1 Yísufa miná faiqi námu qísaukuqara taikásee qíkunni óoqu qaaraqánda marasée mi-ufána óosana óosana qímannimiseenoo miqóoqari misá maqúsa maqusa nídanoo qímannimímarinau.

2 Yoohaneefa nammári nímimarufa karabúsaki máridanoo ásauku mundírana óosana óosana írinau. Iriséenoo ámiqimmásee írianau qímaseenoo narí faiqi námu Yísufinnai niqiqanáu. 3 Yoohaneena faiqi námu Yísufa máruqoo óonuree irámmiriqa qiqau. Anée óoqai tamummáqara fasiqa kambíqaannoo fee qímaqoofa anée mifée máridanee. Anée Ánutuna ásauku mundíra fee máridanee. Maasá moorée áfeesianáuree. 4 Qímasoofanoo Yísufa qinau. Maaqóo ínnee animáriaqoo aináina áuqaunnanara faqa ufa qímannimunnanara faqa minára kai óonuree Yoohaneena qímamifanoo mifá qiníara íriannoo. 5 Nífu dimbárausa maqannísaidaqa, níku eendírausa ámiqimmánnisaunaqa nídaqa. Károora nárimariasa rukánnisaidaqa. Náaqoo aunírausa ufa íridaqa. Kúqimariasa fíndifumánnisaidaqa. Kudi fásiqauqa qinée ámiqira fúka ufa innaarúnai ququsa ufa misá qímannimidaqa. Mi-ufána óonuree Yoohaneena qímamifanoo mifá qiníara íriannoo. 6 Moó fannoo sía qiníara qaara irirana írimarifa mifá asasímarifa máriannoo. Qinísaa míkimmáki márifa sía asasíannoo. Mi-ufána faqa Yoohaneena qímamiaqa.

7 Yoohaneena faiqi námu fífufanoo Yísufa faiqí ánaasee Yoohaneenara qímanniminau. Fífau máqa maaqa káasau aadána maqa maaqa ínnee Yoohaneena qáfarara fíqa ínnee nána qáfararee fíqee iqau. Fífau ándanda kásinaree fíqee iqau. Sía uqanna minára fiqau. 8 Ínnee nána qáfararee ándandai fíqee iqau. Faiqí ámiqira qamunna afisímarina miná qáfararee fee qímasee fíqee iqau. Óo sía uqanna minára fiqau. Miqírausa sía káasau maqa maaqaki máridaqa karaambáiqa máaqaki ámiqiranaki máridaqa. 9 Nána qáfararee ínnee fíqee iqau. Ánutuna tamummáqara fasiqa qáfararee fee qímasee fíqee iqau. Kúqaa Yoohaneefa Ánutuna tamummáqara fasiqafa márufa óoqu qáfaqau. Sía misá kai, Yoohaneefa tamummáqarausa úriqaramásee tamummáqarafa márifaqa ínnee qáfaafanoo. 10 Óoqeenáa ákara minára kai qídanoo. Mi-akaránaki Ánutufa maaqí qímasee Yoohaneenara qídanoo.

11 Ákarakinaa ufa miqí qinoo márinara qinée Yísusa ánoona ufa qímannimidaqa. Ánaasee faiqiuqáindi moómoo máridaqa. Yánaasee fee Yoohaneena úriqararana máqanoofée inau. Sía moó fannoo miná úriqararana máqanau. Innaarúna ququsa máriasa uréeqarausa misá kai Yoohaneena úriqararausa máridaqa. 12 Qinée ánoona ufa qímannimidaqa. Yoohaneefa nammári nímimari áukuanaindari faiqí ánaasee rákiranannoo maqúsa máree maríandee miqí kaimásee nímudaanai qímasee innaarúna ququsaki kéeqarara qímasee innaarúna ququsa máree maríasa máridaqa. 13 Ánutuna óoqeenáa tamummáqeemaru fasiqausa faqa Mooseena sándufa faqa misá óoqai óosana arasée kásooqaqee kambíqaaninnanara tamummaqasee fífiufanoo Yoohaneenasaa taikáqau. 14 Misá Eeriaafa ánirarammifoo qufanoo dóo Yoohaneefa mifá ani máridanoo, ínnee mi-ufánara nídinaqee írifaree sía fee nídinaqee sía írifara. 15 Áaqoo fáinafa íriaqa, sía áaqoo fáinafa sía íriaqa.

