1  * Apo 8:3Na tahuna iea e Saulus i tababana ni ta tora hateka ge ratapile, ge rabalaki e huriki a murimuri ne Bakovi Dagi. I lakea na prister dagi, 2 i takia ge herea tara raukea ge bole lakea na maka roho na vaponga na tanga dagi e Damaskus. A raukea bara i vakalongo ria ne Saulus ge lokovonga, ge matavisi ranga bakovi a ngatavine ri ramai a Dala ne Bakovi Dagi,* E huriki a murimuri ranga ri gale kalihi a lotu ne ria a Dala, a vuhuna e Isu ia a Dala na nimahuri vakaroro. Ioanes 14:6 bara i lakavu ria, i turari mule valai o Ierusalem.

3 Na tahuna i popote ge bele o Damaskus, a nipara dagi na hunu i kinipageri vakaturutu halui ia. 4 E Saulus i boru puru na malala, i longoa a lohona viri i ta maea, “Saulus, Saulus, i navai o vakamadihi iau?”

5 Lakea e Saulus i nana, “Bakovi dagi, e rei ioe?”

A lohona viri i koli, i ta maea, “Iau e Isu, ra viri o vakamadihia. 6 Pali ngane o pesi rike, o dili na tanga dagi. Ga taki ioe na maki go ratea.”

7 E huriki a bakovi ri laho turane Saulus ri pesi tata mavonga, ri ngapa. Ri longoa a lohona viri, pali i uka ma ri masia tara viri. 8 E Saulus i pesi rike, i mata para, pali i kepa. Ni tuli na limana, i dili na tanga dagi e Damaskus. 9 Na parava i tolu i kepa. I uka ma i kani, i uka ma i ninu.

10 Na tanga dagi e Damaskus i made vonga tara murimuri, a rana e Ananias. E Bakovi Dagi i bele vona na vurena, i galea, “Ananias!”

I koli, i ta maea, “Bakovi Dagi, iau ieni.”

11 Lakea e Bakovi Dagi i takia, “O pesi rike, o laho lakea na ruma e Iudas, na dala ni gale e Kiripi, o nana kanea vonga tara bakovi o Tarsus, a rana e Saulus. Ngane i vasileki vonga. 12 I vurena, i masia a bakovi, a rana e Ananias, i valai, i ru langa a limana vona ge vakamatapara ia.”

13 Pali e Ananias i koli i ta maea, “Bakovi Dagi, iau a longo e huriki ri takia a bakovi iea, ta i ratapile e huriki a tara vomu o Ierusalem. 14 Ngane e huriki a prister dagi ri rudu vilia ge lakavu e huriki ri gale a ramu.”

15  * Apo 26:2,6; 27:24; Rom 1:5Pali e Bakovi Dagi i takia, “O vano! A bakovi iea, a ngarua ge lakea ne huriki a bakovi a ngatavine i uka ma ria a Iuda, e huriki a hariki, e huriki a Israel, ge vakalongo ria nau. 16  * 2Ko 11:23-28Ga vakasiria na maka maki bara i bole a nimadihi vona na tahuna i ramai iau.”

17 I mavonga, e Ananias i vano, i bele na ruma. I dili, i ru langa a limana ne Saulus, i ta maea, “O turagu o Saulus, e Isu a Bakovi Dagi, a viri i bele vomu na dala na tahuna o laho valai koea, i rudu iau a valai vomu, go matapara tabu, ge dili vomu a Hanu Kiripiripi.” 18 I malaviriri kunana, a maki manga a honana manu i boru tala na matane Saulus, i matapara tabu. Lakea i pesi rike, ni vahilolo. 19 Muri i kani i vaga a tuhana.

E Saulus i made turane huriki a murimuri o Damaskus na parava ranga, 20 i lakea malaviriri na maka roho na vaponga, i vakalongo e huriki maea, “E Isu ia a Tuna Vure.” 21  * Apo 8:3E huriki ri longoa a nitana ri turutu, ri vanana, “Ra bakovi iea, i navai i ta mavonga? Ia kunana a viri i rabalaki e huriki ri luhoi torea e Isu o Ierusalem. Pali ngane i valai koea ta ge lakavu ria, ge turari mule ria ri gi pesi na matane huriki a prister dagi o Ierusalem.” 22  * Apo 18:28A vinara ne Saulus i bele tora hateka. I vakasiri e huriki a Iuda ri made o Damaskus ne Isu ia e Kristo, lakea ri ngapa.

