SOFONI
Sofoni u Yudɑbɑ kɑ Yerusɑlɛmugibu sɔ̃ɔmɔ mɑ Gusunɔ u koo bu sɛɛyɑsiɑ. Mɑ u mɑɑ tɔn tukobu kirɔ mɔ̀ be bɑ kɑ bu sikerenɛ u nɛɛ, Yinni Gusunɔn siribun tɔ̃rɑ wee. Tɔ̃ɔ te, nɔni swɑ̃ɑrugirɑ. Adɑmɑ ɑmɛn biru, Isirelibɑn sukum bɑ koo wurɑmɑ Gusunɔn mi kpɑ bu kpɑm Yerusɑlɛmu seeyɑ.
Tire ten kpunɑɑ
1. Gusunɔ u koo Yudɑbɑ kɑ Yerusɑlɛmugibu siri, wiru 1:1n di sere wiru 2:3.
2. Gusunɔ u koo bwese tukunu kpeerɑsiɑ, wiru 2:4-15.
3. Yinni Gusunɔ u koo Yerusɑlɛmu seeyɑ, wiru 3:1-20.
1
1 Gɑri yiniwɑ Yinni Gusunɔ u Sofoni, Kusin bii sɔ̃ɔwɑ Yosiɑsi, Amɔɔn bii, Yudɑbɑn sinɑ bokon bɑndun wɑɑti sɔɔ. Sofoni wi, u sɑ̃ɑwɑ Gedɑliɑn debubu, Amɑriɑn sikɑdobu, Esekiɑsin yɑ̃ɑsebu.
Yinni Gusunɔ
u koo hɑnduniɑ sɛɛyɑsiɑ
2 Yinni Gusunɔ u nɛɛ,
kon kpuro kpeerɑsiɑ hɑnduniɑ sɔɔ.
3 Kon tɔmbu kɑ yɛɛ kɑ gunɔsu kɑ swɛ̃ɛ kpeerɑsiɑ
kɑ sere mɑɑ tɔn kɔ̃sobu kɑ ye yɑ rɑ bu sokurɑsie.
Kon tɔmbu kpuro kpeerɑsiɑ hɑnduniɑ sɔɔ.
Nɛ, Yinni Gusunɔwɑ nɑ yeni geruɑ.
Yinni Gusunɔ u koo Yudɑbɑ
kɑ Yerusɑlɛmugibu sɛɛyɑsiɑ
4 Yinni Gusunɔ u mɑɑ nɛɛ,
kon Yudɑbɑ kɑ Yerusɑlɛmugibu kpuro nɔmɑ doke.
Kon bũu wi bɑ mɔ̀ Bɑɑlin sɑ̃ɑ yee ni nu tie kpeerɑsiɑ min di.
Kon yen wirugibu kɑ yen yɑ̃ku kowobun yĩsɑ go.
5 Be bɑ dii tɛɛri wɔllɔ kperi kɑ suru sɑ̃ɑmɔ
kɑ be bɑ bɔ̃rumɔ kɑ nɛ, Yinni Gusunɔn yĩsiru,
mɑ bɑ wure bɑ bɔ̃rumɔ kɑ ben bũun yĩsiru,
be kpurowɑ kon go.
6 Be bɑ mɑn biru kisi kɑ be bɑ ku rɑ mɑn kɑsu,
kɑ sere mɑɑ be bɑ ku rɑ mɑn ben gɑri sɑɑwɑrɑ ko,
be kpurowɑ kon go.
7 I nɔɔ mɑrio wi, Yinni Gusunɔn wuswɑɑɔ.
Domi win tɔ̃ru tɑ turuku kuɑ.
U win yɑ̃kuru sɔɔru kuɑ.
U mɑɑ gɔsɑ be bɑ koo tu di.
8 Wi, Yinni Gusunɔn yɑ̃ku ten tɔ̃ru sɔɔ,
u koo wirugibu kɑ sinɑ bokon bibu wɔri,
kɑ sere mɑɑ be bɑ tɔn tukobun komɑnu swĩi.
