1  * Nim 23:10-11E BAKOVI DAGI i takia e Moses na lolo e Sinai, 2 ge taki e huriki a Israel, ge ta maea, “Na tahuna mu made pali vona a malala a habia ne mua, na poloruana pida lobo naha ni varo a maki ni kani na hania. Ge tabuli tavula a malala. A malala ge malo, ge manga a hini mu malo na Parava Nimalo. Mu rata mavonga, mu togoa a pida iea, a vuhuna a pida ne BAKOVI DAGI. 3 Na pida i polotara mu varo a maki ni kani, mu puri kamumu a rahana vain, mu ru kadolu a kanena maki ni varo na hania. 4 Pali na poloruana pida naha ni leho vona a malala, ge malo. Pali ra pida iea a pida ne BAKOVI DAGI. Naha ni varo a maki ni kani, naha ni puri a rahana vain ne mua. 5 Naha ni mirio a vit i rike tavula, naha ni pasi a kanena vain i uka ma ni puri a rahana. Mu mata taro ge tabuli, a vuhuna na pida iea a malala ge malo. 6 Pali na pida iea a maki ni kani ri rike tavula na malala ne vona ni kani kunana. I uka ma ne vona ni ru palupu, o ni gi rata a vain vona. Mua, turana a vora ne mua, e huriki a mosi, mu kani. 7 A maka bulmakau, a sipsip, a meme, a kanirau ri tegi, ria ranga ri gi kani.

8 “Balaka polorua mu gi a pida ge polorua, ge bele na pida i ravulu va a polona i polova (49). 9 Muri na ravuluna parava na poloruana keva, mu pupu a tavure na tabeke lobo na robo ne mua. Ra parava iea a parava dagi ni kavitagu e huriki. 10 A pida i ravulu lima (50) ge vakatubu na tahuna mu vaki a tavure vona, ra pida iea a pida ne BAKOVI DAGI. Mu vakalongo e huriki vona a maregoa ne ria i lobo ngane, ri gi made kamumu. Na pida iea a viri i kona a malala na bakovi tara, ge habi mulea na tahona, o ge habi mulea na hamona tara. E huriki a vora ri gi pe a tahone ria, ri gi hamule mai a kabu ne ria. 11 Ra ravulu limana pida (50th), a pida ne huriki lobo ri gi made kamumu ri gi vivi. Na pida iea naha ni varo a maki ni kani na malala ne mua, naha ni bole a vit i rike tavula, naha ni pasi a kanena vain na rahana i uka ma ni puri. 12 Mu luhoi kamumu, ra pida iea, a pida ni vaki a tavure, a pida nau kunana. Mu kani kunana a maki i rike tavula na malala ne mua.

13 “Na Pida na Nihabimule a Maki iea mua e huriki mu habi a malala ni kona, mu bole mule a malala ne mua.

14-15 “Na tahuna mu habi a malala ne huriki ranga ri gi konea, mu luhoi kamumu i riva a pida i tababana ge bele vona a Pida na Nihabimule a Maki. Mu gi kamumu, ge balaka riva ge varo a maki, ge mirio, lakea a mapana malala ge ramai i riva a pida i tababana. 16 A pida i kupo i tababana, a mapana ge rike. A pida i popote i tababana, a mapana ge puru, a vuhuna i uka ma i kona a malala, i kona a maki ni kani i bole vona a malala iea. 17 Naha ni tami a turamu. Mu mangenge na Vure ne mua, mu rata a maka naro kamumu kunana. Iau e BAKOVI DAGI a Vure ne mua, a takia a ngava iea.

18 “I mavonga mu ramai kamumu a maka ngava, a vinara ne BAKOVI DAGI. Bara mu rata mavonga bara mu made kamumu vona a malala iea. 19 A malala bara i vakabele a maki ni kani i kupo, bara mu made kamumu hateka vona a malala iea. 20 Ma ge ranga ne mua ge nana maea, ‘A ra mi gi kania vona na poloruana pida na tahuna i uka ma mi varo a maki ni kani?’ 21 Naha ni loho lege lae. E BAKOVI DAGI bara i gamai a malala na polotarana pida, ge bele kupo a maki ni kani, mu kani na pida i tolu. 22 Na tahuna mu varo a maki ni kani na polotoluna pida, bara mu tababana ni kani a maki mu mirio na polotarana pida. Bara mu tahoka a maki ni kani i harena na maki ni kani karaba i moro na polovana pida.

23 “Na tahuna a bakovi i kona a malala, nahea ge bolea ge ne vona liu. A vuhuna i uka ma malala vona. A malala ne nau, a ru mua mu gu made vona, manga a mosi ni vakamade tamilalu na malala. 24 A bakovi tara ne mua i konamulea a malala ne mua, ge lohoka kamumu vona, a tahona malala i ngaru ni konamulea ge bole mulea a malala.

25 “Bara bakovi tara i bala maki i ngaru ni habi a malala vona ni gi kona, a kabu vona muholi ge koria ge konamulea, muri ge habi mulea vona. 26 Bara bakovi i uka viri vona ge tuhoria, ia kunana ge konea. Na tahuna i kupo a maka moni vona, ge konamulea a malala iea. 27 Ge gi i riva a pida i tababana ge kona a maka pida ni koli a maki nga, ge gi i riva a mapana a kanena maki ni varo ge vakabele a malala na pida nga. Ge bole a moni ga mapana kanena maki nga, ge habi na bakovi i kona a malala vona hosi, ge bole mulea a malala iea. 28 Pali a bakovi iea ge uka moni, i uka ma i konamulea a malala iea, a malala ge tabuli na bakovi i konea, ge harena na Pida na Nihabimule a Maki ge bele tabu muri ma. Na tahuna a pida iea i bele, a bakovi i kona a malala ge habi mulea na tahona a malala.

