1 Na tahuna e BAKOVI DAGI i ta turane Moses na lolo e Sinai, a kabu ne Moses e Aron i maea: 2  * Gi 26:60E Aron i tahoka e tuna bakovi ala va. A tabua e Nadap. To pahamuria e Abihu, e Eleasar, e Itamar. 3 E tune Aron nga ni biri, ge ria a prister. 4  * Levi 10:1-2; Gi 26:61Na tahuna ri made na tabeke i ngeki ne Sinai, e Nadap e Abihu ru habi a kanono ne BAKOVI DAGI, na tahuna e BAKOVI DAGI i uka ma i taki rua ru gu habi vona. Lakea e BAKOVI DAGI i rabalaki rua, ru bala liu a hamone rua. Pali e Eleasar e Itmar kunana ru leho manga a prister na tahuna e Aron i tabana ni mahuri.

5 E BAKOVI DAGI i takia e Moses i ta maea, 6 “O tuli valai e huriki a bakovi ne Levi ga gamai ria, ge ria a bolekori ne Aron. 7 Ri gi leho na leho na Kape na Vaponga, ri gi tuhori e huriki a prister turana e huriki lobo. 8 Na tahuna ri leho, ri gi matakari kamumu a mahalana kape, ri gi matakari kamumu e huriki a Israel. 9 E huriki a Levi ri tahoka a leho i taku kunana. Ne huriki a Israel lobo, ria kunana ri gi rata vakaroro a leho ne Aron, turane huriki e tuna. 10 O vulaki kunana e Aron, turana e huriki e tuna, ri gi leho manga a prister. Pali e huriki ranga ri gi valai tabukoi, ni gi rabalaki.”

11 E BAKOVI DAGI i takia e Moses i ta maea, 12-13  * Nim 13:2“Ngane a vulaki e huriki a bakovi na kabu ne Levi, ge ria a tara nau kunana. Na tahuna a rabalaki a koma tabua ne huriki a Egipto, a vulaki a tabua bakovi ne huriki a Israel, a maka sipsip, a bulmakau, ge ne nau. Pali ngane i uka ma ga bole a tabua bakovi ne huriki a Israel, a vuhuna a kabu ne Levi ri bole a murine ria, ge ria a vora nau. Iau e BAKOVI DAGI a takia a ngava iea.”

14 Na tabeke i ngeki ne Sinai e BAKOVI DAGI i takia e Moses i ta maea, 15 “O gi e huriki a hamone Levi, o here ramai a kabu ne tamane ria takutaku. O here a rane huriki a koma bakovi ne ria ri tahoka a keva i taku i rike.” 16 Lakea e Moses i ramai a maka ngava e BAKOVI DAGI i vakukua vona.

17 E Levi i tahoka e tuna bakovi to ala tolu: e Gerson, e Kohat, e Merari. 18 A rane tune Gerson a bakovi ra nga: e Libni rua e Simei. 19 A rane tune Kohat ra nga: e Amram, e Ishar, e Hebron, e Usiel. 20 A rane tune Merari ra nga: e Mali, e Musi. E huriki a hamone Levi ri pesi muri mai a rane huriki e tubune ria nga.

21 E huriki a hamone Gerson ri tahoka a kabu i rua: a kabu ne Libni, a kabu ne Simei. 22 A koma bakovi ne ria ri tahoka a keva i taku i rike, ni gi palupu, ri ala 7,500. 23 Re huriki nga ri rata a mada ne ria na dahana Kape na Vaponga na tabeke na nirolona haro. 24 E Eliasap e tune Lael ia a nupesi ne ria. 25 A leho ne ria ni matakari a Kape na Vaponga, a maki ni kapina, a kala dagi na matana kape, 26 a mota, a kala ni kapi halui a kape, a dede, a kala na ngavana nure. Ri gi rata lobo a leho ni matakari a maki nga.

