1 Yoohanee anée Eefeesusa amaana máqasaa rakísimari paatoona maaqí qímasee ákara rúmasee qímamia.

2 Óo Eefeesusa máqannaa Paatoo dínni taikásee dínni ani qaara marasée fásau narí ásaukuki úqirafa ni fásiqafa aní qímamidanoo. Qísauku dínni taikásee dínni ani qaara marasée rambi kúradee mari ainainna qámbaanai nímari fasiqafa Eefeesusa amaana máqasaa rakísimarí paatoo maaqí qímasee qímamidanoo. Qinée anée áuqee maríanna saikána íridaqa anée kadáapiri maríannanara íridaqa anée sía feefaurúara irisáidana maqee maqee kadáapiri márianaqa íridaqa. Anée mandóosana máree máriasara ákooqee maríannanara qinée minára faqa íridaqa eedóo qídaqa. Akaqáusa náriara únna qímasee Yísufa diqiqoo fásiqausee qufaná anée misá faqa amanamásee qáfoonanoo misá únna qírana anée paqúrunafa máriananoo. 3 Anée reendeenámasee miqóo kai fímarianafa máriananoo. Anée qiníara óosana óosana kadáapirirana marasée sía minnísaananoo káqi márana fímariananoo. 4 Akaqá ainainara kai aníara áaqeefoo qídaqa. Anée óoqai indaarú unándee sía qiníara ámuqusidanoo. 5 Óoqai múruqoo ámiqiranaki máriunafa dóo miaqóo qúmuananoo. Ínneeqa óosana quándaki óoqai undée kai iaqaana. Sía miqífaqa qinée ínnee márinannai ínni rambi máriqooqaraana máraanaqa ínnee dóo imbéefara. 6 Ínniki moo óosanara qinée ámiqira fee qídaqa. Nikooraita únna amaana ufara ínnee qiní daanna ráidaqa fídiaqaammi maríafanoo. Nikooraita amaana ufa qímariasa aiqáma faiqí faqa ánaasee faqa moodáanaki máraqa nuafaqa ínnee misá nínda fee qiní daanna rée fídiaqaa ímariasa máriafanoo.

7 Ánutuna maraquna fannoo amaana máqaki kéeqee maríasa aiqámai qímannimidanoo. Náaqoo faqaasa miná ufa kái íriaqa. Mandáinainaki afeekaikámasee rákiranara foora máraqa fífi ínaqa úriqarée maríasa qinée misá qímannimianaqa misá Ánutuna innaarúna ququsaki kéeqafi innaarúnai asumu márirana nímira saqari qaqamma neefáranoo.

8 Miqí qímaseenoo Eefeesusa amaana máqa Paatoonara ufa qímaseenoo quándakufanoo Samirana amaana máqasa Paatoonara Yoohaneena qímaminau. Yoohanee anée Samirana amaana máqasaa rakísimari Paatoona maaqí qímasee ákara rúmamia. Óoqai indaarúqaafa faqa ínaaqianaafa faqa óoqai kúqufa fíndifi káqi márifa Yísufa maa-ufána aní qímamidanoo. 9 Qinée ínni kadáapiriranara íridaqa ínnee maa-maqánasaa aináina síaisa kudi máriafanoo innaarúnai ainaina faqaasa máriafanoo qinée íridaqa. Sadannana faiqi námu akaqáusa náriara únna qímasee Yuda máqannaa fee qímariasa ínniara mandúfa óosana óosana qímariana qinée íridaqa. 10 Qiní ufasáara káqikaa qóo ínnee aupúrarana máreefaranoo ínnee sía minára rufíaaqa. Ínnee íriaqa Sadannafa ínni nimanamásee qáfaaneera karabúsaki akaqáusa quqáannoo. Ínni nídafirafa maa-maqánasaa qúsasaa máriannoo. Ínnee káqi máraqa fífi ínaqa kúqirana paqúrinna aukuana qinée náaru márira qáfee afisúnnímaqaanaura. 11 Ánutuna maraquna fannoo aiqáma maqusa amaana máqaki kéeqee maríasa qímannimidanoo náaqoo faqaasa mi-ufána íriaqa. Andeeqára óosana káqi máraqa fífi ínaqa Sadannana nimanírana úriqararausaikí maríasa ínaaqianna kúqirafa sía misá náruannoo.

12 Yísufa miqí qímasee Samirana amaana máqa rakísiranara Yoohaneena qímamiseenoo quándakinoo Peerakamumma amaana máqasaa Paatoona maaqí qímasee qímaminau. Yoohanee anée Peerakamumma amaana máqasaa rakísimari Paatoona maaqí qímasee miná faqa ákara rúmamia. Qaseema dínni dínni raiqárafa óokiqari animári fasiqafa Yísufa maa-ufána aní faqa qímamidanoo. 13 Ínnee Peerakamumma máqusanaasa Sadannana amaana máqa máriaqoo máriasa máriafanoo qinée íridaqa. Ínnee kúqaa qinísaa atooqée maríasa máriafanoo. Ínni maqúsai Sadannana amaana máqa máriqoo miqóoqaraasa qiní qíqoondi moo fásiqa qiní Yísusara andeeqásee kooroo qímarina ákiaqara miná áuqu Antipasana kuqá árufaqa ínnee sía minára rufíoosa káqi kai qiní saqáriki máriasa máriafanoo. 14 Akaqá ainainara kai ínniara áaqaidámmiafoo qídaqa. Ínniki maqee Baraamafa óoqai máriu fasiqana aanna rée maríafanoo mi-fasiqáfa Baraamafa márufaqa ínniki akaqáusa mi-oosanná máraidaqa. Óoqai Mooaba máqusanaasa karaambáiqa fannoo Barakafa Ánutuna tamummáqara fasiqa moo áuqu Baraamana munnimma amiséenoo anée náukarara ufa Isaraee máqannaa nimisáinaqa kúquaqa. Miqí qufanoo Ánutufa Baraamanara qáoo qufanoo quándakinoo Barakana qímamufanoo Isaraee máqanaasa mindáraasa únna Ánutuna óorisaa náranara dúfi dúfi qímasee nárana náidaqa mindáraa anaasee náafeeqee máriqau. Ínnee Peerakamumma amaana máqaki máriasa akaqáusa Baraamana óosana máree maríafanoo. 15 Miqí kai másee ínniki Nikooraita amaana ufa írimariasa akaqáusa máriafanoo. 16 Ínnee ínneeqa mandóosana kafáa quandáaqa. Sía quandáifaqa qinée ínnee máriaqoo anireéqa qeeqá dóokiqari qaseemannái mi-mandoosanná máree máriasa nárúanauranoo.

