1 Qiní ufa taikárafa maaqímminoo máridanoo. Óo qiní qíkaqaafasaauqa Karaambáiqa asasírana firaaná ínni nímiani. Óoqai qinée ákara rúmannimaqaafanna ufanara sía rufíaidaqa mi-ufáfa ínni ititánnimaqee marí ufana kafáa qímannimidaqa minára maaqí qianáura. 2 Ínnee mandóosana máree maríasara eeráirida aufariaqa misá káasau fainiara foora máridaqa misá Yuda máqannaa óosana márida fáinánduqiranara afeekaikí maríasa máridaqa. Misá fáinánduqirana náriqa fáina káfaqianda úqiranara ánoona ainainee qímasaidaqa miqídaqa áaqaidaqa miqídaqa, maasá kai ánoona fáina káfaqianda úqimarunausará foora máree marunausa máridaqa.

3 Maasá Ánutuna maraqunannái Ánutunara innaaru qídaqa minánnai kai maasá ásauku mundírana Yísunaki márunnanara asasídaqa, maasá sía misá naanna rámasee nifaaqasáa akooqóo mári ainainnara ánoonee qídaqa. 4 Akaqáusa akooqóo faiqí nífusaa mári ainainnasaa mundúsee minakí nifaaqa quqáida áaqaidaqa. Qiní akooqóo qifaaqasáa amooqira ainaina moómoo máridanoo qinée minára fífau ainainee qídaqa minásaa mundúfiqa qifaaqa quqárafa sía máriannoo.

5 Qiní akooqóo qifaaqasáa amooqira ainaina maaqímminoo máridanoo qiní Pauroosa máqooqooqari qísauku dínni ani qaara marasée qaaramoóku faasaana marasoofaqa qiní fáina káfaqianduqí maríqau. Qinée Isaraee máqannaa kambíqarausa máridaqa Yakooboona ámaaku Beensaminna áti máridaqa, Qeeburu máqannaasa uqanna mara máqarausa máridaqa. 6 Qinée firaaqóo Yuda máqannaasa sándufamau fímariafanausa márunnanara firaaqóo sandanáinai qímasee Yísuna ufara suqímarusa nárí mariafánausa máridaqa. Mooseena sándufannái Ánutuna andeeqárana amanaikírafa sía amanaikíannoo. Mooseena sándufannái andeeqárana márararee qímarusakiqari qinée misá úriqararausa Farisai ámaana ufa qímarunausa máriafannana.

7 Óoqai qinée Yuda máqannaa Ánutufinnai fíraree qímaru ainainausara úriqarara ainaina ánoona ainainee qímariqiafana dóo maqee ásauku mundíranara irisée mi-aiqama ainaináusara áaqarafa fífau ainainee qídaqa. 8-9 Sía mi-ainaináusara kai miqí qídaqa aiqáma ainainara káaqa fífau sía mári ainainnee qímasee quándaki ánoona ainaina tia firaa ainaina, ásauku mundírana Yísuna maasá karaambáiqara írimariana minára kai ánoona ainaina fee qímasee minákai qumáreeqa. Minára máraannee qímasee aiqáma ainaina dóo áquseeqa ásauku mundírana máraani qímaseeqa miná faqa moodáanaki márianauree qímaseeqa aiqáma ainainara fífau madaapeé ainainee qímasee áquseeqa quándaki Yísuna qumáreeqa. Dóo maqee qinée sía qeeqá andeeqárana máraqa nídaqa sía Mooseena sándufannái mi-andeeqárana máraqa nídaqa. Qinée maqee moo ándeeqarana ásauku mundírana saqárikiafannanannai Ánutufa andeeqárana qímuna miná kai maqee máraqa nídaqa. Mi-andeeqaráfa Ánutunaindari ánifa Yísuna saqárikiranasaa mundínoo márifa márifaqa máraqa nídaqa.

