1 Mooseefa Isaraee máqannaa faiqí ánaasee aiqáma suqúseenoo qíma níminau. Yáaweefa ínniara maa ufamaú fuaqée qidanoo. 2 Qísauku dínni taikásee dínni ani moodáa marasée 6 fáasaanasaa aináiniaqée qinoo. Dínni ani qaaraikínoo 7 qiní firaa naaquqara idooara faasaana máriannoo. Faiqí moó fannoo mi faasaanná aináininaqa ínnee miná kuqá áruaqa. 3 Ínnee sía Sabáta faasaannásaa ínneeqa máaqaki suqá naaqa.

4 Mooseefa Isaraee máqannaa aiqáma kafáa maaqí qímasee qímanniminau. Yáaweefa maaqí qímasee naamúa qidanoo. 5 Ínnee Ánutuna ámiraree qímasee nifaaqa asasínausa kóora faqa siruáa faqa booróosa faqa máree ániaqa. 6 Ámiqira qámunna faqa sipsípa asausí dirindáasi ákirana faqa pánnoona ákirana faqa faéena ákirana faqa mimmí asausínnai áuqira qamunna faqa máree aniaqa. 7 Sipsípa ákoona apata faéena ákirana faqa ooruku námmarikinaa áandau apata faqa akasia sáqari fáqa máree ániaqa. 8 Qóoma qumbí maría fadameena faqa ámiqira afundí mári ainainná andaana rírana idáki adíasaafanoo adíafaa íra úndi márina faqa mi ainainná kai níkiiqa amoondunna adíee maría fadameenáki quqárara faqa máree ániaqa. 9 Pupú óoniuqa faqa akaqá ámiqira óoniuqa faqa aanáiqi kírausa úriqararausa afisí maria eefooda qámunnánasaa faqa ámuqusasaa ititára qámunna sáa faqa quqéefandínna óonisa máree ániaqa.

10 Ínni kiqari óosana óosana áinaina áuqarana akoofásauqa kai aniréeqa Yáaweena úiqaana máaqaki aináina mifá naamúa qímaqaimau kai áuqaaqa. 11 Misá úiqaana máqa fáqa miná rafáaqafi mária qamunnána faqa miná anaanu faqa mi maqána usakára átunauqa faqa aunírira sáqari faqa óosuki faqa kooqíki faqa rakíqee fandínna saqárisa faqa saqári maqáki rakíqarana ámaaqa áuqirana faqa áuquaqa. 12 Moodáanaki kíra bookísa faqa miná qaindúsira sáqari qára fáqa miná áfu faqa minásaa ititara qamunná faqa áuquaqa. 13 Áiku faqáa qáinda faqa miná aindúsira sáqari qára faqa minásaa quqée maría ainainná fáqa auquaqa, Ánutuna ámifandínna feemuna faqa úquaqa. 14 Qóoma sáqari fáqa miná qóomauqa faqa miná óosana óosana ainaina faqa miná qéemari fadameenná faqa áuquaqa. 15 Áfundi marína andaana rírana suqée maria qaidarána faqa miná qaindúsi maría saqari qandá faqa faiqí níkiiqa ámóondúnna adíeemaria fadameenná fáqa áfundimarína andaana rírana faqa úiqaana máaqa kooqí qamunna fáqa auquaqa. 16 Aandáu tatúfirana suqée mária qaidarána faqa miná fukaá ásaana booróosannai áuqirana fáqa miná qaindúsira sáqari qara faqa miná óosana óosana áinaina faqa nammári áuqara dífaani fáqa miná óosana faqa áuquaqa. 17 Dapusáa díri maría qamunnána fáqa dapu sáqari fáqa saqári kurádee maríana óosana ámaaqa áuqiranáuqa faqa dapu kooqíki kéeqee mária qámunnana fáqa auquaqa. 18 Kafáa dapu fáqa úiqaana máaqa apúpùkáuqa faqa miná rumbée maria sánda aináiná faqa áuquaqa. 19 Áaroona idaaqíra qámunna faqa miná faiqi námu qamunna faqa úiqaana máaqaki náaquqara óosiranaki aanáiqikira sáika máraidaqa afisífandínna qamunnana faqa mi aiqama ainainná áuquaqa.