23 Muri na parava i kupo, e huriki a Iuda ri varodo a ngava ri gi rabalakia e Saulus. 24 Pali e Saulus i longoa a naro ta ri gi ratea vona. A rodo a haro ri tagari mavongea a poridala na tanga dagi, ta ri gi rabalakia e Saulus. 25  * 2Ko 11:32-33Pali na rodo tara e huriki a murimuri vona ri tuli rikea na nure dagi, ra i tura halui a tanga dagi. Ri vakamadea na kulopi, ri vakatavore purua na nimatatala, i vano.

26  * Gal 1:17-19Na tahuna i luve o Ierusalem i ngaru ni dili turane huriki a murimuri. Pali ri mangenge vona, a vuhuna i uka ma ri luhoi ge ia a murimuri muholi. 27  * 1Ko 9:1Pali e Barnabas i tuhori ia, i tulia lakea ne huriki a apostolo, i vakalongo kamumu ria vona e Saulus i bele vona e Bakovi Dagi na dala, lakea e Bakovi Dagi i habi a ngava vona. I vakalongo tabu ria vona e Saulus i vara pagapaga na rane Isu o Damaskus. 28 Lakea i made turane ria o Ierusalem, i laho lae turane ria, i uka ma i mangenge. I vara pagapaga na rane Bakovi Dagi. 29 I ta turana, i vagege turane huriki a Iuda ri lohoka na nita Grik. Pali ri toni ni rabalakia. 30 Na tahuna e huriki a tara ne Kristo ri longoa ta ni gi rabalaki, ri tulia lakea o Sisaria taro, muri ri rudua ge lakea o Tarsus.

31 Muri e huriki a tara ne Kristo na maka tabeke ne Iudea, ne Galili, ne Samaria ri made na nivalemu. Ri muri mai a vilone Bakovi Dagi, lakea a Hanu Kiripiripi i vakatora ria, i rata ria ri bele ala kupo hateka.

32 E Petrus i laho lae na tabeke lobo, i gosi e huriki a tara ne Kristo. Na parava tara i vano i gosi e huriki a tara na Vure ri made o Lida. 33 Na tahuna i bele vonga i masia a bakovi tara, a rana e Anias. I beu i mahita kunana na kiri na pida i polotolu. 34 Lakea e Petrus i takia, “Anias, e Isu Kristo i vakatavaga ioe. O pesi rike, o pilu a moke vomu.” I malaviriri kunana e Anias i pesi rike. 35 E huriki ri made o Lida, o Saron ri masia i tavaga, lakea ri pulo a vilone ria, ri ramai e Bakovi Dagi.

36 Na tanga e Iopa a ngatavine tara i made vonga a rana e Tabita. A rana na nita Grik e Dorkas. Na parava vakaroro i muri mai a vilo kamumu, i kori e huriki a matasia. 37 I ratea a gilanga dagi, i mate. A podana ni vahilolo, ni ru na tabekena ruma polomeli. 38 A tanga e Lida i tabukoi o Iopa. Lakea na tahuna e huriki a murimuri ri longoa e Petrus i made o Lida, ri rudu a bakovi ala rua ru lokovonga, ru takia, ru ta maea, “O valai malaviriri.”

39 Lakea e Petrus i pesi rike, i vano turane rua. Na tahuna i bele, ri tuli sikea na ruma langalanga. E huriki a havuri ri pesi halui ia, ri tangi, ri vakasiria vona a maka varakia e Dorkas i rata na tahuna i tabana ni mahuri.

40 Pali e Petrus i tono tala ria na ruma. Muri i turume puru, i vasileki. I mata lakea na podana ngatavine, i ta maea, “Tabita, o pesi rike!” Lakea i matapara. Na tahuna i masia e Petrus, i made rike. 41 Muri e Petrus i nugua na limana, i tuli pesia. I gale palupu e huriki a tara na Vure, e huriki a havuri, i vakasiria ne ria e Tabita i mahuri mule na matenga. 42 A velengana ni longo lobo na tanga dagi e Iopa, lakea e huriki ala kupo ri luhoi torea e Bakovi Dagi. 43 Muri e Petrus i made vonga o Iopa na parava i kupo. I made turana bakovi a rana e Simon. A bakovi iea, a mari ni rata a maki na kulina bulmakau.