10 Qinée sía moo áinainara írianauree qídaqa, ásauku mundíranara faqa Ánutufa mifá kúqiranakiqari fíndifu afeekanara faqa íriraree qídaqa. 11 Yísufa kúqiranaki kéeqafinoo minakíqari fíndifufaqa qinée faqa kúqiranakiqari fíndifiqa náaru máriranaki fuanée qímasee maqee kámuqoo Yísuna aupúrarana faqa mifá kúqu áidafirana faqa qinée faqa qeeqá qifaaqasáa máraidaqa.

12 Yísuna aupúrarana faqa kúqu áidafirana faqa qeeqá qifaaqasáa máree marúnnana qinée sía minánnai amanaikíqa sía minánnai káaqa andeeqáidaqa. Qinée maqee maqee andeeqárana márararee qímasee sandáidara foo qíara foo ídaqa. Ásauku mundírafa Yísufa qiníara andeeqárafa márianifee qímaseenoo qiní qumáreeqeenoo naríndi kámmaqaifaqa máridaqa. 13 Óo qiní qíkaqaafasaauqa qinée sía ánoonáikamándee máridaqee qídaqa, sía amana miqíanaura. Qinée maa-moodaa ainainná kaimmídaqa qinée áiqarée ínaaqiannai mári ainainara qeeqá áaqeeaafánna ainainnara aunúmasee dóorinni mári ainainna andeeqára óosana márirana kai qífu mundúseeqa qumárararee qímasee fídaqa sandáidaqa.

14 Qinée narí ámani narí ámanira sandáranara foora taikáranasaa kai dóori mundúseeqa mi-runná kai andeeqásee fídaqa miqóo feefaurú márararee qímasaida sandáidaqa qiní feefaurú márarafa maaqímminoo maridanoo. Ánutufa narí ásauku mundírana Yísunannai maasá dáarama sandáranara foora quqáqiséenoo maaqóo narí andeeqára máriranaki faqa náaru márirana faqa máriaqeera qifaqa miná márarara kai sandáidara foora másee fídaqa.

15 Maasá aiqámausa Yísuna ufa akoofásaikirausa mi-irirána kai máraqa nuaqa. Ínnikiqari akaqáusa moo írirafa márinanoo Ánutufa ínni minára qímannimiannoo. 16 Sáina miqínoo máriani ínnisaimbaqa sía moo úfa irisée mi-maú fuanáura maasá óoqai fúafannamau kai fuanáura.

17 Óo qiní qíkaqaafasaauqa ínnee aiqámausa qiní kai qífaqee qiní qímeemmeeriaqa, maasá ínniara íriqa andeeqára aana uqannífiqaafanaqa dóo maqee ínnee akaqáusa ínnikiqari mi-maú fímariasa níqafamasee ínnee faqa nífaqee mi-maú fuaqa. 18 Qinée Pauroosa maa-ufána óoqai moómoo kari ínni qímannimiafanaqa dóo maqee daukunu rée márifaqa ínni qímannimidaqa, moómoosa ásauku mundírana kúqirana mandaaqásee andeeqára óosana marasée fímarufaqa dóo maqee quándaki mandóosana máraidaqa minánnai ásauku mundírafa aunírira saqarisaa kúqirana namuqáa kíqa miná kúqirana namuqáa kámmamaqaidaqa. 19 Miqí maríasa maaqíqa fífi íqa idáki kai fifáranoo, náriqa áaqee maría nidirafa mifá misá Ánutufara foora máridanoo, misá nisaurí maría ainainnára kai amooqímasee nóori uqéeraida nasurídaqa, misá maa-maqánasaaqaraa ainainará kai íri maríasa máridaqa.

20 Ínnisaimbaqa sía miqírausa máridaqa maasá moo máqannaasara foora máridaqa innaarúna máqusanaasa márunnanara maasá karaambáiqa ásauku mundírana Yísuna maasá asumu márirana qímimarifaqa innaarúnaindari qúmuaninnanara asasammásee áfeesida máridaqa. 21 Mifá miqóo maasá ummooqukíra máqasaaqaraa qifaaqa maréeqeenoo quandáseenoo narí káaqa aréenara afaaqa fooqáanaikammiannoo. Mifá aiqáma ainaina maréeqeenoo narí áramandunnai quqára afeekannái maasá maqásaa qifaaqa mara quandáqi̱sáannoo.