27 E huriki a Kohat ri tahoka a kabu i va: a kabu ne Amram, a kabu ne Isar, a kabu ne Hebron, a kabu ne Usiel. 28 E tune ria bakovi ri tahoka a keva i taku i rike, ri ala 8,600. A leho ne ria ni tagari a kape. 29 Ra hamone Kohat nga, ri gi rata a mada ne ria na tabeke mule puru na kape. 30 E Elisapan, e tune Usiel, ia a nupesi ne ria. 31 A leho ne ria ni matakari a Tava na Ngava Dagi, a dede, a butu na lam, a maka dede na nihabi, a maka pelete, a ulo ni rata a leho na Tabeke Nitaba, a kala dagi ni vulalakari a Tabeke Nitaba Hateka, a maki ranga ni rata na kape. Ri gi rata lobo a maka leho ni matakari a maki nga.

32 E Eleasar, e tune Aron a prister, i matakari e huriki a matakari na kabu ne Levi. I matakari e huriki ri rata leho pololilo na tabeke ni taba na kape.

33 E huriki a Merari ri tahoka a kabu i rua: a kabu ne Mali, a kabu ne Musi. 34 E huriki e tune ria bakovi ri tahoka a keva ne ria i taku i rike, ri ala 6,200. 35 A nupesi ne ria e Suriel, e tune Abihail. E huriki a tara nga, ri gi rata a mada ne ria mule sike na kape. 36 A leho ne ria ni matakari a maka karona kape, a maka butuna kape, a maka tava ni vakapesi langa a maka butu, a maka kai ne vona ni roka a maka butu, turana a maka maki ranga ne vona ni vakatora a kape. 37 A maka butu, a tava ni vakapesi langa a butu na nure ni tura halui a kape, a maka niroka, a mota ni kolotata a kape vona, ngi ranga bara ri matakari.

38 E Moses, e Aron turane huriki e tuna, ri gi vakapesi a kape ne ria na tabeke na nirikena haro na matana kape na Vure. Ri gi madekari a Tabeke Nitaba, ri gi matakari e huriki a Israel, ma ri gi valai tabukoi, ni gi rabalaki. 39 E Moses e Aron ru ramai a nitane BAKOVI DAGI, ru gi e huriki a bakovi na kabu ne Levi ri tahoka pali a keva i taku i rike, ri ala 22,000.

40 E BAKOVI DAGI i takia e Moses i ta maea, “E huriki a tabua bakovi ne mua a Israel, ne nau kunana. O gi e huriki a tabua bakovi ri tahoka a keva i taku i rike, o here a rane ria. 41 Pali iau bara kuloi ne huriki na kabu ne Levi, re huriki a bakovi nga, ga bole e huriki a Levi ge ria a tara nau. Ga bole tabu a maka tabua na bulmakau ne huriki a Levi, ge bole a murine ria, a maka bulmakau ne huriki a Israel. Iau e BAKOVI DAGI a ta maea.”

42 Lakea e Moses i muri maia a nitane BAKOVI DAGI i gi e huriki a tabua bakovi ne huriki a Israel. 43 Ri tahoka a keva i taku i rike, ri ala 22,273.

44 E BAKOVI DAGI i takia e Moses i ta maea, 45 “Ngane o habi nau a kabu ne Levi, ri gi kuloi e huriki a tabua bakovi ne huriki a Israel, ge ria a tara nau. Ri gi habi nau a bulmakau ne ria, ge kuloi a maka bulmakau ne huriki a Israel. Iau e BAKOVI DAGI a ta maea. 46 A tabua bakovi ne huriki a Israel ri kupo hateka ne huriki a Levi, ri ala 273. Ngane mu kona mule, re huriki a bakovi nga, ri ala 273. 47 O bole a silva moni ge lima takutaku na bakovi ne ria, ne vona ni kona mule ria. A nimavana silva i ramai a nimavana maki na tahuna iea. 48 O habi a moni nga ne Aron turane huriki e tuna, ga mapane huriki a Israel ri ala 473.”

49 Lakea e Moses i bole a moni ge kona mule e huriki a tabua ne Israel, e huriki a Levi i uka ma ri kuloi ria. 50 E Moses i bole a moni silva i 1,365, i ramai a nimavana moni na tahuna iea. 51 Muri e Moses i habi a moni, a makoli ne Aron, ne huriki e tuna bakovi, i ramai a nita ne BAKOVI DAGI i vakuku e Moses vona.