29 “Bara bakovi i tahoka a ruma i pesi na tanga dagi ni tura halui na nure, i konea a bakovi tara, a tahona i tahoka a pida i taku ni konamulea a ruma vona. 30 Bara pida i taku i lobo, lakea i uka ma i konamulea a ruma, ra ruma iea ngane ne vona a bakovi i konea turane huriki a hamona. I uka ma ge habi mulea na Pida na Nihabimule a Maki. 31 Pali a maka ruma ri pesi na tanga kiroko i uka ma ni tura halui, mu luhoi kamumu, ri manga kunana a hania. A tahona ruma i kara ni konamulea a ruma vona. Na Pida na Nihabimule a Maki a bakovi i konea pali a ruma, ge habi mulea na tahona a ruma.

32 “Pali e huriki a Levi nahea ri gi ramaia a vinara iea. Ria ri ngaru ni kona mule a ruma na tanga dagi ni tura halui a nure, bara ri kona mule. 33 Na tahuna a Levi tara i habi a ruma vona ni kona, pali i marikoi ni konamulea, ra bakovi i konea a ruma ge habi mulea na Levi na Pida na Nihabimule a Maki a ruma, a vuhuna mua lobo a Israel e BAKOVI DAGI i habi a malala ne mua, pali e huriki a Levi i uka ma i habi a malala ne ria. I habi kunana a maka tanga dagi ne ria. A maka ruma ri pesi na maka tanga dagi ne vona e huriki a Levi kunana vakaroro. 34 Pali a malala na harena maka tanga dagi ne huriki a Levi, nahea ge kona e huriki. Ra malala ngi ne vona e huriki a Levi vakaroro.

35  * Vin 15:7-8“Na tahuna a Israel tara i made tabukoi vomu i bala maki, o tuhoria ge manga a naro mu rata virihi e huriki a mosi vona. Mu rata mavonga a hulu matasia bara i vivi ni made turane mua. 36-37  * Nim 22:25; Vin 23:19-20Na tahuna i bole a moni ne mua, ge koli kunana a moni i bole. Naha ni takia ge ru langa tabu ranga. Na tahuna i kona a maki ni kani, naha ni vakarike hateka a mapana ni bole a moni dagi vona. Mu mangenge vona a Vure, bara a hulu matasia i made turane mua. 38 Iau e BAKOVI DAGI a Vure ne mua. A tuli tala mua o Egipto, a taparaki valai mua koea, a habia ne mua a robo e Kenan, ge iau a Vure ne mua.

39  * Nim 21:2-6; Vin 15:12-18“Na tahuna a turamu tara i matasia hateka, i ngaru mua mu gu konea ge ia a vorakato, naha ni takia ge rata hateka a leho manga e huriki a vorakato. 40 Ge made turane mua, manga a vora. Ge leho ne mua, ge harena na Pida na Nihabimule a Maki. 41 Na pida iea, ia turane girihina, e huriki e tuna ri gi pe mua, ri gi hamule mai a kabu ne ria ri made na malala ne tubune ria. 42 Hosi e huriki a Israel ri made manga a vorakato o Egipto. Muri a tuli tala ria vonga, ge ria a vora nau. Ngane naha ni kona mule a viri ne ria ge a vorakato ne ria. 43 Naha ni vakavora hateka ria. Mu togo iau, mu rata kamumu ria.

44 “Mu ngaru ni bole a vorakato, mu bole tala na maka robo basi. 45 Mua mu ngaru tabu, mu kona e huriki a mosi ri made na tanga ne mua, turana a kabu ne ria ni poda ria na malala ne mua, ge ria a vorakato ne mua. 46 Na tahuna mu mate, e huriki e tune mua a bakovi ri gi bole e huriki a vorakato, ri gi rata a leho ne ria vakaroro. Na tahuna e huriki a viri ne mua ri leho manga a vorakato, naha ni vakavora hateka ria.

47 “Na tahuna a mosi tara i tahoka hateka a mahala i made turane mua, pali a turane mua tara i bala a mahala, ra mosi iea i kara ge konea a turane mua ge a vorakato vona, o ge ia a vorakato na kabu vona tara. 48 Muri na mosi i konea a Israel iea, ge ia a vorakato vona, a viri vona tara i kara ni konamulea, 49 o e tamana tara, o e turana tara, o a viri na kabu vona tara, ria ranga ri kara ni konamulea. Pali ra bakovi iea ge tahoka a moni, bara i kara ni kona mule ia, ge vano. 50 Ge gi palupu a maka pida ri tababana ge harena na Pida na Nihabimule a Maki. A matakari iea ge ru a mapana a vora na pida nga. Ra bakovi iea o a kabu vona tara, ge konamulea na mapa ge maea: 51 a pida vona i kupo i tababana, a bakovi iea ge koli mule a moni i kupo lakea na matakari, ge kona mule ia; 52 a pida vona i popote i tababana na Pida na Nihabimule a Maki, ge koli mule a moni popote lakea na mata­kari, ge ramai a maka pida i leho vona, ge kona mule ia. 53 A matakari ge luhoia ra vorakato iea ge manga a vora ni kona na pida takutaku, nahea ge vakavora hatekea.

54 “Ra bakovi iea i uka ma ni kona mule vona tara naro iea, ia turane huriki e tuna ri gi hamule mai a kabu ne ria na Pida na Nihabimule a Maki. 55 Naha ni mata taroa tara Israel ge ia a vorakato vakaroro, a vuhuna iau a tuli tala mua o Egipto, a taparaki valai mua koea, ge mua a vora nau. Iau e BAKOVI DAGI a Vure ne mua, a takia a ngava iea.’ ”