9 Yen tɔ̃ɔ te, be bɑ ku rɑ sɑ̃ɑ yerun kɔnnɔ suuku tɑɑrɑm kɑ̃ nge bũu sɑ̃ɔbu,
kɑ sere be bɑ ben sunɔn yɛnu dukiɑ yibiɑmɔ
ye bɑ gurɑmɑ kɑ gbɛnɑ, kɑ dɑm dibu,
be kpurowɑ u koo wɔri.
10 Yen tɔ̃ɔ te, bɑ koo wuri nɔ sere kɔnnɔwɔ ge bɑ mɔ̀ Swɛ̃ɛ,
kɑ mɑɑ wuun wɔɔ berɑ gɑɑn mi.
Mɛyɑ nɔni swɑ̃ɑ bɑkɑrɑ ko n wɑ̃ɑ guunu wɔllɔ.
11 Bɛɛ Mɑkitɛsigibu, i wuri koowo.
Domi tenkubɑ kpuro bɑ koo kɑm ko.
Be bɑ gobi kɔsimɔ kpuro bɑ koo kpeerɑ.
12 Yen tɔ̃ɔ te, u koo Yerusɑlɛmu bũuri kɑ fitilɑnu.
U koo tɔmbu wɔrimɑ be bɑ sɔ̃ kpɛtɛɛ nge tɑm kɔrɔnu.
Mɑ bɑ gerumɔ ben gɔ̃ruɔ bɑ mɔ̀,
wi, Yinni Gusunɔ u ǹ geɑ mɔ̀, u ǹ mɑɑ kɔ̃sɑ mɔ̀.
13 Bɑ koo ben ɑrumɑni gurɑ kpɑ ben yɛnusu su ko bɑnsu.
Bɑ koo diɑ bɑni yè sɔɔ bɑ ǹ sinɑmɔ.
Bɑ koo resɛm duure, ɑdɑmɑ bɑ ǹ yen tɑm nɔrumɔ.
Yinni Gusunɔn tɔ̃ru
14 Yinni Gusunɔn tɔ̃ɔ nɑnumgirɑ tɑ turuku kuɑ.
Te wee tɑ wee fuuku, tɑ nɔɔgiru sue.
Tɑbu durɔ dɑmgii u koo kuuki ko dɔmɑ te.
15 Tɔ̃ɔ te, tɑ sɑ̃ɑwɑ mɔrun tɔ̃ru.
Tɔ̃ɔ te, tɑ sɑ̃ɑwɑ nuku sɑnkirɑnun tɔ̃ru.
Tɑ sɑ̃ɑwɑ kɑm kobun tɔ̃ru.
Tɔ̃ɔ te, yɑm wɔ̃kurɑ koo tu wukiriwɑ nge bukɔ kɑ guru winu.
16 Yen tɔ̃ɔ te, tɑbu kowobu bɑ koo kɔbi so
kpɑ bu kuuki ko bu kɑ wuu si su gbɑ̃rɑnu mɔ wɔri.
17 U koo tɔmbu nuku sɑnkirɑnu kpɛ̃ɛ
kpɑ bɑ n sĩimɔ nge wɔ̃kobu.
Domi Yinni Gusunɔwɑ bɑ torɑri.
U koo de ben yɛm mu n tɛrie nge tuɑ,
kpɑ ben gonu nu n sɑ̃ɑ nge kubɑnu.
18 Yen dɔmɑ te, ben sii geesu ǹ kun mɛ ben wurɑ,
yen gɑɑ kun kpɛ̃ yu bu wɔrɑ Yinni Gusunɔn mɔru bɑkɑ yen min di.
Tem mɛ kpuro mu koo dɔ̃ɔ mwɑɑrɑ win mɔrun sɔ̃.
U koo mɛn tɔmbu kpuro gowɑ subɑru sɔɔ.