A Ruana Raukea e Paulus i Here Lakea ne Huriki a
Tesalonika
A Nita Vakalohoka
E Paulus, a apostolo, i herea a raukea iea.
I here lakea ne huriki ri made na tanga e Tesalonika, na tabeke ne Masedonia. O matai a Nita Vakalohoka ne 1 Tesalonika.
E Paulus i herea a raukea iea ne vona ni vakatora a niluhoi ne huriki a tara ne Kristo o Tesalonika. Ri loholege vona a ngava taminga i bele, ta e Kristo i hamule valai pali. I taki ria a naro hale bara i bele dagi taro, muri e Kristo bara i valai. I taki ria ri gi hatenono na nimava. E Kristo bara i valai, i vakamadihi e huriki ri gege a Velenga Kamumu.
1
1 Iau e Paulus, turane Sailas e Timoti mete herea ra raukea iea i lakene ne mua o Tesalonika, ra mua e huriki a tara na Vure, e Tamane hita, e Isu Kristo a Bakovi Dagi.
2 * Rom 1:7A Vure, e Tamane hita, turane Isu Kristo a Bakovi Dagi ne hita, ru gu rata kamumu mua, ru gu habi a nivalemu ne mua.
E Paulus i Kavurikea a Vure
3 Mua e huriki a turagu, i kamumu mete ge luhoi mua, mete ge kavurike vakaroroa a Vure, a vuhuna a niluhoi ne mua i bele tora hateka, a rabu ni vangaru i bebele dagi ne mua. 4 * 2Ko 7:4; 1Tes 2:19I mavonga, mete bibi rike a rane mua na matane huriki a tara na Vure na tanga lobo, a vuhuna mu pesi tora na niluhoi ne mua, mu hatenono na tahuna e huriki ri vakamadihi mua, mu bole a maregoa.
5 Na tahuna mu pesi tora mavonga, i vakasiri hita na Vure i pelekado kamumu e huriki. I mavonga, a Vure ge taki mua, mua a viri kamumu, mu gu made na harikia vona, ra ngane mu bole a nimadihi a vuhuna mu ngaru ni dili vona. 6-7 * Rom 12:19; 1Tes 3:13A Vure i pelekado kamumu e huriki. Muri ma, a Bakovi Dagi ne hita e Isu, turane huriki a agelo hateka na Vure ri gi pe a hunu, ri gi luve kavakava turana hubena kanono. Na tahuna iea, bara i koli a narone huriki ri habi a maregoa ne mua, bara i habi a maregoa ne ria. Bara i vakalobo a maka maregoa mu tahoka, ge habi a nimalo ne mua. Mateu ranga bara i habi a nimalo ne mateu.
8 * Ais 66:15E huriki i uka ma ri longototo a Velenga Kamumu ne Bakovi Dagi ne hita, e Isu, e huriki i uka ma ri lohoka na Vure, e Isu bara i vakamadihi ria. 9 * Ais 2:10Re huriki nga, e Isu ge vakamadihi ria, ge ratapile ria vakaroro. Bara ri made basi ne Bakovi Dagi, na bagetuanga na nitora vona. 10 * Kol 3:4Ra maki nga bara ri bele na tahuna i hamule valai. Na parava iea, e huriki a tara vona bara ri kavurikea, e huriki ri luhoi torea bara ri ngapa vona. Mua ranga bara mu vivi turane ria, a vuhuna mu luhoi tora a ngava mete vakalongo mua vona.
11 * Kol 1:9; 1Tes 1:2-3I mavonga, mete vasileki vakaroro na Vure, ge tuhori mua mu gu laho manga a hini i ngaru mu gu laho vona. Mete vasileki vona ge habi a nitora ne mua, mu gu rata a maka naro kamumu mu luhoi ni ratana. 12 Mete vasileki mavonga, a vuhuna mete ngaru e huriki a bakovi a ngatavine ri gi matai a narone mua, ri gi kavurikea e Isu a Bakovi Dagi. E Isu tara ge kavurike mua. I mavonga, ri kavurikea e Isu, a vuhuna a Vure rua e Isu Kristo a Bakovi Dagi ru rata kamumu mua.