1 Hawcˊ awnˊ na loeˊ seunyi naˊ, a kueˊ pawe hk'a checˊ nang yungˊ Kanaˊ kuingˊ Galilaeˊ naˊ. Ma Eun Yesuˊ ka utˊ mawnˊ. 2 Peue ku klawng Yesuˊ Eun maeeˊ tapaeˊ Eun naˊ ce ingˊ hk'a checˊ yeut. 3 Yam leuumˊ pliˊ bui naˊ eucˊ ka naˊ, ma Eun Yesuˊ ka lahˊ a ri Heun, “Leuumˊ pliˊ bui ce naˊ eucˊ ka.”

4 Yesuˊ Eun lahˊ, “Ma, pawlaee lahˊ kuˊ kaw Uiˊ htukˊ ri yeuh naˊ, yam Uiˊ naˊ unˊ nang rot ka.”

5 Ma Eun Yesuˊ ka lahˊ a ri mhaiˊ naˊ ce, “Hotˊ ri yeuh kuˊ kah Eun peˊ yeuh naˊ reuˊ.”

6 Mawnˊ naˊ a kueˊ htam seumu les meulˊ. A meuh htam kuˊ peue ceu Yuˊda naˊ loˊ ce yam yeuh ce rit hk'aˊ seungaˊ seungawm naˊ. Htam ti meulˊ naˊ a kuiˊ leuumˊ naˊ lalˊ loeˊ glawmˊ* 2:6 A kueˊ hk'ao 75 aˊkoˊ 115 litˊ.

7 Yesuˊ Eun lahˊ a ri mhaiˊ naˊ ce, “Cin ri seueˊ leuumˊ naˊ nuk htam naˊ ce reuˊ.” Kop awnˊ na, ce cin ri seueˊ leuumˊ naˊ nuk hpeng moeng ka htam naˊ.

8 Hawcˊ koˊ, Yesuˊ Eun lahˊ a ri ce, “Cit ri heulˊ tuilˊ a ri roˊ catˊ kanˊ naˊ eun reuˊ.” Ce ku ti ri heulˊ tuilˊ a.

9 Roˊ catˊ kanˊ naˊ eun cim ri nawk leuumˊ keutˊ ri meuh leuumˊ pliˊ bui naˊ. Eun unˊ yawng leuumˊ pliˊ bui awnˊ pun a ri neum tawngnhawˊ. Daecti mhaiˊ cin ri seueˊ leuumˊ naˊ ce yawng vang pun a ri naˊ yeut. Roˊ catˊ kanˊ naˊ eun klawng ri mhaingˊ nang nhumˊ penˊ naˊ eun,

10 “A saecˊ meuh aˊnhawˊ, tuilˊ peue peue nyui leuumˊ pliˊ bui chakˊ naˊ nanggalˊ, yam peue checˊ naˊ pun ce ri nyui heunˊ hawcˊ naˊ, koe tuilˊ ce nyui kuˊ ca ri ngos leng naˊ. Daecti mi ri, mi vaeeˊ kawnˊ roksaˊ leuumˊ pliˊ bui chakˊ hk'aiˊ peue naˊ rot maetˊmaenˊ.”

11 Aenˊ meuh a hetˊ keuting kuˊ Yesuˊ la Eun ri yeuh a pok nanggalˊ naˊ. Eun yeuh a nang yungˊ Kanaˊ kuingˊ Galilaeˊ naˊ. Kopti yeuh Eun aenˊ a naˊ, a yeuh munhpungˊ Eun naˊ pucti lih. Tapaeˊ Eun naˊ ce ku kueˊ hk'aˊ yumˊ hk'aˊnaee Heun. 12 Hawcˊ awnˊ na, Eun lih nang veng Kapeniˊum naˊ maeeˊ ma maeeˊ awngˊ me Eun naˊ ce, maeeˊ tapaeˊ ri naˊ ce tiduihˊ. Ce utˊ mawnˊ lalˊ loeˊ seunyi.

