1 Miqí qímaseenoo qísauku dínni taikáseenoo dínni óonu moodáa marasée fáasaana taikáseenoo Yísufa Peetooroona faqa Yameesana faqa miná ákaqa Yoohaneena faqa minamúsa nífiqeenoo áaqanai náriaraa náadumai óoru fiqau. 2 Miqóo misá óoru roofanoo Yísufa moó afaaqa ámiqira afaaqa máranau miná áfiri súaniara foora káaqa ámaqinau miná qamunna faqa éekara aruáqinau nífu qáfoofanoo nífu faqa dároodáraa inau.

3 Miqí másoofanoo óoqai taikáseeqa Ánutuna faqa innaarúnai máruqanda Mooseefa faqa Eeriaafa faqa akooqóo maqásaa misá nífusaa aniréeqa Yísuna faqa ufa qiqau.

4 Peetooroofa qáfamásee Yísuna qímaminau. Karaambáiqa, dúfi dúfi anée maasá qífiqee adíafaa írannai maí úruananoo. Anée qínaqa káqikaa úiqaana maqa qaaramoó áuquanaura. Aníndi moó, Mooseenaindí moó, Eeriaanaindí moó. 5 Peetooroofa káqi qímarufanoo káaqa qárana asuru fannoo aiqáma rafáaqa finau. Ufa moó, asurukíqari Yísunara qímanniminau. Maafá qiní qímaaku qiní káaqa minára qímuqusidanoo. Qiní dídirafa minásaa máridanoo, miná ufa íriaqa.

6 Yísuna faiqi námu mi-ufána iriséeqa káaqa rufíeeqa nóorindari maqásaa áqufiqau. 7 Maqásaa mapámiqa márufanoo Yísufa aniréenoo ásauku misásaa mundínoo qinau. Fíndi fuaqa sía rufíaaqa. 8 Miqí qufaqa misá káqi kaaqóo uqéerafufaqa múrufi Yísuna kai qáfaqau sía faiqí moó márinau.

9 Misá miqóoqari Yísuna saimbaqa áaqanaindari qúmimarufanoo Yísufa maaqí qímasee afeekaikámasee qímanniminau. Ínnee áaqanasaa mee qáfaa aináina sía ínnee moosá qímannimiaqa. Qinée faiqí nímaaku kúqiranakiqari fíndi fúanaqa miqóo kai qímannímiaqa.

10-11 Miqí qímasoofaqa miná faiqi námu iráida qiqau. Maasá Mooseena sándufa uqannífiqee maríasa óoqeenáa tamummaqara fasiqauqa akara ásaanarumasee moo fásiqara Eeriaana aanna rée márifa Ánutuna ásauku mundírana áfunni ániannoo fee qídaqa. Misá yáfasiqanaree miqí qídee qufanoo Yísufa qímanniminoo qinau. Misá kuqáa qídaqa. Eeriaana aanna rée márifa ásauku mundírausa qiní qífunni aiqáma ainaina andeeqáanifeera indaarú ániannoo. 12 Qinée qímannimidaqa, íriaqa. Kuqáa Eeriaana aanna rée márifa qiní qífunni dóo áninoo. Aniroofaqa misá minára sía írirai narí íriranannai kai dapikámásoofanoo kúqinau. Miqí kai mándee qinée faiqí nímaaku káqikaaqóo misásaa farindámaki áqufuanaura.

13 Miqí qímasoofaqa miná faiqi námu iriséeqa Yísufa Yoohaneefa nammári nímimarunara Eeriaana kíkiqa ususéenoo qídaqinoo qiqau.