16 Maqee márunausa nánara foora máridaqee fee qianáuree. Misá maqúsaki faiqi uqáindiara foora máridaqa. Misá moosára maaqí qímasee naráqi naráqi qídaqa. 17 Maasá ukeena fuaqáunaqa ínnee faqa sía dadaaqí idí rée maríafanoo. Kaifáa maasá quandáfiqa ikí ánai fakíki ráunaqa sía miná faqa dadaaqí máriafanoo. Ínnee dapikámmi máriafanoo. 18 Misá miqí qímasee miqí qiafaqa qinée Yísusa minára maaqí qídaqa. Máa̱ maqee márunausaki miqímminoo máridanoo. Yoohaneefa aniréenoo uáinna nammari faqa nárana uqanna faqa sía nanau, dapi narana kái noofaqa ínnee minára áfaanna kéeqafifanoo miqídanoommifoo qiqau. 19 Qinée faiqí nímaaku aniréeqa nárana faqa nammári faqa náunaqa ínnee qiníara mandá fasiqa márida, káaqa néemarifa, káaqa nammári néemarifa, káaqa úmmuarimaria takísa munnimma máreemariasa niqiqéemariasa áqoondiki márifa, mandóosana máreemariasa áqoondiki márifa. Ínnee qiníara miqi qímariafaqa qinée minára maaqí qídaqa. Yoohaneefa nammári nímimarifa faqa qinée faqa maaqandá Ánutuna íriramau andeeqásee fímarunanoo miná ánoona koorooídanoo. Ínnee maqee máriasakiqari sía ínni ufa fannóo ánoonaikidanoo, qaaraikámmida miqímariafanoo.

20 Mifá miqí qímaseenoo mi-maqusa maqusána misáki nímarufaqa misákina aurírana andeeqánnisánoo nídanoo firaa naaquqara ainaina firaa ainaina áuqeemarufaqa qáfeemariqau. Qáfamasee irisée sía naundurá quandáqau. Mi-maqusa maqusánara maaqí qímasee Yísufa núqu rámasee níqinau. 21 Koorasinna máqannaasa maqúsa máaqa námufaqa qinée ínniara qimudáo̱o qídaqa ínni nárirafa firaafá máriannoo. Beetasaida máqannaasa maqúsa máaqa námufaqa ínniara faqa qimudáo̱o qídaqa. Ínni nárirafa faqa firaafá máriannoo. Taia máqusa faqa Sidoonna maqusa faqa ánaamuru aamína máriasa qinée misákina miqímandee faiqí sía amanaikí maría ainaina misákina áuqaanaqáu naundurá dauní quandáiqini. Misá dandá dooná nifaaqaí níkiaqaki akuséeqa nári mandóosanara ikíraqasée minníseefau dauní quandásee qiní ufamau fini. 22 Qinée kúqaa ánoona ufa ínni qímannimidaqa. Firaa numoo aukuana aniráinanoo Ánutufa Taia máqusanaasa faqa Sidoonna máqusanaasa faqa náridanoo káqikaaqoo áfauáanno. Ínnee Koorasinna maqusanaasa faqa Beetasaida máqusanaasa faqa sía áfauáannoo firaaqóo ínni náruannoo. 23 Kapeeranaumma máqusanaasa ínnee ínneeqara úriqararausee qímasee ínni maqusara faqa únna qímasee innaarúna amana kái máridee qímariasa. Kásooqaqee Ánutufa aní mindári rarisámmeeqeenoo idáki áqunnisaannoo. Soodooma máqusanaasa mandóosana máree marufanoo Ánutufa nárinau. Qinée Soodooma máqusaki faiqí sía amanaikí marí ainaina ínni Kapeeranaumma máqusaki áuqa̱afánandee íananóofau maqee mi-maqusáfa káqi máriqini. 24 Firaa koota aukuana Soodooma máqusanaasa nárirafa máriannoo káqikaaqoo rauqí nímaqaannoo. Kapeeranaumma máqusanaasa ínni nárirafa firaatiá uqanna sía rauqí nímaqaannoo. Qinée ínniki máridaqa qinée qúnnufana sía írimarianara ínni nárirafa firaafá máriannoo.

25 Mikarí Yísufa innaaru qímasee qinau. Qiní qíkoofa, maa-maqána faqa innaarúna faqa rakísirafa dúfi dúfi aní ufa qinée maqee maqee maa-ufána qímannimímarunnanara írirana faqaasa nífusaa rafáaqafunniséenana káiqeesa nífusaa kooroo mánnimaqee mariananoo. 26 Eedóo dúfi dúfi anée qiní qíkoofa aní áidirafa miqímminoo máridanoo.

27 Aiqáma ainaina qiní qíkoofa qíminau. Yáfa yáfee ámaakuara íridanoo fee sía moó fannoo. Ákoofa kai minára íridanoo. Yáfa yáfee ákoonara íridanoo fee, sía moó fannoo ámaaku kai minára íridanoo ámaaku fannoo narí kai irisée uqannífiqarausa misá minánnai qiní qíkoonara íridaqa. 28 Aiqáma kadáapiri máriasa faqa naudurá qumaara firaaná máree máriasa faqa, qinée únnannai aniráifaqa qinée naundurá idooárana nímianauranoo.

29 Qiní qumaara qáinda dínni qumáree nífaariki rusísee qiní dóokinaa ufa máraaqa. Qinée reendeenírausa qímuqusa múqufi ubíqarausa máridaqa ínnee qiní ufa óosana marasáifaqa naundurá asooárana adooárana nímianaura. 30 Qiní qumaara qáinda síamma ákumu áruannoo sía qumaara márinara asooárana adooárana paqúrifaranoo.