13 Yam kaw a hk'awsˊ rot ri pawe vel nya ce peue Yuˊda naˊ, Yesuˊ Eun hukˊ nang veng Yeruˊsalaem naˊ. 14 Nang kangˊhkungˊ ka nya hk'oˊ munˊ keuting naˊ, Eun pun ri nyu peue paingˊ aˊmoe, konˊyungˊ maeeˊ guiˊ naˊ ce. Ngonˊ ce mokˊ maeeˊ hpuinˊ leuplohˊ leumuil ri naˊ. 15 Eun ti ri yeuh muˊ naˊ meuh kuˊ taˊfaetˊ. Hawcˊ koˊ, Eun ra ri tec peue awnˊ ce gawmˊeucˊ gawmˊ konˊyungˊ gawmˊ aˊmoe ce naˊ pucti heulˊ hk'aiˊ kangˊhkungˊ ka nya hk'oˊ munˊ keuting naˊ. Eun bah ri tec paec ce peue leuplohˊ leumuil naˊ. Eun cutˊ hpuinˊ ce naˊ glhawp ri. 16 Eun lahˊ a ri peue paingˊ guiˊ naˊ ce, “Ti ceu nang aenˊ ce heulˊ hk'aiˊ maenˊ naˊ reuˊ. A ciˊ yeuh keunhawˊ peˊ vaeeˊ hatˊ ri yeuh nya Eun Kuiingˊ Uiˊ naˊ meuh keulas?”

17 Tapaeˊ naˊ ce kuit rot ri leukahˊ temˊ ri nang htawm Seungaˊ naˊ, a lahˊ, “Hpumˊ haˊ ron Uiˊ pun nya Mi naˊ nyawkˊ.”† 2:17 Sukˊseunˊ 69:9

18 Peue Yuˊda naˊ ce lahˊ a ri Heun, “Punta kaw Mi tuilˊ ye nyu kueˊ Mi ahkvang kaw yeuh ceu nang aenˊ ce naˊ, Mi ciˊ kueˊ kuˊ kaw yeuh ye nawk hetˊ keuting keunhawˊ?”

19 Yesuˊ Eun topˊ a, “Yeuh nya hk'oˊ munˊ keuting aenˊ a lu reuˊ, kaw Uiˊ tang vuh a hk'uˊ hk'aˊnaee loeˊ seunyi naˊ.”

20 Peue Yuˊda naˊ ce topˊ a, “Nya hk'oˊ munˊ keuting aenˊ kawnˊ plengˊ a ri lingˊ pun punˊkulˊ les neum. Kaw Mi vuh a hk'uˊ hk'aˊnaee loeˊ seunyi naˊ yawo aw?” 21 Daecti nya hk'oˊ munˊ keuting kuˊ Yesuˊ lahˊ Eun a rot ri ka naˊ, a meuh tuˊ Eun naˊ. 22 Hawcˊ yam tang kuhˊ imˊ Eun hk'aiˊ vang yeum ri naˊ, tapaeˊ Eun naˊ ce kuit rot ri kuˊ lahˊ Eun ri uinˊ naˊ. Kop awnˊ na, ce yumˊ leukahˊ htawm Seungaˊ naˊ maeeˊ kuˊ Yesuˊ lahˊ Eun naˊ.

23 Yam kawnˊ utˊ Eun nang veng Yeruˊsalaem hk'aˊnaee yam pawe vel nya naˊ, peue heunˊ naˊ ce nyu hetˊ keuting yeuh Eun naˊ, ce yumˊ hk'aˊnaee muis Eun naˊ. 24 Daecti Yesuˊ Eun unˊ yumˊ ce, kopti yawng Eun aˊcangˊ ce peue naˊ. 25 Kopti kuˊ kueˊ hk'aˊnaee peue naˊ a meuh keunhawˊ naˊ yawng meun Eun a naˊ, Eun hkuinˊ kaw loˊ aˊnhawˊ ingˊ lahˊ ri mhawngˊ lawng ce peue naˊ.