14 Misá áaqanaindari qumuréeqa faiqí ánaasee súqiqa máruqoo qumuroofanoo faiqí moó fannoo Yísuna óorinni rufíaidanoo ani aqoori sáunara fínoo tootoonasaa óoqu márifinoo qikí ráqaidanoora foora Yísuna qímaminau. 15 Óo karaambáiqa, qiní qímaakuara ámuqusinana dadaaqía. Mifá fuséenasana árimarifaqa ámiqimmásee aurí marifaqa. Maqee maqee káqi idáki áqufidanoo maqee maqee nammáriki áqufidanoo. 16 Qinée qeeqá qímaaku áfiqeeqa aní faiqi námu máriaqoo múnusaunaqa sía amaná misá mi-aurirána taikáafaqa, minára aní qímamidaqa.

17 Yísufa miná iriséenoo aiqamausa qímanniminau. Ínnee qiní ufasaa írirana rusírafa síaisa máriafanoo káaqa foombóo rímariasa máriafanoo. Qinée kísaaqasaa ínniki márunaqa ínnee sía dauní írimariafaqa. Kísaaqasaa fee ubíqafi ínni mandá oosana ummaara máraqa fuanáuree. Sée mi-kumaaraaná máree maí ániaqa qufaqa miqímmiqau. 18 Yísufa mi-afaannána aqiqoofanoo fufanoo mi-kumaaraaná mi-karí kai miqóo kai andeeqá aisánau.

19 Yísuna faiqi námu káqikaaqoo marikíqa óonurandee qumeé kai aniréeqa Yísuna qímamiqau. Maasá nánaree áfaanna aqiqáunanoo fee sía fínoo fee. 20 Yísufa qinau. Ínnee qinísaa írirana rusírafa káqikaafa márinara kai miqíafanoo. Qinée kúqaa ánoona ufa qímannimidaqa. Ínneeqa írirana rusírafa maqána qaqama miqírafa káqikaafa márinaqau maa-aaqannára qífanoofau meeqái fini. Ínnee miqí márifaqau aiqáma ainaina amanámmifoo qíni. 21 (-)

22 Yísuna faiqi námu Kariree máqa máaqai moodáarunna moodáasaa súqiqa máridaqa nímarufanoo Yísufa maaqí qímasee qímanniminau. Faiqí nísaukuara qinée faiqí nímaaku fuanáura. 23 Misá qiní kuqá dárifaqa qaaramoó fáasaana káqi máriqa fíndi fuanáura. Miqí qímasoofaqa Yísuna faiqi námu minára óonumafi írufanoo nímuqusa mandáikinau.

24-25 Misá Kapeeranaumma máqusa óonuroofaqa amaana máqa takisa máree marúsa misá Yísunara nisaurúseeqa Peetooroofa máruqoo óonuree iráidaqa qiqau. Aní firaafá amaana máqa takisa sía fee áqidanoo fee qímasoofanoo Peetooroofa eeóo áqidanoo qinau.

Miqí qímaseenoo káqikaaqoo máaqaki kéeqoofanóo Yísufa miná moo áuqu rámasee qímaminoo qinau. Simoona maa-maqánasaaqaraasa misá óosana maaqímminoo máridanoo. Moo máqannaasa namuqáa afeekaikámásee nárirarammásaida namuqáandi kai fee takísa máraida fee, nárindi nári maqannaasaindi fee kai máraidee qufanoo Peetooroofa miná iriséenoo qinau. 26 Namuqáandi kai máraidaqa. Narí maqannaasa úriqararausa máriafanoo sía uqanna misáki máraidanoo.

Yísufa iriséenoo qinau. Kúqaa qiananoo, miqí márifaqa úriqararausa níku nísauku nifaaqa quqásee máridaqa. Maasá úriqararana Ánutuna áiku ásauku márunausa márida. Nánaree fífau Ánutuna amaana máqa takísianauree. 27 Sía níminaqa maasára nóori rúnifoora. Sáina anée táfa mara máree nammáriki óoquree áquseenana indaarúqaa noodaanna rarisámáseenana óo raqáseenana qáfaa. Moodáa munnimma minakí máriannoo. Anée qiníara faqa aneennára faqa mi-munnimmána maréeqeena amaana máqa takisa máree maríasa níminanoo ufa taikáani.