasike puru, i vakatubu ni here na malala na kukulimana. 7  * Vin 17:7Ri nana vilihui, lakea i pesi rike i taki ria, i ta maea, “E rei tara ne mua i uka ma i rata kilala a rabu hale, ge padi mugea a ngatavine iea.” 8 Muri i pasike puru tabu i here na malala.

9 Ri longoa a ngava iea, lakea ri malaga gosi­gosi tala, ri vano. E huriki a gare ri vano muga. Ri vano lobo ria, e Isu kikeri i made turana ngatavine iea. 10 Muri e Isu i pesi rike i nanea, “Ngatavine, a vai ria? E rei tara ne ria ge taki ioe go mate?”

11  * Ion 5:14A ngatavine i koli, i ta maea, “Bakovi Dagi, i uka.”

Lakea e Isu i ta maea, “Pali iau tara, i uka ma ga taki ioe go mate. O vano ngane, o lobo ni rata a naro hale.”

12  * Ais 49:6; Ion 1:4-9; 9:5; 12:46Na tahuna e Isu i vara tabu, i ta maea, “Iau a nipara na malala. E rei a viri i muri nau, i uka ma ge laho tabu na uvo, bara i tahoka a nipara i habi a nimahuri.”

13 E huriki a Pariseo ri hehe, ri ta maea, “Masia ngane, ioe kikeri o ta ne vomu, pali i uka tara viri ge kori ioe na ngavamu ge muholi.”

14  * Ion 5:31-32; 7:28E Isu i koli, i ta maea, “Bara iau kikeri a ta, pali i uka tara viri ge kori iau na ngavagu, a nitagu i muholi, a vuhuna a lohoka vona a hini a valai vona, a hini ga lakea vona. Pali mua, i uka ma mu lohoka vona a hini a valai vona, a hini ga lakea vona. 15  * Ion 12:47Mu pelekado e huriki na rabu na malala kunana, pali iau i uka ma pelekadoa tara viri. 16  * Ion 5:30; 8:29Pali iau bara pelekado a viri, a nipelekado nau bara i muholi, a vuhuna i uka ma iau kikeri. A pesi turane Tata, ra viri i rudu iau a valai. 17  * Vin 19:15Na vinara ne mua ni here puru i ta maea, a bakovi ala rua ru gu taki tala a ngava, a ngava iea i muholi. 18  * 1Ion 5:9Iau a taki tala mule a ngava nau ne mua, pali a viri i tuhori iau na ngava e Tata, ra viri i rudu iau a valai.”

19 Muri ri nanea, “I vai e tamamu?”

E Isu i koli, i ta maea, “I uka ma mu lohoka nau o ne Tata. Mua bara mu lohoka nau, e Tata tara bara mu lohoka vona.” 20  * Ion 7:30I taki e huriki na ngava nga na tahuna i vara na tabeke na roho na Vure, tabukoi na hini ni ru a nihabi vona. Pali i uka tara viri ge lakavua, a vuhuna a parava vona i uka ma i valai ma.

21  * Ion 7:34; 13:33E Isu i taki tabu ria, i ta maea, “Iau popote ga vano, lakea bara mu matakana iau. A naro hale ne mua bara i tabuli, mu mate turana. A hini ga lakea vona, bara mu keri ni valai vona.”

22 Lakea e huriki a Iuda ri vanana, ri ta maea, “Ra bakovi iea, i taki a hini ge lakea vona bara si keri ni bele vona, ma ge tomo.”

23  * Ion 3:31Pali e Isu i ta lokovonga liu, i ta maea, “Mua e huriki a bakovi na malala kunana. Pali iau a bakovi na hunu. Iau i uka ma a bakovi na malala. 24 A taki mua pali, bara mu mate turana naro hale ne mua. Pali mua i uka mu gu luhoi ge iau ra iau kunana,* A ngava e ‘iau ra iau kunana’ a rana Vure na Ngava Dagi Hosi, re Iave. E Isu i ta maea, i manga i taki ia a Vure. muholi hateka bara mu mate turana naro hale ne mua.”

25 Ri nanea, “Pali ioe e rei ke?”

E Isu i koli, i ta maea, “Iau ra viri a taki mua vona pali. 26 Iau a tahoka a ngava i kupo na tahuna bara pelekado mua. Pali a viri i rudu iau a valai i ta muholi hateka. A ngava a longo vona, a taki polo ne huriki lobo.”

27 A viri i taki ria vona e Tamana, pali i uka ma ri longokilala a hini i taki. 28  * Ion 3:14Lakea e Isu i ta maea, “Na tahuna mu bole rikea a Tuna Bakovi, bara mu matakilaka vona iau kunana ra viri a takikia. Bara mu matakilala iau i uka ma a ratea tara maki na ningaru nau kunana. A taki polo kunana a maki e Tata i tovo iau vona. 29 A viri i rudu iau a valai i made turagu, i uka ma i pe iau, a vuhuna a rata vakaroro a maki ge vivi vona.” 30 Na tahuna e huriki ri longo a ngava i taki, i kupo ri luhoi torea.

31 E Isu i taki e huriki a Iuda ri luhoi torea, i ta maea, “Na tahuna mu longo­­toto a vinara nau, bara i mua a murimuri muholi nau. 32 Lakea bara mu lohoka vona a ngava muholi. Muri a ngava muholi bara i rata mua, mu matuka­paga.”