20 Mooseefa mi ufána qíma nímisoofaqá faiqí ánaasee irisée dáraaniqau. 21 Nifaaqa asasusá mi ainaináusa Yáaweena míni amisoofaqá mi ainaináusannai Yáaweena úiqaana máqa usakáqau. Yáaweena amooqifándinna áinainausa faqa aanáiqikirausa afisífandínna qamunnáusa áuqifandínna ainaináusa faqa máree ániqau. 22 Faiqí ánaasee Yáaweena ámirara nídimarusa misá kai nifaaqa áuqimaru ainaináusa níkiiqa asausí rumbée marú pinnána faqa náaqoo kinaa fídinaanu faqa nísaukuki quqée maru isaaqamána faqa ninukakí rúfi maru kukukakána faqa óosana óosana ainaina nifaaqa áuqi máruna kóorannai áuqirànáuqa míni Yáaweena ámidee qíqa míni quqáqau. 23 Akaqáusa ámiqira qámunna maqéeusa faqa sipsípa asausi dirindáasi ákiranee pánnoona ákiranee faéena ákiranee maqéeusa faqa mimmí asausínnai áuqira qámunna maqéeusa faqa sipsípa ákoona apata faéena ákirana maqéeusa faqa ooruku námmariki máru aandauná apata maqéeusa fáqa máree ániqau. 24 Siruáa fáqa booróosa faqa Yáaweena ámirara amanaíkusa máree ániqau. Akaqáusa akasia sáqari Yáaweena úiqaana máqa usakárana amana maqéeusa marée ániqau. 25 Akoofása anaaseeuqa óosana óosana ámiqira sánda sipsípa asausinnai dirindáasianda faqa fáeenanda faqa pánnoona áriranda faqa súfirana míni quqáqau. 26 Misa mimmí asausínnai faqa súfimariqau. 27 Faiqí firaasá aanáiqikirausa úriqarana qamunnasáa faqa ámuqusasaa faqa quqáaqeera faráafana óoniuqa faqa firaa feefaura áqimaru ámiqira oonísa faqa maree ániqau. 28 Kafaa misá adíàfaa ímaru ainaináusa óosana óosana faqa qóoma qumbí marú fadameennána faqa níkiiqa ámoondunna adíee marú fadameennana faqa adíafaa íra áfudimarú ainaina aindirirána idáki téeqimmasoofanoo adíafaa íra áfundi marúna faqa máree ániqau. 29 Isaraee máqannaasa faiqí ánaasee Yáaweena ámirara nídimarusa Yáaweefa Mooseenara áuqaanífeera aakápoo áinainausa máree ániqau.

30 Mooseefa kaifáa Isaraee máqannaa maaqí qímasee qíma niminau. Yáaweefa faiqí moó miná áuqu Beesareerana Urina ámaaku Hurana ánaiqi Yúdana átikínaana mara quqéenoo. 31 Yáaweefa Beesareerána aiqáma ámiqira ainaina áuqaanifeera narí maraquna afeeka umbiqá ámaqeenoo. Aiqáma áinaina áuqirana akoofásaikirana faqa amanaikírana faqa óosana óosana áinaina amana áuqira írirana faqa áminoo. 32 Yáaweefa Beesareerána óonu máfi irisée áuqara írirana amisaifanoo mifa kóorannai faqa siruáannai faqa boróosannai faqa óosana óosana áinaina áuqirana akoofása máridanoo auquannoo. 33 Kafáa mifa ámiqira óoni ateekéemaríà irirana faqa kóorannai mi oonína quqárana ámaaqa áuqira írirana faqa saqárisaa óosana óosana ainaina amana áuqira írirana faqa amiqaifanóo áuqáannoo. 34 Ooqooriabana Aqisamakana ámaaku Dannana óosanakinaana fáqa Yáaweefa ínniki quqáqaifanoo mifá faqa Beesareerána dadaaqíanifeera máridanoo. Yáaweefa miqandá akaqáusa uqannífiqáaqee írirana faqa níminoo. 35 Yáaweefa óosana óosana áinaina nísaukunnai áuqarana akoofásaikirana nimiqaifaqá máridaqa. Óonisaa ákararirana faqa óosana óosana ámiqira ákara ríra írirana faqa ámiqira qámunna afundára írirana faqa sipsípa asausí dirindaasi ákiranannoo faqa pánnoona ákiranannoo faqa faéena ákiranannoo faa akaqá qamunna áuqira írirana faqa níminoo. Nimisaifaqá miqandá óosana óosana áinaina áuqira írirana akoofása qára máridaqa.