17 Ánutuna maraquna fannoo aiqáma maqusa amaana máqaki kéeqee maríasa qímannimidanoo náaqoo faqaasa íriaqa. Óoqai Isaraee máqannaasa aadána maqa maaqakinai nímarufaqa kanánaana kanánaana innaarúnaindaraa feemu nímiaafanausa máridaqa. Máa̱ maqee máriaqoo mandáinaina faqa rákiraridaqa miná úriaaqararausa qinée kukéeqara feemu innaarúnai misá nímianaura. Éekara óonisaa nári fúka nuqu ákara rírana moodáa kai moodáa kai nímianaura. Mi-fuka auqúna sía moó fannoo misá óosana íriannoo narí kai miná óosana íriannoo. Dóo mi-ufána Yísufa Peerakamumma amaana máqasaa Paatoonara Yoohaneena qímaminau.

18 Rambi kúradee maría saqarina qámbaanai márifa Yísufa miqí qímaseenoo quándaki Yoohaneena kafáa maaqí qímasee qímaminau. Yoohanee anée Tiatira amaana máqasaa Paatoona faqa maaqí qímasee ákara rúmamaqaa. Ánutuna ámaaku áfu idára foora qéemarifa miná áiku faqa ánukanóo mari barásara foora tandí tandí marí aikunannoo mandáinaina radámimarifa Yísufa maa-ufána ínni qímannimidanoo. 19 Ínnee Tiatira máqusanaasa qiní Yísusara nímuqusidanoo qinée íridaqa, ínnee maqee maqee íriqa kai fímarianara faqa qinée íridaqa, ínnee qiníara iriséeqa ínneeqa máqannaasa dadaaqímariafanoo. Ínnee sía kadáapi dári foo qímasee minnísee maríafanoo káqi máraqa fímarianara minára faqa íridaqa. Óoqai ínnee qiní saiká óodaa máree máriqau, maqee kámu firaaqóo máree máriafanoo qinée minára faqa íridaqa. 20 Qinée ínni moodáa ainainara kai ínni níqidaqa. Ínnee mi-manda anaaseená Yeeseebeera nammarinara sáina káqi márianifee qímariana. Mifá únna qímasee naríara Ánutuna ufa máree marunausee qídanoo. Mi-anaaseefá naakápaidanoo qiní ufa írimariasa rarisámeeqeenoo faiqí faqa ánaasee faqa narí úmmuari narí úmmuariranaki quqáidanoo. Moo únna ánutunara innaaru qímasaida nárana néemarianaki faqa quqáidanoo. 21 Qinée mi-anaaseenára aneenná úmmuariranakiqari quandáannee qímasee áfeesunaisia máridaqa. 22 Minára miná maréeqee narí rarisaqánua fasiqausa sáimbaqa mandá qaarisaa quqásaanáura minakí máridaqa teeroo firaaná máraida márifaranoo. Misá nári mandóosana sía aupúramásee quandáifaqa qinée dauní miqíanaura. 23 Qinée mi-anaaseená ufa írimariasa faqa kuqá narusáanaqa amaana máqaki kéeqee máriasa qiní óosana írifaranoo. Misá qiníara kukéeqara ainainara írimari fee qiaqéera náruanauranoo. Qinée aiqámausa nári nísaukunnai áuqainnana ákiaqara kai nímianaura.

24 Ínnee Tiatira máqusanaasa sía mi-manda anaaseená óosanna mároosa máriafanoo. Miná óosana máreemariasa Sadannana meemáqoo kukéeqara írirana írimariasa náriara únna qímasee akoofása fee qídaqa. Qinée sía ummaara moó faqa ínnisaa quqáanaura. 25 Maaná kai qímannimidaqa. Ínneeqa ámiqira óosana uaqéeiana miná kai maramáree fuaqa, fífi ínaqa qinée qúmuanna aukuanna miná ákiaqara máraaqa. 26 Rákiranara foora iqá mandáinaina úraaqarararee ímariasa qiní ufamau fímariasa mi-maú fífi ínaqa taikára áukuana paqúriqa qiní qíkoofa afeeka qímuna quándaki misá nímianaura. 27-28 Níminaqa kásooqaqee náaru misá moo máqannaasa úrinaaqaramásee áinna faaqaanannái misá qafeera foora rukámifaranoo. Qinée iqáqara dúqudeeqi faqa nímianaura.

29 Ánutuna maraquna fannoo amaana máqaki kéeqee maríasa qímannimidanoo náaqoo faqaasa mi-ufána íriaqa.