33  * Mat 3:9Ri koli ri ta maea, “Mia e huriki a hamone Abraham. Pali paru hosi i valai mona, i uka ma mia a vorakato na viri tara. Pali i navai a hini o taki mavonga mia, ta mi gi matukapaga?”

34  * Rom 6:16,20E Isu i koli, i ta maea, “A taki muholi mua, a viri i rata a naro hale ia a vora­kato na naro hale, i made polotano na tuhakanga na rabu hale. 35 A vorakato, i uka murina na kabu na matakari vona. Pali a tuna bakovi i tahoka a murina na kabu vona. A murina i tabuli vakaroro. 36 I mavonga kunana, a Tuna Bakovi ge rata mua mu matukapaga, bara mu matukapaga muholi. 37 A lohoka vona ngi, mua a hamone Abraham. Pali ngane mu ngaru ni rabalaki iau, a vuhuna a nitagu i uka ma i dili na hatene mua. 38 A taki mua vona a maka maki e Tata i vakasiri iau vona, pali mua ranga mu rata a maka maki mu longo ne tamane mua.”

39  * Mat 3:9Ri koli ri ta maea, “E Abraham e tamane mia.”

Lakea e Isu i taki ria, i ta maea, “E Abraham ge tamane mua, bara mu rata a maki e Abraham i rata. 40 A taki mua vona a ngava muholi a longo na Vure, pali ngane mu ngaru ni rabalaki iau. A vilo mavonga i uka ma a vilone Abraham. 41  * Ais 63:16A vilo mavonga a vilone tamane mua.”

E huriki a Pariseo i madihi a hatene ria ri ta maea, “I uka ma mia a tuna ngoi. E Tamane mia kunana a Vure.”

42 Lakea e Isu i taki ria, “A Vure i uka ma e Tamane mua. Ge ia e Tamane mua, bara mu ngaru iau, a vuhuna iau a valai na Vure, a bele koea. Iau i uka ma valai na ningaru nau. A Vure i rudu iau a valai. 43 I navai i uka ma mu longokilala a hini a taki? I uka ma mu longokilala, a vuhuna mu koi ni longo a ngavagu. 44  * 1Ion 3:8Mua e huriki e tune Satan, lakea mu ngaru ni muri mai a ningaru vona. Muga na hunu a malala ni ratarike, ia a bakovi ni rabalaki a viri, i koi ni muri mai a ngava muholi, a vuhuna i uka tara ngava muholi ge takia. Na tahuna i tami a viri, i ta na tabelena, a vuhuna ia a marapusi, a tamana marapusianga. 45 Pali i uka ma mu luhoi tora iau, a vuhuna iau a ta muholi! 46  * 2Ko 5:21; 1Pe 2:22E rei tara ne mua ge vakasiri, iau a rata a naro hale? Iau a ta muholi, pali i navai i uka ma mu luhoi tora iau? 47  * 1Ion 4:6E huriki a tuna Vure ri longototo a ngava a Vure i taki. Pali mua i uka ma mu longototo a Vure, a vuhuna i uka ma mua e huriki e tuna.”

48  * Mrk 3:21-22E huriki a Iuda ri koli a nita ne Isu ri ta maea, “I muholi ioe a bakovi o Samaria, i dili vomu a hanitu.”

49 E Isu i koli, i ta maea, “Iau, i uka ma i dili nau a hanitu. Iau a togoa e Tata, pali mua i uka ma mu togo iau. 50 Iau i uka ma a ngaru e huriki ri gi kavurike iau. Pali a Vure ia a mari ni pelekado a narone huriki. I ngaru e huriki ri gi kavurike iau. 51  * Ion 5:24A taki muholi mua, e rei a viri i muri mai a ngavagu, i uka ma ge mate.”

52 Na tahuna e huriki a Iuda ri longoa a ngavana ri kaha, ri ta maea, “Ngane mi lohoka vomu i dili vomu a hanitu! E Abraham i mate, e huriki a propet ri mate, pali ioe o taki ta a viri ge muri mai a ngavamu, i uka ma ge mate! 53 Ra ioe, o dagi hateka ne tamane mia e Abraham? E Abraham i mate, e huriki a propet ri mate. Pali ioe o luhoi ge ioe e rei ke?”

54 E Isu i koli, i ta maea, “Iau bara kavu­rike mule iau, a nikavurike nau a maki tavula. E Tata ra mu takia ta ia a Vure ne mua, ia ra viri i kavurike iau. 55 Iau a lohoka vona, pali mua i uka ma mu lohoka vona. Iau bara taki i uka ma a lohoka vona, bara marapusi manga mua, pali iau a lohoka vona, a longo­totoa a nitana. 56 E tamane mua e Abraham i pasimata ni matai a parava nau. Pali ngane i masia pali a parava iea, i vivi hateka.”

57 E huriki a Iuda ri hehe, ri ta maea, “A pida vomu i uka ma i ravulu lima ma, pali o taki ioe ta o masia pali e Abraham.”

58  * Ion 1:1E Isu i koli, i ta maea, “A taki muholi mua, muga ne Abraham ni poda, iau kunana ra iau!”† Na Nimariu 3:14 ra ngava iea, “Iau kunana ra iau” a rana Vure tara. Ia a pelegona e Iave. 59 Na tahuna i ratea a ngava iea, lakea e huriki a Iuda i madihi a hatene ria, a vuhuna i taki ta ia a Vure. Lakea ri bole rike a kedo ta ri gi padi­matea. Pali e Isu i kapiloho ne ria, i laho tala na tabeke tara na roho na Vure i vano.